ސްރީ ލަންކާގެ ޤާނޫނު ހަދާ މަޖިލީހުގައި އެންމެ ގިނަ ދާއިރާ ތަމްސީލު ކުރާ ސްރީލަންކާ ޕުދުޖަނަ ޕެރަމުނަ (އެސްއެލްޕީޕީ)ގެ ރިޔާސީ ޓިކެޓް ނަމާލް ރާޖަޕަކްސަ ކާމިޔާބު ކުރައްވައިފިއެވެ. ނަމާލް ރިޔާސީ ޓިކެޓް ކާމިޔާބު ކުރެއްވީ އެސްއެލްޕީޕީގެ ތާޢީދު ހޯއްދަވަން ރައީސް ރަނިލް ވިކްރަމަސިންހަ ކުރެއްވި މަސައްކަތް ނާކާމިޔާބުކޮށްލުމަށް ފަހުއެވެ. އެއާއެކު ވިކްރަމަސިންހަ ވަނީ އެސްއެލްޕީޕީއާ ވަކިން އިންތިޚާބުގައި ވާދަކުރައްވާނެ ކަން އިޢުލާން ކުރައްވާފައެވެ.
ޢުމުރުން 38 އަހަރުގެ ނަމާލް ވަނީ ރާޖަޕަކްސަ ޢާއިލާގެ ދެވަނަ ވެރިކަމުގައި ކުޅިވަރާ ބެހޭ ވަޒީރުކަން ކުރައްވާފައެވެ. އެ ފަހަރު ވެރިކަމުގައި ހުންނެވީ ނަމާލްގެ ބޮޑުބޭބެ ގޮތަބަޔާ ރާޖަޕަކްސައެވެ. އަދި ބޮޑުވަޒީރުގެ މަޤާމުގައި ހުންނެވީ ނަމާލްގެ ބައްޕަ މަހިންދަ ރާޖަޕަކްސައެވެ. އެ ވެރިކަން ނިމުމަކަށް އައީ 2022ވަނަ އަހަރު ސްރީ ލަންކާއަށް ކުރިމަތިވި އިޤްތިޞާދީ ކާރިޡާގެ ސަބަބުން ދިމާވި ދަތި އުނދަގޫ ޙާލަތާ ގުޅިގެން ޢާންމުން ނުކުމެ ވެރިކަން ބަދަލުކުރުމުންނެވެ.
ރާޖަޕަކްސަ ޢާއިލާއަށް ވެރިކަން ގެއްލުނު ނަމަވެސް ސްރީ ލަންކާގެ ޤާނޫނު ހަދާ މަޖިލީހުގެ އަޣްލަބިއްޔަތު އޮތީ އެ ޢާއިލާގެ ނުފޫޒު އޮތް އެސްއެލްޕީޕީއަށެވެ. އަދި ވިކްރަމަސިންހަގެ ނިވަލުގައި ރާޖަޕަކްސަ ޢާއިލާއިން ދަނީ އެ ޤައުމުގެ ސަރުކާރަށް ވެސް ބޮޑެތި ނުފޫޒުތަކެއް ފޯރުވަމުންނެވެ.
ވިކްރަމަސިންހަގެ ޔުނައިޓެޑް ނޭޝަނަލް ޕާޓީ (ޔޫއެންޕީ)ން މަޖިލީހުުގައި ތަމްސީލު ކުރަނީ އެންމެ ގޮނޑިއެކެވެ. ނަމަވެސް އެސްއެލްޕީޕީގެ އެތެރޭގައި ވިކްރަމަސިންހައަށް އޮތް ތާޢީދެއް ވަކި ކުޑައެއް ނޫނެވެ. ސްރީ ލަންކާއަށް ކުރިމަތިވި އިޤްތިޞާދީ ކާރިޡާއިން އަރައިގަތުމަށް ވިކްރަމަސިންހަ އެޅުއްވި ހަރުދަނާ ފިޔަވަޅިތަކުގެ ސަބަބުން އޭނާއަށް އޮތް ތާޢީދު ބޮޑެވެ. އޭނާ މިހާރު މަސައްކަތް ކުރައްވަނީ އެހެން ޕާޓީތަކާއި ސިޔާސީވެރިންގެ ތާޢީދާއެކު އިންތިޚާބު ކާމިޔާބު ކުރެއްވުމަށެވެ.
ޢުމުރުން 75 އަހަރުގެ ވިކްރަމަސިންހަ ވަނީ މީގެ ކުރިން ދެ ފަހަރެއްގެ މަތިން ރިޔާސީ އިންތިޚާބުގައި ވާދަކުރައްވާފައެވެ. ނަމަވެސް އެ ދެ ފަހަރު ވެސް އޭނާއަށް އިންތިޚާބު ކާމިޔާބެއް ނުކުރެއްވުނެވެ. 1977ވަނަ އަހަރު ޤާނޫނު ހަދާ މަޖިލީހުގެ މެންބަރަށް އިންތިޚާބުވެވަޑައިގަތް ވިކްރަމަސިންހަ ވަނީ ހަ ފަހަރެއްގެ މަތިން ސްރީ ލަންކާގެ ބޮޑުވަޒީރުކަން ކުރައްވާފައެވެ.
ސްރީ ލަންކާގެ ރިޔާސީ އިންތިޚާބުގައި ވާދަކުރި ތިން ފަހަރު ވެސް ރާޖަޕަކްސަ ޢާއިލާއިން ވަނީ ބޮޑު ކާމިޔާބީއެއް ހޯދާފައެވެ. އެ ގޮތުން މަހިންދަ ވަނީ ދެ ފަހަރެއްގެ މަތިން ރިޔާސީ އިންތިޚާބު ކުރައްވާފައެވެ. އަދި އޭގެ ފަހުން އޭނާގެ ކޮއްކޮގެ ރިޔާސަތުގައި މަހިންދަ ވަނީ އެ ޤައުމުގެ ބޮޑުވަޒީރުކަން ވެސް ކުރައްވާފައެވެ.
ސްރީ ލަންކާގެ ރިޔާސީ އިންތިޚާބު ބާއްވަން ތާވަލުކޮށްފައި ވަނީ ސެޕްޓެންބަރު މަހުގެ 21ވަނަ ދުވަހުއެވެ. އެ ޤައުމުގެ އިންތިޚާބުތަކާ ބެހޭ އިދާރާއިން އިޢުލާނު ކޮށްފައިވާ ގޮތުގައި, ރިޔާސީ އިންތިޚާބުގައި ވާދަ ކުރުމަށް ކެނޑިޑެސީ ފޯމު ހުށަހެޅުމުގެ ސުންގަޑިއަކީ އޮގަސްޓު 15އެވެ. އެ އިންތިޚާބުގައި, 22 މިލިޔަން މީހުންގެ އާބާދީއެއް އޮތް ސްރީލަންކާގެ 17 މިލިޔަން މީހުންނަށް ވޯޓުލުމުގެ ޙައްޤު ލިބިގެންވެއެވެ.