މިހާތަނަށް ދުނިޔެއިން ފެނުނު އެންމެ ބޮޑު އެއް ޑައިމަންޑް ބޮޓްސްވާނާއިން ނަގައިފި

މިހާތަނަށް ދުނިޔެއިން ފެނުނު ދެވަނައަށް އެންމެ ބޮޑު ޑައިމަންޑް އެފްރިކާގެ ޤައުމެއްކަމަށްވާ ބޮޓްސްވާނާއިން ހޯދައިފިއެވެ.

2492 ކެރެޓްގެ މި ޑައިމަންޑް ފެނުނީ ބޮޓްސްވާނާގެ ވެރިރަށް ގާބޮރޯންގެ އުތުރުން އޮންނަ ކަރޯވޭ ނަމަކަށް ކިޔާ މައިނަކުންނެެވެ. މިއީ ކެނެޑާގެ ލުކާރާ ޑައިމަންޑް ނަމަކަށް ކުންފުންޏަކުން ހިންގާ މައިނެކެވެ.

ބޮޓްސްވާނާގެ ސަރުކާރުން ބުނާގޮތުން މިއީ އެފްރިކާގެ ދެކުނު ސަރަހައްދަކުން ފެނުނު އެންމެ ބޮޑު ޑައިމަންޑެވެ. މި ޑައިމަންޑުގެ އަގެއް ނުވަތަ އޭގެ ކޮލިޓީއާ ގުޅޭގޮތުން އެއްވެސް މައުލޫމާތެއް ކަމާބެހޭ ފަރާތްތަކުން ހާމަކޮށްފައެއް ނުވެއެވެ. ނަމަވެސް މިިކަމާއި ގުޅޭ މައުލޫމާތު އެނގޭ ތަޖުރިބާކާރުން ބުނާގޮތުން މި ޑައިމަންޑްގެ އަގު 40 މިލިއަން ޑޮލަރަށް އަރާނެއެވެ.

މިފަަަހަރު ފެނުނު ޑައިމަންޑުގައި 2492 ކެރެޓްހުރިއިރު، މީގެކުރިން އެ ޤައުމުން ފެނުނު އެންމެ ބޮޑު ޑައިމަންޑަކީ 2019 ވަނަ އަހަރު 1758 ކެރެޓްގެ ޑައިމަންޑެކެވެ. އެ ޑައިމަންޑްވެސް ނަގާފައިވަނީ މިފަހަރުވެސް ޑައިމަންޑް ފެނުނު ކަރޯވޭ މައިނުންނެވެ.

ޑައިމަންޑް ނެގި ކުންފުނިން ބުނާގޮތުން މި ޑައިމަންޑް ހޯދީ ޒަމާނީ އެކްސްރޭ ޓެކްނޮލޮޖީއެއް ބޭނުންކޮށްގެންކަމަށެވެ. މި ޓެކްނޮލޮޖީގެ ސަބަބުން އެއްވެސް ގެއްލުމެއް ނުލިބި ޑައިމަންޑް ނެގުމަށް މަގުފަހިވާކަމަށް އެ ކުންފުނިން ބުނެއެވެ.

ބޮޓްސްވާނާއަކީ ދުނިޔޭގައި އެންމެ ގިނައިން ޑައިމަންޑް ނަގާ އެއް ޤައުމަށްވާއިރު، ދުނިޔޭގައި ނަގާ ޑައިމަންޑްތަކުގެ 20 އިންސައްތަ އަންނަނީ އެ ޤައުމުންނެވެ. ނަމަވެސް ޑައިމަންޑްތައް ނަގާ މައިންތަކުގެ ހިއްސާ އޮންނަނީ ބޭރު ކުންފުނިތަކުގައިކަމުން، އެ ޤައުމުން އަންނަނީ އެކަމާއި ގުޅޭ ޤާނޫނުތައް ބަދަލުކުރަމުންނެވެ. އެގޮތުން ޑައިމަންޑް ނަގާ ކުންފުނިތަކުގެ 24 އިންސައްތަ ހިއްސާ އެ ޤައުމުގެ ސަރުކާރަށް ނުވަތަ އެ ޤައުމުގެ ކުންފުނިތަކަށް ދޭންޖެހޭ ގޮތަށް ޤާނޫނުތަކަަށް ބަދަލު ގެނައުމުގެ މަސައްކަތް ދަނީ ކުރަމުންނެވެ.

މިހާތަނަށް ދުނިޔެއިން ފެނުނު ދެވަނައަށް އެންމެ ބޮޑު ޑައިމަންޑް ބޮޓްސްވާނާއިން ހޯދާފައިވާއިރު، މިހާތަނަށް ދުނިޔެއިން ފެނުނު އެންމެ ބޮޑު ޑައިމަންޑް ނަގާފައިވަނީ 1905 ވަނަ އަހަރު ސައުތު އެފްރިކާއިންނެވެ. 3105 ކެރެޓްގެ އެ ޑައިމަންޑް 9 ބައި ކުރުމަށްފަހު، އޭގެ ގިނަ ބައިތައް ވަނީ އިނގިރޭސި ޝާހީ އާއިލާއިން ނަގާފައެވެ.