ހުޅުމާލޭގައި އިސްރަށްވެހިންގެ މަރުކަޒެއް މިމަހު ހުޅުވަނީ

އިސްރަށްވެހިންގެ އިތުރު މަރުކަޒެއް މިމަހު ހުޅުމާލޭގައި ޤާއިމްކުރުމަށް ތައްޔާރުވަމުންދާކަމަށް އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ވިދާޅުވެއްޖެއެވެ.

އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ވިދާޅުވީ މި މަރުކަޒު ޤާއިމްކުރާނީ ހުޅުމާލޭގެ ދެވަނަ ފިޔަވަހީގައިކަމަށެވެ.

އިސްރަށްވެހިންނަށް ބޭނުންވާ ޚިދުމަތްތައް ފުޅާ ދާއިރާއެއްގައި ލިބޭނެ މަގު ފަހިކޮށް، މުޖުތަމަޢުގައި އިސްރަށްވެހިންގެ ދައުރު ފުޅާކުރުމަކީ ރައީސުލްޖުމްހުރިއްޔާ ޑރ.މުޙައްމަދު މުޢިއްޒުގެ ވަޢުދުފުޅެކެވެ. މިގޮތުން އުތުރާއި މެދުރާއްޖޭގެ އިތުރުން ދެކުނުގައި އިސްރަށްވެހިންގެ މަރުކަޒު ޤާއިމުކުރުމަށް ވަނީ ނިންމަވަފައެވެ.

މިމަޝްރޫޢުގެ ދަށުން ހުޅުވި ފުރަތަމަ މަރުކަޒު ހުޅުވާފައިވަނީ މިދިޔަ ފެބްރުއަރީމަހުއެވެ. "އިސްރަށްވެހިންގެ ނާދީ"ގެ ނަމުގައި ޤާއިމްކޮށްފައިވަނީ މި މަރުކަޒު ހިންގަނީ ކީރިތި ޤުރުއާނާބެހޭ ޤައުމީ މަރުކަޒު ކުރިން ހިންގި ޢިމާރާތުގައެވެ.

ވޭތުވެދިޔަ ގާތްގަނޑަކަށް 5 މަސްދުވަހުގެ ތެރޭގައި އިސްރަށްވެހިންގެ ނާދީގައި ތަފާތު އެކި ޙަރަކާތްތައް އެކި މުވައްސަސާތަކާއި ގުޅިގެން އިންތިޒާމުކޮށް ވަނީ ހިންގާފައެވެ. އެގޮތުން ދީނީ ކަންކަމާއި ގުޅޭގޮތުން ހޭލުންތެރިކުރުވުމުގެ އެކި ޕްރޮގްރާމްތަކާއި ދުޅަހެޔޮ ދިރިއުޅުމުގެ އާދަތަކަށް އަހުލުވެރިކުރުވުމަށް އެކި ޖަމިއްޔާތަކާއި ގުޅިގެން ކަސްރަތާއި، ތެރަޕީތަކާއި، ކެއިންބުއިމުގެ އާދަކާދައާއި ގުޅޭ މަޢުލޫމާތުވެސް ފޯރުކޮށްދެއެވެ. މީގެއިތުރުން ނަފްސާނީ ދުޅަހެޔޮކަމަށް ޚާއްސަ އިސްކަމެއްދެވިގެން ގިނަ މަސައްކަތްތަކެއް ކުރެވިފައިވާކަންވެސް އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ފާހަގަކުރައްވައެވެ. ހަމައެއާއެކު ޢުމުރުން ދުވަސްވީ މީހުންނަށް ބައިވެރިވެވޭނެފަދަ ކުޅިވަރުތައް ކުޅެވޭނެ އިންތިޒާމުވެސް ނާދީގައި ވަނީ ހަމަޖައްސާފައެވެ.

މިފަދަ ޙަރަކާތްތައް ހަފްތާގެ އެކި ދުވަސްތަކުގައި ކުރިއަށްދާއިރު އިސް ރަށްވެހީންގެ ނާދީއަށް އޮތް ޑިމާންޑު އިތުރުވަމުންދާކަން އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ފާހަގަކުރައްވައެވެ. އެގޮތުން ހުޅުމާލެއާއި ވިލިމާލެއިންވެސް ބައެއް މީހުން އެތަނަށް ޒިޔާރަތްކުރާކަން އެވުޒާރާއިން ފާހަގަކުރައްވައެވެ. އެހެންކަމުން އިސްރަށްވެހިންނަށް ޚާއްސަ އިތުރު މަރުކަޒެއް ތަރައްޤީކުރުމުގެ މަސައްކަތް ސަރުކާރުން މިހާރު ވަނީ ފަށާފައެވެ. އެގޮތުން އެޗްޑީސީއާ ގުޅިގެން ހުޅުމާލެ ދެވަނަ ފިޔަވަހީގައި ހުންނަ ހިޔާގެ 8 ވަނަ ޓަވަރުގައި އިސްރަށްވެހިންގެ ނާދީއެއް ޤާއިމްކުރުމުގެ މަސައްކަތް ކުރަމުންދާކަމަށް އެ ވުޒާރާއިން ވިދާޅުވެއެވެ. އަދި މިމަހުގެ ތެރޭގައި އެތަނުގެ މަސައްކަތް ނިމި ބޭނުންކުރަން ފަށާނެކަމަށާއި، ހުޅުމާލޭގައި ތަރައްޤީކުރާ ނާދީގައިވެސް ކުރިއަށްގެންދާނީ މައިގަނޑުގޮތެއްގައި މާލޭގައިވެސް ކުރިއަށްގެންދާ ޙަރަކާތްތައްކަމަށް އިޖުތިމާޢީ އަދި ޢާއިލީ ތަރައްޤީއާބެހޭ ވުޒާރާއިން ވިދާޅުވެއެވެ.

ރާއްޖޭގެ އެކި ސަރަޙައްދުތަކުގައި އިސްރަށްވެހިންނަށް ޚާއްސަ މަރުކަޒުތައް ތަރައްޤީކުރުމަށް ސަރުކާރުން ދަނީ ގިނަ މަސައްކަތްތަކެއް ކުރަމުންނެވެ. ޝައުގުވެރިކަން ފާޅުކުރާ ރަށްރަށަށް އަމާޒުކޮށްގެން މިމަޝްރޫޢު ހިންގުމަށް ނިންމާފައިވާއިރު 5 އަތޮޅަކުން އެކަމަށް ޝައުގުވެރިކަން ފާޅުކޮށްފައިވާކަމަށް ސަރުކާރުން ވަނީ މީގެ ކުރިން ހާމަކުރައްވާފައެވެ. އެގޮތުން ދެކުނަށް ހާއްސަކުރާ "އިސްރަށްވެހިންގެ ހިޔާވަހި" އައްޑޫ ސިޓީ ފޭދޫގައި ޤާއިމްކުރުމަށް ސަރުކާރުން ވަނީ ނިންމަވާފައެވެ.

ދައުލަތުގެ އެކި މުވައްސަސާތަކާއި މަދަނީ ޖަމިއްޔާތަކާއި ގުޅިގެން އިސްރަށްވެހިންނަށް ޚާއްސަ އެކި ޕްރޮގްރާމްތައް ހިންގަމުންދާއިރު އޭގެ ސަބަބުން ގިނަގުނަ ފައިދާތަކެއް އެ ފަރާތްތަކަށް ލިބެމުންދާކަން އިޖުތިމާޢީ އަދި ޢާއިލީ ތަރައްޤީއާ ބެހޭ ވުޒާރާއިން ފާހަގަކުރައްވައެވެ. އެގޮތުން ނަފްސާނީ އެކި ނުތަނަވަސްކަން ކުރިމަތިވެފައިވާ ފަރާތްތަކުން އިސްރަށްވެހިންގެ ނާދީއަށް ޒިޔާރަތްކޮށް އެކި ހަރަކާތްތަކުގައި ބައިވެރިވުމުގެ ސަބަބުން އެކަމުގެ ހެޔޮ ބަދަލު ފެންނަމުންދާކަމަށް އެވުޒާރާއިން ވިދާޅުވެއެވެ.