ޔަމަނުގެ ކަނޑުގެ އައްސޭރިފަށުން ދަތުރުކުރުމުން ދިޔަ ބޯޓެއް ބަންޑުން ޖަހާލައި 13 މީހުން މަރުވެފައިވާ ކަމަށް އިންޓަނޭޝަނަލް އޯގަނައިޒޭޝަން ފޮރ މައިގްރޭޝަން (އައިއޯއެމް)ން ބުނެފިއެވެ.
އައިއޯއެމުން މައުލޫމާތު ދޭ ގޮތުގައި ބޯޓުން ދަތުރުކުރަމުން ދިޔަ 14 މީހުން ވަނީ ގެއްލިފައެވެ. އެ ހާދިސާގައި މަރުވި މީހުންގެ ތެރޭގައި ހިމެނެނީ 11 ފިރިހެނުންނާއި ދެ އަންހެނުންނެވެ. އެ މީހުންގެ ހަށިގަނޑުތައް ފެނިފައި ވަނީ ބާބް އަލް-މަންދާބް ކަނޑުއޮޅީގެ އައްސޭރިފަށުން ކަމަށް އައިއޯއެމުން ބުނެއެވެ.
އެ ބޯޓުން ދަތުރުކުރަމުން ދިޔައީ އިތިއޯޕިއާގެ 25 މީހަކާއި ޔަނަމުގެ ދެ މީހުންނެވެ. އެ މީހުން ދަތުރުކުރަމުން ދިޔައީ ޔަމަނުގެ ހުޅަނގު ދެކުނު ކަނޑުގެ އައްސޭރި ފަށުންނެވެ. އައިއޯއެމުން ބުނީ އެ ހާދިސާގައި ގެއްލިފައިވާ މީހުން ހޯދުމުގެ މަސައްކަތް އަދިވެސް ކުރިއަށްދާ ކަމަށެވެ. އަދި ބޯޓު ބަންޑުން ޖަހަލާން މެދެވެރިވި ސަބަބު ނޭނގޭ ކަމަށް ވެސް އައިއޯއެމުން ބުނެއެވެ.
ޖުލައި މަހު ވެސް ޔަމަނުގެ ހުޅަނގު ދެކުނު ކަނޑުގެ އައްސޭރިފަށުގައި ވަނީ އެފަދަ ހާދިސާއެއް ހިނގާފައެވެ. 45 ރެފިއުޖީންނާއެކު ދަތުރު ކުރަމުން ދިޔަ ބޯޓެއް ބަންޑުން ޖަހާލައި ހިނގި ހާދިސާގައި ސަލާމަތްވީ އެންމެ ހަތަރު މީހުންނެވެ.