ރަނގަޅު ފަރިތަކުރުންތަކާ އެކު ސަރަހައްދީ މުބާރާތްތަކުގެ ފައިނަލް ކުޅޭނެ ފެންވަރު އެބަހުރި: ޒީނިއާ
ރަނގަޅު ފަރިތަކުރުންތަކެއް ލިބިއްޖެ ނަމަ މި ސަރަހައްދުގެ ބީޗުވޮލީ މުބާރާތްތަކުގައި ފައިނަލް ކުޅޭނެ ފެންވަރު އެބަހުރި ކަމަށް ދާދިފަހުން ނިމުނު ކާވާ ބީޗުވޮލީ މުބާރާތުގެ ސެމީއަށް ދަތުރުކުރި ޕެއާގެ ކުޅުންތެރިއެއް ކަމަށްވާ ފާތިމަތު ޒީނިޔާ (ޒީ) ބުނެފިއެވެ.
ޒީނިއާ އާއި އާމިނަތު އަރީޝާ (އަރީ) ގެ ޕެއާއިން ވަނީ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ބީޗުވޮލީ މުބާރާތުގެ ސެމީ ފައިނަލަށް ދަތުރުކޮށްފައެވެ. މިއީ އަންހެން ބީޗުވޮލީގައި ރާއްޖޭގެ އަންހެން ޕެއާއެއް ހޯދި ބޮޑު ކާމިޔާބީއެކެވެ.
އަރީ އާއި ޒީނިޔާގެ ޕެއާ ސެމީ ފައިނަލުގައި ބަލިވީ އުޒްބެކިސްތާނުގެ ޕެއާ އަތުންނެވެ. އެގޮތުން ލޯ މެޑަލް މެޗުން ޒީނިޔާ އާއި އަރީގެ ޕެއާ ބަލިވީ އުޒްބެކިސްތާން އަތުން، 21-17، 23-21 އިންނެވެ. މި މެޗުގެ އިތުރުން މުޅި މުބާރާތުގައި ވެސް ދިވެހި އަންހެން ޕެއާތައް ވަނީ މޮޅު ކުޅުމެއް ކުޅެފައެވެ.
މުބާރާތަށްފަހު ޕީއެސްއެމް ސްޕޯޓްސްއާ ވާހަކަދައްކަމުން ޒީ ވަނީ މި މުބާރާތުގައި ކުރިމަތިލާން ޖެހުނު އުނދަގޫތައް ހިއްސާކޮށްފައެވެ. އަދި ތައްޔާރުވާން ވަގުތު ލިބުނުނަމަ މިއަށްވުރެ ރަނގަޅު ނަތީޖާއެއް ލިބޭނެކަމަށް ޒީ ގަބޫލުކުރެއެވެ.
އަރީ އާއި ޒީނިއާގެ އިތުރުން މި މުބާރާތުގައި ރާއްޖެއިން ދެން ވާދަކުރީ ހައްވާ ރާޝިދާ އާއި އައިޝަތު މާޖިދާގެ ޕެއާ އެވެ. ނަމަވެސް އެ ޕެއާ ވަނީ ކުއާޓާއިން ބަލިވެފައެވެ.