ކައުންސިލް ބައި-އިލެކްޝަންތައް އަހަރަކު ދެ ފަހަރު ބޭއްވުމުން ޚަރަދު ކުޑަވާނެ: މެންބަރުން

ލޯކަލް ކައުންސިލްތަކުގެ ބައި-އިލެކްޝަންތައް އަހަރަކު ދެފަހަރު ބޭއްވުމުން ދައުލަތުން ކުރަންޖެހޭ ޚަރަދު ކުޑަވާނެ ކަމަށް ރައްޔިތުންގެ މަޖިލީހުގެ މެންބަރުން ވިދާޅުވެއްޖެއެވެ.

މެންބަރުން މިހެން ވިދާޅުވީ ސަރުކާރުގެ ފަރާތުން ހުށަހަޅުއްވާފައިވާ ލޯކަލް ކައުންސިލް އިންތިޚާބުގެ ޤާނޫނަށް އިސްލާހު ގެނައުމުގެ ބިލަށް ބަހުސް ކުރައްވަމުންނެވެ. މި ބިލަށް ގިނަ މެންބަރުން ވަނީ ތާއީދު ކުރައްވާފައެވެ.

ސަރުކާރުގެ ފަރާތުން ބިލު މަޖިލީހަށް ހުށަހަޅުއްވައި ކާށިދޫ ދާއިރާގެ މެންބަރު މުންތަޡިމް އިބްރާހިމް ވިދާޅުވީ އިރުއިރުކޮޅާ ކައުންސިލްތަކުގެ ބައި-އިލެކްޝަންތައް ބޭއްވުމަކީ ޚަރަދުބޮޑުވާ ކަމެއް ކަމަށް އިލެކްޝަންސް ކޮމިޝަނުންވެސް ފާހަގަކުރައްވާ ކަމަށެވެ. އެފަދަ ޚަރަދުތައް އިތުރުވަނީ އިންތިޚާބުގެ މިނިވަންކަން ކަށަވަރުކުރުމަށް އިންތިޚާބުތައް ރާވަންޖެހިފައިވާ ގޮތުން ކަމަށާއި އެހެންވެ ގިނަ އިންތިޚާބުތަކެއް އެއްފަހަރާ ބާއްވާގޮތަށް ހަމަޖެހުމުން އެ ޚަރަދުތައް ކުޑަވާނެ ކަމަށް މެންބަރު ވިދާޅުވިއެވެ.

"ގިނަ އިންތިޚާބުތައް އެއްކޮށް ބޭއްވުމުގެ ސަބަބުން އޭގެ ޚަރަދުތައް ކުޑަވެގެންދާނެ. އިންތިޚާބެއް ބޭއްވުމަކީ އޭގެ ދަތުރުފަތުރާއި އިންތިޚާބުގައި ހަރަކާތްތެރިވާ މުވައްޒަފުން ތަމްރީން ކުރުމާއި ވަރަށް ގިނަ ކަންކަން އެކަމުގައި ހިމެނޭކަމެއް،" ކާށިދޫ ދާއިރާގެ މެންބަރު މުންތަޡިމް އިބްރާހިމް ވިދާޅުވިއެވެ.

ބިލަށް ބަހުސް ކުރައްވަމުން ވެލިދޫ ދާއިރާ މުޙައްމަދު އައްބާސް ވިދާޅުވީ އަހަރަކު ދެ ފަހަރު އިންތިޚާބު ބޭއްވުމުން ޚަރަދުކުޑަވެ ދައުލަތުން ދޭ ޚިދުމަތް އިތުރަށް ފުރިހަމަވާނެ ކަމަށެވެ. އެގޮތުން މިހާރު ބާއްވާ ކޮންމެ ބައި-އިލެކްޝަނަކަށް އިންޖީނުގެއެއް ނުވަތަ ހޮސްޕިޓަލެއް އެޅޭހާ ފައިސާ ޚަރަދުވާ ކަމަށް ވިދާޅުވިއެވެ.

ކައުންސިލްތައް ވުޖޫދުވެގެން ރައްޔިތުންނަށްވީ ރަނގަޅުކަމެއް އޮތްކަމަށް ގަބޫލެއް ނުކުރައްވާކަން ފާހަގަކުރައްވައި މެންބަރު މުޙައްމަދު އައްބާސް ވިދާޅުވީ ކައުންސިލްތަކާމެދު ހުރި ކަންބޮޑުވުމަށް ރިޢާޔަތް ކުރަންޖެހޭ ކަމަށެވެ.

"މާލިއްޔަތުގެ ޤާނޫނާ ޚިލާފަށް ރައްޔިތުންގެ ވިންދާއި ރޫހާ ޚިލާފަށް ޚަރަދުކުރެވޭ ކައުންސިލްތައް ސަސްޕެންޑް ކުރެވޭ ގޮތަށްވެސް އަޅުގަނޑުމެން އެބަޖެހޭ މި ޤާނޫނުގައި ހިމަނަން ކޮންމެވެސް ހިސާބަކުން."

ކުޑަހުވަދޫ ދާއިރާގެ މެންބަރު ހުސައިން ހަމީދު ވިދާޅުވީ މި އިސްލާހަކީ ވީހާވެސް އަވަހަށް ގެންނަންޖެހޭ އިސްލާހެއް ކަމަށެވެ. އެގޮތުން، މިހާރު ބައި-އިލެކްޝަންތަކުގައި ބޮޑު އިންސައްތައެއް ވޯޓުނުލާ ކަމަށާއި އޭގެއިން އެނގެނީ އިރުއިރުކޮޅާ އިންތިޚާބުތައް ބާއްވަން ރައްޔިތުން ނޭދޭކަން ކަމަށް ވިދާޅުވިއެވެ. އަދި ކައުންސިލްތަކުގެ ގޮނޑިތައް ހުސްވާ ސަބަބުތައް ދެނެގަނެ އެކަމަށް ހައްލު ހޯދަންޖެހޭކަންވެސް މެންބަރު ފާހަގަކުރެއްވިއެވެ.

"ކައުންސިލްތަކުގެ ބައި-އިލެކްޝަންތަކުގެ ވާހަކަދައްކާއިރު އިސްތިއުފާ ދީފަ ނޫނީ ކައުންސިލްކަމުން ދުރުވާ ސަބަބު އެބަޖެހޭ ހޯދަން. އެ ސަބަބަށް ބަލާއިރު ކައުންސިލްތަކަށް އެކަށީގެންވާ އިނާޔަތާއި ރައްކާތެރިކަމެއްނުލިބޭ،" ކުޑަހުވަދޫ ދާއިރާގެ މެންބަރު ހުސައިން ހަމީދު ވިދާޅުވިއެވެ.

ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވީ ޚަރަދު ކުޑަކުރުމަށް އޮތް ހައްލަކީ އީ-ވޯޓިންގެ ނިޒާމް ގާއިމްކުރުން ކަމަށެވެ. އެގޮތުން، ޒުވާނުން ވޯޓުލާން ޝައުގުވެރިކަން ނުހުންނަ ކަމަށާއި އީ-ވޯޓިންގެ ސަބަބުން އެކަމަށް ހައްލު ލިބޭނެ ކަމަށްވެސް ވިދާޅުވިއެވެ.

"ޚާއްސަކޮށް ޒުވާނުންނަށް ވޯޓުލުމުގެ ޕްރޮސެސްގެ މުހިންމު ކަމާއި ވޯޓުގައި ބައިވެރިވުމުގެ މުހިންމުކަން ފޯރުކޮށްދިނުމަށްޓަކައިވެސް އަޅުގަނޑުމެން ޖެހޭނީ އީ ވޯޓިންއަށް ދާށޭ. ޚާއްސަކޮށް މިކަހަލަ ބައި-އިލެކްޝަންތަކުގައި،" މެންބަރު މައުރޫފް ޒާކިރު ވިދާޅުވިއެވެ.

ކެންދޫ ދާއިރާގެ މެންބަރު މިގޮތަށް ވިދާޅުވި ނަމަވެސް ގިނަ މެންބަރުން ވަނީ އެއީ ރާއްޖެއަށް އެންމެ އެކަށީގެންވާ ނިޒާމެއް ނޫންކަން ފާހަގަކުރައްވާފައެވެ. އެގޮތުން ހުރާ ދާއިރާގެ މެންބަރު ޑރ. އަނާރާ ނަޢީމް ވިދާޅުވީ ރައްޔިތުންގެ އިތުބާރު އަދިވެސް އޮތީ ވޯޓު ފޮއްޓަށް ކަމަށެވެ.

އިންތިޚާބެއް ކުރިމަތިވުމުން ދައުލަތް ހިންގުމަށް ބުރަބޮޑުވާ ކަމަށާއި ޚާއްސަކޮށް ކައުންސިލް ބައި-އިލެކްޝަންތަކުގެ ސަބަބުން ޕާޓީތަކަށްވެސް ދަތިވާ ކަމަށް އަނާރާ ވިދާޅުވިއެވެ. އެހެންވެ އެކަންކަން ބަދަލު ކުރަންޖެހޭ ކަމަށާއި އަހަރަކު ދެ ފަހަރު ބޭއްވުމުން ވަރަށް ބޮޑު ފަސޭހައަކަށްވާނެ ކަމަށް ވިދާޅުވިއެވެ.

"ޤައުމު ހިންގުމަށްޓަކައި، ޤައުމަށް އިސްލާހީ ހެޔޮ ބަދަލުތައް ގެނައުމަށްޓަކައި ކުރަންޖެހޭ ވަރަށް މުހިންމު ކަންކަން އެބަހުރި. އެހެންވީމަ އެކަންކަމަށް ޖާގަދިނުމުގެ ގޮތުންވެސް އިންތިޚާބުތައް ބޭއްވޭ މިންވަރު މަދުކުރަން އެބަޖެހޭ،" އަނާރާ ވިދާޅުވިއެވެ.

ލޯކަލް ކައުންސިލް އިންތިޚާބުގެ ޤާނޫނަށް ގެންނަ އިސްލާހުގައި ބަޔާންކޮށްފައިވާ ގޮތުން ކައުންސިލް ބައި-އިލެކްޝަންތައް ބާއްވާނީ އަހަރަކު ދެ ފަހަރުއެވެ. މިހާރު ޤާނޫނު އޮންނަގޮތުން ކައުންސިލް ގޮނޑިއެއް ހުސްވެފައިވާނަމަ 60 ދުވަހުގެ ތެރޭގައި އިންތިޚާބު ބާއްވަންޖެހެއެވެ.

މިއީ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ހުށަހަޅާފައިވާ އިސްލާހާ ގުޅިގެން ގެންނަންޖެހޭ އިސްލާހެކެވެ. ކައުންސިލް ބައި-އިލެކްޝަންތައް އަހަރަކު ދެފަހަރު ބާއްވަން އިސްލާހު ގެނައި ނަމަވެސް ކޯރަމް ހަމަނުވާނަމަ އިންތިޚާބު ކުރިން ބާއްވަން ޖެހޭނެކަމަށްވެސް އިސްލާހުގައިވަނީ ބަޔާންކޮށްފައެވެ.