ފާއިތުވި ހަފުތާއެއްހާ ދުވަހު ޔަމަނަށް ބޯކޮށް ވާރޭވެހި 40 މީހުން މަރުވެ އިތުރު ފަސް މީހުން ގެއްލިއްޖެއެވެ.
ޔަމަނަށް ކުރި ވިއްސާރާގައި އެންމެ ބޮޑު ގެއްލުމެއް ލިބިފައި ވަނީ ޙުދަޔިދާ ޕްރޮވިންސަށެވެ. އެއީ ޙޫޘީ ޖަމާޢަތުގެ ބާރުގެ ދަށުގައި އޮންނަ ޔަމަނުގެ މުޙިއްމު ސަރަހައްދެކެވެ. ޚޫޘީން ބުނީ ޙުދަޔިދާ ވާރޭ ވެހުމުގެ ސަބަބުން އެ ޕްރޮވިންސްގައި ވަރަށް ބޮޑަށް ފެންބޮޑުވެ 500 ގެއަކުން މީހުން ބަދަލުކުރަން ޖެހުނު ކަމަށެވެ. އަދި ޙުދަޔިދާގެ ފެންބޮޑުވުމުގެ ސަބަބުން މަގުތަކަށް ގެއްލުންވެ ފަތުރުފަތުރު ކުރުމަށް އުނދަގޫވެ އުޅަނދުތަކަށް ގެއްލުންވެފައިވާ ކަމަށް ވެސް އެ ޖަމާޢަތުން ބުނެފައިވެއެވެ. އެ ޖަމާޢަތުން މިހާރު ދަނީ ވިއްސާރައިގެ ސަބަބުން ޙާލުގައި ޖެހިފައިވާ ޢާއިލާތަކަށް އެހީތެރިކަން ފޯރުކޮށްދިނުމުގެ މަސައްކަތް ކުރަމުންނެވެ.
ވިއްސާރާގައި ޔަމަނުގެ ޙުދަޔިދާ ބަނދަރަށް ވެސް ވަނީ ގެއްލުންތަކެއް ލިބިފައެވެ. އެއީ ދާދިފަހުން ޔަހޫދީ އިސްތިޢުމާރީ ފައުޖުން ވައިގެ ޙަމަލާތަކެއް ދީފައިވާ ބަނދަރެކެވެ. އެ ޙަމަލާގައި 87 މީހުން ޒަޚަމުވެ ބަނދަރަށް ގެއްލުންތަކެއް ލިބިފައިވެއެވެ.