އިމާރާތްކުރުމުގެ ދާއިރާއަށް ބޭންކުތަކުން ދޫކުރާ ލޯނުތައް 6 އިންސައްތަ އިތުރު: ޖަނާހް

އިމާރާތްކުރުމުގެ ދާއިރާއަށް ވިޔަފާރި ބޭންކުތަކުން ދޫކުރާ ލޯނުތައް މިއަހަރު 6 އިންސައްތަ އިތުރުކަމަށް މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީގެ ރައީސް މުހައްމަދު އަލީ ޖަނާހް ވިދާޅުވެއްޖެއެވެ.

ޖަނާހް މިހެން ވިދާޅުވީ އިމާރާތް ކުރުމުގެ ސިނާއަތާއި ގުޅޭގޮތުން މަޝްވަރާކުރުމަށް ބާއްވާ ކޮންސްޓްރަކްޝަން ފޯރަމް ފެށުމުގެ ރަސްމިއްޔާތުގައި ވާހަކަދައްކަމުންނެއެވެ.

ކޮންސްޓްރަކްޝަން ފޯރަމް ފެށުމުގެ ރަސްމިއްޔާތުގައި ވާހަކަދައްކަވަމުން، މޯލްޑިވްސް ނޭޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (މަސީ) ގެ ރައީސް މުޙައްމަދު ޢަލީ ޖަނާޙް ވިދާޅުވީ، އިމާރާތްކުރުމުގެ ސިނާއަތަކީ ޤައުމުގެ އިޤްތިޞާދީ ކުރިއެރުމާއި ތަރައްޤީގައި އަސާސީ ދައުރެއް އަދާކުރާ ސިނާއަތެއް ކަމަށެވެ.

އެ ގޮތުން، 2024 ވަނަ އަހަރުގެ ފުރަތަމަ ކުއާޓަރގައި މިދާއިރާއަށް ފާހަގަކޮށްލެވޭ ކުރިއެރުންތަކެއް ލިބިފައިވާކަމަށް ވިދާޅުވިއެވެ. ޖަނާހް ވިދާޅުވީ ޚާއްޞަކޮށް އިމާރާތްކުރުމުގެ ދާއިރާއަށް ވިޔަފާރި ބޭންކުތަކުން ދޫކުރާ ލޯނުތައް 6 އިންސައްތައިން އިތުރުވެފައިވާކަމަށެވެ. މިއީ މި ދާއިރާގެ ކުރިމަގު އުޖާލާވާ ކަމުގެ ހެއްކެއްކަމަށް ޖަނާހް ވިދާޅުވިއެވެ.

"ކުރިއެރުމާއެކު، އިޤްތިޞާދީ ގޮންޖެހުންތަކާވެސް ކުރިމަތިލާން ޖެހިފައިވޭ. ކްރެޑިޓް ފެސިލިޓީތައް އިތުރުވެފައިވީ ނަމަވެސް، ޞިނާޢީ ދާއިރާގެ ޖުމްލަ ޙަރަކާތްތައް ވަނީ މަޑުޖެހިފައި. ވޭތުވެދިޔަ ކުއާޓަރގައި މިދާއިރާގެ ހަރަކާތްތައް 9 އިންސައްތައިން ދަށްވެފައިވޭ" ޖަނާހް ވިދާޅުވިއެވެ.

ޖަނާޙް ވިދާޅުވީ، އިމާރާތްކުރުމުގެ ދާއިރާ ކުރިއެރުވުމަށް ގިނަ މަސައްކަތްތަކެއް ކުރަންޖެހޭ ކަމަށެވެ. އަދި މިއީ އެއްވެސް ފަރާތަކުން އެކަނި ކުރެވޭނެ ކަމެއް ނޫންކަން ފާހަގަކުރައްވަމުން، ޖަނާޙް ވިދާޅުވީ މިއީ އިމާރާތްކުރުމުގެ ދާއިރާގެ މާހިރުންނާއި ސަރުކާރާ ގުޅިގެން ކުރަންޖެހޭ މަސައްކަތެއް ކަމަށެވެ.

އެހެންކަމުން، އިމާރާތްކުރުމުގެ ދާއިރާގައި ހުރި ގޮންޖެހުންތަކާ ގުޅޭގޮތުން ސަރުކާރާއި ކަމާބެހޭ އެހެނިހެން ފަރާތްތަކާ ގުޅިގެން އެކަށީގެންވާ ޙައްލުތަކެއް ހޯދަންޖެހޭކަން ޖަނާޙް ފާހަގަކުރެއްވިއެވެ. ޖަނާހް ވިދާޅުވީ އިމާރާތް ކުރުމުގެ ދާއިރާއަށް ދިމާވެފައި އޮތް އެންމެ ބޮޑު އެއް ގޮންޖެހުމަކީ މަސައްކަތްތެރިންގެ ދަތިކަންކަމަށެވެ.

އިމާރާތްކުރުމުގެ ސިނާއަތަކީ ފަންނީ ގިނަ ދާއިރާތަކުން ޚާއްޞަ ހުނަރުވެރިން ބޭނުންވާ ދާއިރާއެއް ކަމަށާއި މިސިނާއަތުގައި ހަމައެކަނި ޓެކްނިކަލް މާހިރުން ހޯދުމުގެ އިތުރުން އާންމު މަސައްކަތްތެރިން ހޯދުމުގައިވެސް ގިނަ ގޮންޖެހުންތަކާ ކުރިމަތިލާންޖެހޭކަމަށް ވިދާޅުވިއެވެ.

ކޮންސްޓްރަކްޝަން ފޯރަމަކީ ރާއްޖޭގެ އިމާރާތްކުރުމުގެ ސިނާއަތައް ދިމާވެފައިވާ މައްސަލަތަކާއި މެދު މަޝްވަރާކޮށް އެކަންކަން ހައްލުކުރުމަށް ކުރެވިދާނެ ކަންކަން ދެނެގަތުމަށް ބާއްވާ ފޯރަމެކެވެ. މިއީ މިފޯރަމް ބާއްވާ 2 ވަނަ ފަހަރެވެ. މިފޯރަމްގައި މުހިންމު 4 ދާއިރާއަކުން މަޝްވަރާކުރާނެއެވެ.

މިފޯރަމްގައި އިމާރާތްކުރުމުގެ ސިނާއަތުގައި ހަރަކާތްތެރިވާ ސަރުކާރާއި އަމިއްލަ ފަރާތްތަކުންވެސް ބައިވެރިވެއެވެ. 80 އަށްވުރެ ގިނަ ފަރާތުން މި ކޮންފަރެންސްގައި ބައިވެރިވާއިރު ރާއްޖެއިން ބޭރުގެ ފަރާތްތައްވެސް މީގެތެރޭގައި ހިމެނެއެވެ.

އިމާރާތްކުރުމުގެ ސިނާއަތަކީ ރާއްޖޭގެ އިޤްތިޞާދުގައި 2 ވަނައަށް އެންމެ ބޮޑު ސިނާއަތެވެ. އަދި މި ސިނާއަތުގައި ގިނަ އަދަދެއްގެ މުވައްޒަފުން ދަނީ މަސައްކަތްކުރަމުންނެވެ. އިމާރާތްކުރުމުގެ ސިނާއަތަށް އިތުރުވަމުންދާ އެކިއެކި ޕްރޮޖެކްޓްތަކާއެކު މި ސިނާއަތް ދަނީ އިތުރަށް ފުޅާވަމުންނެވެ.