ތައިލެންޑުގެ ކުރީގެ ބޮޑުވަޒީރު ތަކްސިން ޗިނަވާތްގެ ޖަލު ޙުކުމް މަޢާފު ކޮށްދީ, އޭނާ މިނިވަން ކޮށްފިއެވެ. 74 އަހަރުގެ މަހުޖަނު, ތަކްސިނަށް ރަސްގެފާނު މަހާ ވަޖިރާލޮންގކޯން މަޢާފު ދެއްވާފައިވާ ކަން އިޢުލާނު ކުރައްވާފައި ވަނީ ތަކްސިންގެ ޤާނޫނީ ވަކީލެވެ. މަޢާފު ދިނުމާ އެކު ޕެރޯލްގެ ދަށުން މި ވަގުތު މިނިވަން ކޮށްފައި ހުންނެވި ތަކްސިންގެ ޕެރޯލްގެ މުއްދަތު ވަނީ ދެ ހަފުތާއަށް ކުރުވެފައެވެ.
ތަކްސިންގެ ޖަލު ހުކުމް މަޢާފު ކޮށްދީފައި މި ވަނީ, ތައިލެންޑުގެ އައު ބޮޑުވަޒީރު ކަމުގެ މަޤާމަށް އޭނާގެ އަންހެން ދަރިކަނބަލުން ޕޭޓޮންގޓާން ޗިނަވާތު އިންތިޚާބު ކުރިތާ އެއް ދުވަސް ފަހުންނެވެ. ތަކްސިންގެ ޤާނޫނީ ވަކީލު ވިންޔަތީ މާތުކޮންތްރީ ވިދާޅުވީ ތަކްސިނަށް މަޢާފު ދެއްވާފައި ވަނީ ރަސްގެފާނުގެ އުފަން ދުވަހުގެ މުނާސަބަތުގައި ކަމުގައެވެ.
ފާއިތުވި ދެ ދަހަރެއްހާ ދުވަސް ތަކްސިން ހޭދަ ކުރައްވާފައި ވަނީ, އޭނާގެ ޗިނަވާތް ޢާއިލާއާއި ތައިލެންޑުގެ ޝާހީ ޢާއިލާތަކާއި އަސްކަރިއްޔާގެ އިސް ޖެނެރަލުންގެ މެދުގައި އުފެދިފައި އޮތް ބޮޑު ހައިޖާނުގަނޑެއްގެ ތެރޭގައެވެ. ޝާހީ ޢާއިލާތަކާއި އަސްކަރިއްޔާގެ އިސް ޖެނެރަލުން ދަނީ ސަރުކާރުތަކާއި ދަޢުލަތުގެ މުވައްސަސާތަކަށް ބާރާއި ނުފޫޒު ފޯރުވަމުންނެވެ.
އަސްކަރިއްޔާއިން 2006ވަނަ އަހަރު ބަޣާވާތްކޮށް ތަކްސިންގެ ސަރުކާރު ވައްޓައިލުމުން އޭނާ ވަނީ ފިއްލަވައިގެން ޤައުމު ދޫކޮށް ވަޑައިގަންނަވާފައެވެ. އަދި, 15 އަހަރު ދުވަހު އަމިއްލައަށް އަރުވައިލެވިގެން ބޭރު ޤައުމެއްގައި ދިރިއުޅުއްވުމަށް ފަހު ތަކްސިން އެނބުރި ޤައުމަށް ވަޑައިގަންނަވާފައި ވަނީ 2023ވަނަ އަހަރުގެ އޮގަސްޓު މަހުއެވެ. އޭނާ އެނބުރި ވަޑައިގަންނަވާފައި ވަނީ އޭނާގެ ފިޔު ތައި ޕާޓީއަށް ވެރިކަން ލިބުމުންނެވެ.
ނަމަވެސް, ޤައުމަށް އެނބުރި ވަޑައިގަތުމުން, 2001ވަނަ އަހަރުން ފެށިގެން 2006ވަނަ އަހަރާ ދެމެދު އޭނާގެ ވެރިކަމުގައި ހިންގާފައިވާ ކުށްތަކާ ގުޅިގެން އިއްވާފައިވާ ޖަލު ޙުކުމާ ތަކްސިނަށް ކުރިމަތިލައްވަން ޖެހިވަޑައިގަތެވެ. މަޤާމުގެ ބާރު ނަހަމަ ގޮތުގައި ބޭނުން ކުރައްވައި އަމިއްލަ މަންފާ ހޯއްދެވުމުގެ ކުށް ސާބިތުވެ, އޭނާއާ ދެކޮޅަށް އަށް އަހަރު ދުވަހުގެ ޖަލު ހުކުމެއް އޮތީ އިއްވާފައެވެ.
ނަމަވެސް, ރަސްގެފާނު މަހާ ވަނީ ތަކްސިންގެ މައްޗަށް އިއްވާފައިވާ ޖަލު ޙުކުމް އެއް އަހަރު ދުވަހުގެ މުއްދަތަކަށް ކުރު ކޮށްދެއްވާފައެވެ. އަދި, ޞިއްޙީ ހާލުކޮޅު ހުރި ގޮތުން ފާއިތުވި ހަ މަސް ދުވަސް އޭނާ ހޭދަ ކުރައްވާފައި ވަނީ ހަސްފަތާލުގައެވެ. ޕެރޯލްގެ ދަށުން އޭނާ މިނިވަން ކޮށްފައި ވަނީ ފެބުރުވަރީ މަހުއެވެ.
ތައިލެންޑުގެ ބޮޑުވަޒީރު ކަމުގެ މަޤާމަށް ތަކްސިންގެ ދަރިކަނބަލުން ޕޭޓޮންގޓާން އިންތިޚާބު ކޮށްފައި ވަނީ, އެ މަޤާމުގައި ހުންނެވި ފިޔު ތައި ޕާޓީގެ ސެއްތާ ތަވީސިން ޤާނޫނުއަސާސީއާ ޚިލާފުވެފައިވާ ކަމަށް ކަނޑައަޅައި އެ މަޤާމުން ދުރު ކުރުމުންނެވެ. ބޮޑުވަޒީރު ކަމުގެ މަޤާމުން ސެއްތާ ދުރު ކޮށްފައި ވަނީ ތައިލެންޑުގެ ދުސްތޫރީ ކޯޓުންނެވެ. އޭނާ މަޤާމުން ދުރު ކޮށްފައި ވަނީ, ޤާނޫނު އަސާސީގައި ބަޔާން ކޮށްފައިވާ ޝަރުޠުތައް ފުރިހަމަ ނުވާ, އަދި އަޚުލާޤީ މިންގަނޑުތަކަށް ނުފެތޭ ބޭފުޅަކު އޭނާގެ ކެބިނެޓަށް ޢައްޔަން ކުރެއްވުމުގެ ކުށް ސާބިތުވާ ކަމަށް ކަނޑައަޅައެވެ.
37 އަހަރުގެ ޕޭޓޮންގޓާނަކީ ތައިލެންޑުގެ ބޮޑުވަޒީރު ކަމުގެ މަޤާމަށް އިންތިޚާބު ކޮށްފައިވާ ދެވަނަ އަންހެން ބޭފުޅާއެވެ. އަދި, ބޮޑުވަޒީރު ކަމުގެ މަސްއޫލިއްޔަތުތަކާ ހަވާލުވެ ވަޑައިގަންނަވާ އެންމެ ޒުވާން ބޭފުޅާއެވެ. އޭނާއަކީ, އެ މަޤާމު އަދާ ކުރައްވާ ޗިނަވާތު ޢާއިލާގެ ތިންވަނަ ބޭފުޅާއެވެ. އޭނާގެ ކުރިން އެ މަޤާމު ފުރުއްވާފައިވާ ބޭފުޅުންގެ ތެރޭގައި ބައްޕާފުޅު ތަކްސިނާއި ބޮޑުދައިތާފުޅު ޔިންގލަކް ޗިނަވާތު ހިމެނި ވަޑައިގަންނަވައެވެ. ޔިންގލަކް ވެރިކަން ކުރައްވާފައި ވަނީ 2011ވަނަ އަހަރުން ފެށިގެން 2014ވަނަ އަހަރާ ދެމެދުގައެވެ.