ކުރިމަގުގައި ހޯރަފުށި ވެގެންދާނީ މެރިޓައިމްގެ ހަބަކަށް: ވަޖީހު

އުތުރުގައި މެރިޓައިމް ސިނާއަތް ފުޅާވެގެންދާއިރު، ހއ.ހޯރަފުށި ވެގެންދާނީ މެރިޓައިމްގެ ހަބަކަށް ކަމަށް މޯލްޑިވްސް ޕޯޓްސް ލިމިޓެޑް، އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވެއްޖެއެވެ.

ސަރުކާރުން ދަނީ ރާއްޖޭގައި މެރިޓައިމް ސިނާއަތް ތަރައްޤީކުރުމަށް މަސައްކަތްކުރަމުންނެވެ.
މެރިޓައިމްގެ ސިނާއަތް ތަރައްޤީކުރުމަށް ކުރަމުންދާ މަސައްކަތްތަކާ ގުޅޭގޮތުން ޕީއެސްއެމް ނިއުސްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން މޯލްޑިވްސް ޕޯޓްސް ލިމިޑެޓު، އެމްޕީއެލްގެ ސީއީއޯ މުޙައްމަދު ވަޖީހު އިބްރާހިމް ވިދާޅުވީ ހއ.ހޯރަފުށީ ފަޅު ހިއްކައިގެން ތެޔޮ ޓަރމިނަލަކާއި ކޮންޓެއިނަރ ޓަރމިނަލްގެ އިތުރުން ފްރީ ޒޯނެއްވެސް ތަރައްޤީކުރުމަށް ނިންމާފައިވާ ކަމަށެވެ.

ވަޖީހު ވިދާޅުވީ ކަމާ ގުޅޭ ކޮންސެޕްޓްވެސް މިހާރު ތައްޔާރުކޮށް ނިމިފައިވާ ކަމަށެވެ.

"ހއ. އަތޮޅުގެ އެ އޭރިޔާ އޮންނަންވާ ގޮތުގެ ކުރެހުންވެސް މިހާރު ތައްޔާރުކޮށް ނިމިފައިވަނީ މިކަމުގެ މަސައްކަތް މިހާރު ކުރުމަށްޓަކައި، އެކި އެކި ލެވެލްގައި ވާހަކަ އެބަދެކެވޭ، ރައީސް ޑރ. މުޢިއްޒުގެ ވެރިކަމުގެ މި 5 އަހަރުތެރޭ މިކަން ކުރާނަން،" ވަޖީހު ވިދާޅުވިއެވެ.

ވަޖީހު ވިދާޅުވީ މިމަސައްކަތްތާއެކު ހއ. އަތޮޅަށް އިންގިލާބީ ބަދަލުތަކެއް އަންނާނެ ކަމަށެވެ. އަދި މުޅި ޤައުމުގެ އިޤްތިސާދަށްވެސް މިކަމުގެ ފައިދާ ކުރާނެ ކަމަށް ވަޖީހު ވިދާޅުވިއެވެ.

"މިއީ އެތައްހާސް ރައްޔިތުންނަށް ލިބޭ ވަޒީފާގެ ފުރުސަތުތަކެއް، އިޤްތިސާދީގޮތުން މިލިބޭ ވަޒީފާގެ އިތުރަށް، ޑޮލަރު އިތުރުވެ، އިޤްތިސާދީގޮތުން ކުރިއެރުންތައް ލިބިގެންދާނެ،" ވަޖީހު ވިދާޅުވިއެވެ.

އުތުރުގައި އިންޓަރނޭޝަނަލް ބަންކަރިންގެ ޚިދުމަތް މިމަހުގެ 22 ވަނަ ދުވަހު ފެށުމަށް ސަރުކާރުން ދަނީ ތައްޔާރުވަމުންނެވެ. އުތުރުގައި ބަންކަރިންގ ޚިދުމަތް ފެށުމަށްޓަކައި 4000 ޓަނުގެ ތެޔޮ އުފުލޭ 2 އުޅަނދު ގެނައުމަށްވަނީ ހަމަޖެހިފައެވެ.

ރާއްޖޭގައި ބަންކަރިންގެ ޚިދުމަތް ދިނުމަށްޓަކައި އެސްޓީއޯން ވަނީ ދުނިޔޭގެ މަޤުބޫލު މުދާ އުފުލާ އަދި ޝިޕިންގެ މަސައްކަތްތައް ކުރިއަށްދާ އެކި ސަރަޙައްދުތަކުގައި ބޯޓުފަހަރަށް ތެޔޮ ފޯރުކޮށްދިނުމުގެ ޚިދުމަތް ފުޅާ ދާއިރާއެއްގައި ދެމުން އަންނަ، ވިޓޯލް ބަންކާސްއާއެކު ޓާރމް ޝީޓުގައި ސޮއިކޮށްފައެވެ.

ސަރުކާރުން މިމަޝްރޫޢު ކުރިއަށްގެންދަނީ 2 ފިޔަވައްސަކަށް ބަހާލައިގެންނެވެ. ފުރަތަމަ ފިޔަވައްސަކީ އޮފް-ޕޯޓް ބަންކަރިންއެވެ. މިޚިދުމަތް ދިނުމަށް ފިޒިކަލް އިންފްރާސްޓަރަކްޗަރ ބޭނުންނުވާނެއެވެ. ސަބަބަކީ ރާއްޖެއަކީ ޖަޒީރާ ވަށައިގެން ކަނޑު އޮތް ޤައުމަކަށް ވާތީއެވެ. ފުރަތަމަ ފިޔަވަހީގައި ބޯޓުތަކަށް ތެޔޮ އެޅުމުގެ ޚިދުމަތް ފޯރުކޮށްދޭނީ އަތޮޅުތަކަށް މަޑުކޮށްގެންނެވެ.

2 ވަނަ ފިޔަވަހީގައި ޕޯޓެއް ތަރައްޤީކުރުން ހިމެނެއެވެ. މިޕޯޓު ތަރައްޤީކުރާނީ ބޭނުންވާނެ އެހެން ހުރިހާ ޚިދުމަތްތަކާ އެކުގައިކަމަށް ސަރުކާރުން ވިދާޅުވެއެވެ.