މިހާރު ކުރިއަށްދާ އޮލިމްޕިކްސްގެ ފިރިހެނުންގެ ފުޓްބޯޅައިގެ ބްރޯންޒް މެޑެލް މޮރޮކޯ އިން ހާސިލްކޮށްފިއެވެ.
އެފްރިކާގެ ދެ ޓީމު ކަމަށްވާ، މޮރޮކޯ އާއި މިސްރުގެ ކުރިމަތިލުމުގައި މޮރޮކޯ އިން ވަނީ 6-0 ގެ ބޮޑު ތަފާތަކުން މެޗު ކާމިޔާބުކޮށްފައެވެ.
ނަންޓެސްގައި ހުންނަ ލުއީސް ފޮންޓެނެއު ސްޓޭޑިއަމްގައި ރޭ ކުޅުނު މި މެޗުގައި މޮރޮކޯ އިން ޖެހި ހަ ލަނޑުގެ ތެރެއިން އެ ޓީމުގެ ފޯވާޑް، ސޫފިއާން ރަހީމީ ދެ ގޯލްޖެހިއެވެ. އެގޮތުން، މި މެޗުގެ ފުރަތަމަ ހާފުގައި އެ ޓީމުން ދެ ގޯލް ކާމިޔާބުކުރިއިރު، އަނެއް ހަތަރު ލަނޑުޖެހީ ފަހު ހާފުގައެވެ.
ރޭގެ މެޗުގައި މޮރޮކޯ އިން ލީޑްނެގީ 23 ވަނަ މިނެޓުގައި އަބްދެ އެޒްޒަލްޒޫލީ ކާމިޔާބުކުރި ގޯލުންނެވެ. އޭގެ ތިން މިނެޓުފަހުން އެ ޓީމުގެ ދެވަނަ ލަނޑުޖަހައިދިނީ ރަހީމީ އެވެ. އޭގެފަހުން، ދެވަނަ ހާފުގެ ކުރީކޮޅު، ބިލާލް އެލް ޚާންނޫސް އާއި ރަހީމީގެ އިތުރު ގޯލާއެކު މޮރޮކޯ އިން ހަތަރު ލަނޑުގެ ލީޑެއްނެގިއެވެ.
އަދި އޭގެފަހުން، މެޗުގެ 73 ވަނަ މިނެޓުގައި އަކްރަމް ނަކަޝް އާއި މެޗު ނިމެން ތިން މިނެޓަށްވެފައިވަނިކޮށް އަޝްރަފް ހަކީމީ ވައްދާލި ލަނޑާއެކު މޮރޮކޯ އިން ވަނީ ފުރިހަމަ މޮޅެއް ހާސިލްކޮށްފައެވެ.
މި ފަހަރުގެ އޮލިމްޕިކްސްގެ ފިރިހެނުންގެ ފުޓްބޯޅައިގެ ފައިނަލް މެޗު ކުޅުމަށް ހަމަޖެހިފައިވަނީ މިރޭ ރާއްޖޭގަޑިން ނުވައެއް ޖަހާއިރު އެވެ. މި މެޗުގައި ބައްދަލުކުރާނީ ފްރާންސާއި ސްޕެއިނެވެ.