އީރާންގެ ވެރިރަށް ތަހްރާނަށް ޔަހޫދީ ފައުޖުން ދިން ރަޙުމު ކުޑަ ޙަމަލާއެއްގައި ޝަހީދު ކޮށްލާފައިވާ ފަލަސްޠީނުގެ ޣައްޒާގައި ވެރިކަންކުރާ ޙަމާސް ޖަމާޢަތުގެ ސިޔާސީ ގޮފީގެ ވެރިޔާ އިސްމާޢީލް ހަނިއްޔާގެ ޖަނާޒާ ބާއްވައިފިއެވެ. އޭނާގެ ކަށު ނަމާދު އިމާމުވެ ކުރައްވާފައި ވަނީ އީރާނުގެ ރޫހީ އެންމެ މަތީ ވެރިޔާ އާޔަތުالله ޢަލީ އަލް-ޚާމަންޢީއެވެ. ތަހްރާން ޔުނިވަރިސިޓީގައި ބޭއްވި ކަށު ނަމާދުގައި އެތަކެއް ހާސް ބަޔަކު ބައިވެރިވިއެވެ. ދުނިޔޭގެ އެކި ކޮންކޮޅުތަކުގައި ވެސް ހަނިއްޔާގެ ކަށު ނަމާދު ޣައިބަށް ކޮށްފައިވެއެވެ.
ކަށު ނަމާދުގެ މަންޒަރުތައް އީރާނުގެ ދަޢުލަތުގެ މީޑިޔާއިން ވަނީ ވަގުތުން ދުރަށް ދައްކާފައެވެ. ކަށު ނަމާދަށް ފަހު ހަނިއްޔާގެ ހަށިގަނޑު ފަސްދާނުލުމަށް އޭނާ ދިރިއުޅުއްވާ ޤަޠަރަށް ގެންދާނެއެވެ. ހަނިއްޔާ ޝަހީދު ކޮށްލުމުން ދުނިޔޭގެ އެކި ކަންކޮޅުތަކުގައި ދަނީ ހިތާމަ ފާޅު ކުރަމުންނެވެ. އެ ހިތާމައިގައި ބައިވެރިވުމަށް އެތަކެއް ސަތޭކަ ހާސް ބަޔަކު ވަނީ ތަހްރާންގެ މަގުތަކަށް ވެސް ނިކުމެފައެވެ. އޭގެ އިތުރުން, ޢަރަބި ދުނިޔެއާއި އިސްލާމީ ޤައުމުތަކުގައި އެތަކެއް ސަތޭކަ ހާސް ބަޔަކު ވަނީ މަގުތަކަށް އެއްވެ, ހަނިއްޔާ ޝަހީދު ކޮށްލަން ދިން ޙަމަލާ ކުށްވެރި ކޮށްފައެވެ.
"އަބޫ އަލް-ޢަބްދު އިސްމާޢީލް ހަނިއްޔާގެ ފުރާނައަށް ހެޔޮ ރަޙުމަތް މިިންވަރު ކުރައްވާށި. ޒަޔަނިސްޓު އިސްތިޢުމާރީ ދަޢުލަތާ ދެކޮޅަށް މި ޤައުމާއި, އެކްސިސް އޮފް ރެސިސްޓެންސްގައި ހިމެނޭ މުޖާހިދުންގެ ޖަމާޢަތްތަކާއި, ފަލަސްޠީނުގެ ރައްޔިތުންނާއި, ޙަމާސްގެ މުޖާހިދުން އެކަތިގަނޑެއްގެ ގޮތުގައި ޖިހާދު ކުރުން މަތީ ދެމި ތިބޭނެ،" ހަނިއްޔާގެ ޖަނާޒާގައި ވާހަކަފުޅު ދައްކަވަމުން ޙަމާސްގެ ނައިބު ޚަލީލް އަލް-ޙައްޔާ ވިދާޅުވިއެވެ.
އެކްސިސް އޮފް ރެސިސްޓެންސަކީ, ޔަހޫދީންނާއި އެ މީހުންގެ އެންމެ ބޮޑު މަދަދުގާރު, އެމެރިކާއާ ދެކޮޅަށް ހަތިޔާރު އުފުލާފައިވާ މުޖާހިދުންގެ ޖަމާޢަތްތަކާއި ހަތިޔާރު އެޅި ޖަމާޢަތްތަކުގެ މައްޗަށް އެކުލެވިގެންވާ ގުޅުމެކެވެ. މީގެ ހަތަރު އަހަރު ކުރިން އުފެދިގެން ދިޔަ އެ ގުޅުމަށް އީރާނުން ދަނީ އެހީތެރިކަން ފޯރުކޮށްދެމުންނެވެ. އެ ގުޅުމުގެ މައިގަނޑު އެއް މަޤުޞަދަކީ މެދުއިރުމަތީގެ ޤައުމުތަކަށް ބާރާއި ނުފޫޒު ފޯރުވަން ޔަހޫދީންނާއި އެމެރިކާއިން ކުރަމުންދާ މަސައްކަތްތަކަށް ހުރަސް އެޅުމެވެ.
ހަނިއްޔާ ޝަހީދު ކޮށްލާފައި ވަނީ ޔަހޫދީ ފައުޖުން ކަމަށް ޙަމާސްގެ އިތުރުން އީރާނާއި އެކްސިސް އޮފް ރެސިސްޓެންސްގައި ހިމެނޭ ޖަމާޢަތްތަކުން ގަބޫލު ކުރެއެވެ. ނަމަވެސް, އެ ކަން ކަށަވަރު ކޮށްދޭން ޔަހޫދީ ފައުޖުން ދަނީ ދެކޮޅު ހަދަމުންނެވެ. އެއް ސަބަބަކީ, ހަނިއްޔާ ޝަހީދު ކޮށްލާފައި ވަނީ އީރާނުގެ ސިޔާދަތީ މިނިވަން ކަމަށް އަރައިގަތުމަށް ފަހު ދީފައިވާ ޙަމަލާއެއްގައި ކަމަށް ވުމެވެ. އޭނާ ޝަހީދު ކޮށްލުމުން މުޖާހިދުންގެ ޖަމާޢަތްތަކުން ބަދަލު ހިފުމަށް ދީފާނެ ޙަމަލާއަކާ މެދު ވެސް ޔަހޫދީން ޖެހިލުންވެއެވެ.
ހަނިއްޔާ ޝަހީދު ކޮށްލާފައި ވަނީ އީރާނުގެ އައު ރައީސް މަސްޢޫދު ޕީޒިޝްކިޔާން ހުވައި ކުރެއްވުމަށް ބޭއްވި ރަސްމިއްޔާތުގައި ބައިވެރިވެ ވަޑައިގެންނެވުމަށް ތަހްރާނަށް ކުރެއްވި ދަތުރުފުޅުގައި, އޭނާ ހުންނެވި އިމާރާތަށް ދިން ވައިގެ ޙަމަލާއެއްގައެވެ. އެ ޙަމަލާގައި ހަނިއްޔާގެ ހަށިފާރަވެރިޔާ ވެސް ވަނީ ޝަހީދު ކޮށްލާފައެވެ. ހަނިއްޔާ ޝަހީދު ކޮށްލުމާ ގުޅިގެން, ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ސަރަޙައްދީ ހަނގުރާމައަކަށް ބަދަލުވެދާނެ ކަމުގެ ބިރު ވަނީ އިތުރުވެފައެވެ.
ހަނިއްޔާ ޝަހީދު ކޮށްލުމުން ބަދަލު ހިފާނެ ކަމުގެ އިންޒާރު ޚަމާސުން ވަނީ ދީފައެވެ. އަދި އީރާނުން ވެސް ބުނެފައި ވަނީ, އެ ޤައުމުގެ ފަސްގަނޑަށް ޙަމަލާދީ ހަނިއްޔާ ޝަހީދު ކޮށްލި ޙަމަލާގެ ބަދަލު ހިފާނެ ކަމުގައެވެ. ހަނިއްޔާ ޝަހީދު ކޮށްލުމުގެ ޙަމަލާގެ ޒިންމާ, ޔަހޫދީންގެ އެންމެ ބޮޑު މަދަދުގާރު, އެމެރިކާއިން އުފުލަން ޖެހޭނެ ކަމުގައި ވެސް އެ ޤައުމުން ބުންޏެވެ. ހަނިއްޔާ ޝަހީދު ކޮށްލުމާ ގުޅިގެން އީރާނުގައި ވަނީ ހިތާމަ ފާޅު ކުރުމުގެ ގޮތުން ތިން ދުވަސް އިޢުލާނު ކޮށްފައެވެ.
"ޔަހޫދީންނާ ދެކޮޅަށް ހަތިޔާރު އުފުލާފައިވާ ރެސިސްޓެންސްގެ ހުރިހާ ދިމާލަކުން ހަނިއްޔާ ޝަހީދު ކޮށްލި ޙަމަލާގެ ބަދަލު ހިފާނެ،" ޔަހޫދީންނަށް އިންޒާރު ދެއްވަމުން އީރާނުގެ ޤައުމީ ސަލާމަތާ ބެހޭ އެންމެ މަތީ މަޖިލީހުގެ ސެކްރެޓަރީ ޢަލީ އަކްބަރު އަޙްމަދިޔާން ވިދާޅުވިއެވެ.
ފަލަސްޠީނުގެ މުސްލިމުންގެ މައްޗަށް އިސްތިޢުމާރީ ވެރިކަމެއް ހިންގަމުންދާ ޔަހޫދީންނާ ދެކޮޅަށް ހަތިޔާރު އުފުލާފައިވާ މުޖާހިދުންގެ ޖަމާޢަތްތަކުގެ ތެރޭގައި ޙަމާސްގެ އިތުރުން ލުބްނާންގެ ޙިޒްބުالله ވެސް ހިމެނެއެވެ. އަދި, ޔަމަނުގެ ހަތިޔާރު އެޅި ޖަމާޢަތް, ޙޫޘީންނާއި ޢިރާޤާއި ސޫރިޔާގައި ހަރަކާތްތެރިވާ ހަތިޔާރު އެޅި ޖަމާޢަތްތައް ވެސް ހިމެނެއެވެ. ހަނިއްޔާ ޝަހީދު ކޮށްލުމުން މެދުއިރުމަތީގެ މަސްރަޙު އިތުރަށް ހޫނުވެފައިވާ ކަމުގައި މަސްރަޙު ދިރާސާ ކުރާ ފަރާތްތަކުން ގަބޫލު ކުރެއެވެ.