ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތުގެ ވެރިޔާ އިސްމާޢީލް ހަނިއްޔާގެ މަރުގެ ބަދަލު ހިފުމަކީ އީރާނުގެ ޒިންމާއެއް ކަމުގައި އެ ޤައުމުގެ ރޫޙީ އިސްވެރިޔާ ޢަލީ ޚާމަނާއީ ވިދާޅުވެއްޖެއެވެ.
ޔަހޫދީން ދިން މިސައިލް ޙަމަލާއެއްގައި ހަނިއްޔާ ޝަހީދުކޮށްލާފައި ވަނީ އީރާނުގެ ވެރިރަށް ތަހްރާނުގައި ހުންނަވަނިކޮށެވެ. އާންމު ގޮތެއްގައި ޤަޠަރާއި ތުރުކީވިލާތުގައި ދިރިއުޅުއްވާ ހަނިއްޔާ އީރާނަށް ވަޑައިގެންފައި ވަނީ އެ ޤައުމުގެ ރައީސް މަސްޢޫދު ޕީޒިޝްކިޔާންގެ ހުވައި ކުރެއްވުމުގެ ރަސްމިއްޔާތުގައި ބައިވެރިވެ ވަޑައިގަތުމަށެވެ. ހަނިއްޔާ ވަނީ އޭނާ ޝަހީދުކޮށްލުމުގެ މަދު ގަޑިއިރުކޮޅެއްގެ ކުރިން ޙާމަނާއީއާ ވެސް ބައްދަލުކުރައްވައިފައެވެ. މިދިޔަ ނޮވެންބަރު މަހު ވެސް އޭނާ ވަނީ އީރާނަށް ވަޑައިގެން އެ ޤައުމުގެ އިސްވެރިންނާ ބައްދަލުކުރައްވައިފައެވެ.
ޚާމަނާއީ ވިދާޅުވީ ހަނިއްޔާގެ މަރުގެ ބަދަލު އީރާނުން ހިފަން ޖެހެނީ އޭނާ ޝަހީދުކޮށްލާފައި ވަނީ އީރާނުގައި ކަމުގައި ވާތީއެވެ. އަދި ޔަހޫދީންނާ ދެކޮޅަށް ވަރުގަދަ ޙަމަލާއެއް ދިނުމަށް މަގުފަހިވެފައިވާ ކަމަށް ވެސް އޭނާ ވަނީ ފާހަގަކުރައްވައިފައެވެ.
މިދިޔަ އޭޕްރިލް 1 ވަނަ ދުވަހު ޔަހޫދީ ފައުޖުން ސޫރިޔާގެ ވެރިރަށް ދިމިޝްޤުގައި ހުންނަ އީރާނުގެ ކޮންސިޔުލޭޓަށް ދިން ޙަމަލާގައި އީރާނުގެ ހަތް ސިފައިން ޝަހީދުވުމުން އެ ޙަމަލާގެ ބަދަލުގައި އީރާނުން ވަނީ ޔަހޫދީންގެ ރަށްތަކަށް ވަރުގަދަ ޙަމަލާތަކެއް ދީފައެވެ. އެ ޙަމަލާތަކުގައި އީރާނުން ވަނީ 300އެއްހާ ޑްރޯނާއި ކްރޫޒް މިސައިލާއި ބެލިސްޓިކް މިސައިލް ބޭނުން ކޮށްފައެވެ. އެއީ އީރާނުން ސީދާ ޔަހޫދީންގެ ރަށްތަކަށް އަމާޒުކޮށް ޙަމަލާ ދިން ފުރަތަމަ ފަހަރެވެ.