ޑޮލަރުގެ މައްސަލަ ހައްލުކުރެއްވުމަށް ޤާނޫނުތަކަށް މުހިންމު އިޞްލާހުތަކެއް ގެންނަނީ

ރާއްޖެއަށް ދިމާވެފައިވާ ޑޮލަރުގެ މައްސަލަ ހައްލުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން އާދިއްތަ ދުވަހު ބޭއްވި ވަޒީރުންގެ މަޖިލީހުގައި ވަނީ މުހިންމު 3 ނިންމެވުމެއް ނިންމަވާފައެވެ.

ޑޮލަރު ލިބުމުގެ ދަތިކަމަކީ މީގެކުރިން އެއްވެސް ސަރުކާރަކަށް ހައްލު ކުރެވިފައިވާ މައްސަލައެއް ނޫނެވެ. ރާއްޖެއަކީ ފަތުރުވެރިކަމުގެ ނަން މަޝްހޫރު މަންޒިލަކަށްވެ، ރާއްޖެއަށް އަންނަ ފަތުރުވެރިންގެ ޢަދަދު އަހަރުން އަހަރަށް އިތުރުވިނަމަވެސް މިކަމަށް ދާއިމީ ހައްލެއް އަދާހަމައަށްވެސް އައިސްފައެއްނުވެއެވެ. މިއަހަރުގެ މިހާތަނަށް ރާއްޖެއަށް 1،309،400 ފަތުރުވެރިން ވަނީ ޒިޔާރަތްކޮށްފައެވެ.

ދައުލަތުގެ ޓެކްސް އިދާރާ، މީރާއަށް މިއަހަރުގެ ފުރަތަމަ 7 މަސްދުވަހު ޑޮލަރު އާމްދަނީގެ ގޮތުގައި ލިބިފައިވަނީ 636 މިލިއަން ޑޮލަރެވެ. ފުރަތަމަ 7 މަސްދުވަހު އެންމެ ގިނައިން ޑޮލަރުން އާމްދަނީ ލިބިފައިވަނީ މާރްޗ މަހުގައެވެ. އެއީ 119.67 މިލިއަން ޑޮލަރުއެވެ.

މީރާއަށް ޑޮލަރު އާމްދަނީގެ ގޮތުގައި ދެއްކުން ލާޒިމުކޮށްފައިވަނީ ހަމައެކަނި ގްރީން ޓެކުހާއި، ޓޫރިޒަމް ގުޑްސް އެންޑް ސަރވިސް ޓެކްސް (ޓީޖީއެސްޓީ) އެވެ. މީރާގެ ތަފާސްހިސާބުތައް ދައްކާގޮތުން ޑޮލަރު އާމްދަނީގެ ގޮތުގައި އެންމެ ބޮޑު އިންސައްތައެއް ކޮންމެ މަހަކުވެސް ހިއްސާކުރަނީ ޓީޖީއެސްޓީއެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ބަންޑާރަ ނައިބު އަޙްމަދު އުޝާމް ވިދާޅުވީ، އާދިއްތަ ދުވަހު ބޭއްވި ކެބިނެޓްގެ ބައްދަލުވުމުގައި ޑޮލަރުގެ މައްސަލައަށް ހައްލެއް ގެނައުމަށް މުހިންމު 3 ނިންމުމެއް ނިންމަވާފައިވާކަމަށެވެ. އެގޮތުން ޑޮލަރުން އާމްދަނީ ލިބޭ ކުންފުނިތަކުން ދައުލަތައް ފައިސާ ދައްކާއިރު، ބައެއް ހާލަތްތަކުގައި މިހާރު ރުފިޔާއިން ފައިސާ ދައްކަމުންދާކަމަށާއި، ނަމަވެސް ޑޮލަރުން އާމްދަނީ ލިބޭ ކުންފުނިތަކުން ދައުލަތައް ދައްކަންޖެހޭ ފައިސާ މީގެފަހުން ދައްކަންޖެހޭނީ ޑޮލަރުންކަމަށް ވަޒީރުންގެ މަޖިލީހުން ނިންމަވާފައިވާކަމަށް ބަންޑާރަ ނައިބު ވިދާޅުވިއެވެ. އެކަމަށް ޤާނޫނަށް އިޞްލާހު ގެންނަވާނެކަމަށްވެސް ބަންޑާރަ ނައިބު ވިދާޅުވިއެވެ.

އަދި ޑޮލަރުން އާމްދަނީ ލިބޭ ބައެއް ކުންފުނިތަކުން މުސާރަ ޑޮލަރުން ދޭއިރު ޕެންޝަންއަށް ފައިސާ ދައްކަނީ ދިވެހި ރުފިޔާއިންކަމަށްވެސް ބަންޑާރަ ނައިބު ވިދާޅުވިއެވެ. އެހެންކަމުން މިކަންވެސް ޕެންޝަނާއި ބެހޭ ޤާނޫނަށް ގެންނަންޖެހޭ އިސްލާހުތައް ގެނެސް ބަދަލުކުރުމަށް ކެބިނެޓުން ނިންމަވާފައިވާކަން ބަންޑާރަ ނައިބު ފާހަގަކުރެއްވިއެވެ.

މީގެއިތުރުން ޑޮލަރުން އާމްދަނީ ލިބޭ ކުންފުނިތަކުން ރާއްޖެއަށް އެތެރެކުރާ މުދަލަށް ދައްކާ ކަސްޓަމް ޑިއުޓީވެސް ޑޮލަރުން ދައްކަންޖެހޭ ގޮތައް ޤާނޫނާއި ޤަވައިދުތަކަށް އިސްލާހުގެނައުމަށް ކެބިނެޓުން ވަނީ ނިންމަވާފައެވެ. މި ނިންމުންތައް ގެންނަންޖެހުނު ސަބަބުވެސް ނޫސްވެރިންގެ ބައްދަލުވުމުގައި ބަންޑާރަ ނައިބު ވަނީ ތަފްސީލްކޮށްދެއްވާފައެވެ.

ބަންޑާރަ ނައިބު ވިދާޅުވީ މި އިޞްލާހުތައް ޤާނޫނަށް ގެނައުމަށް ނިންމެވީ ޑޮލަރުން އާމްދަނީ ލިބޭ ކުންފުނިތަކުން ދައުލަތައް ދައްކަންޖެހޭ ފައިސާ ރުފިޔާއިން ދެއްކުމަށްޓަކައި ބްލެކް މާކެޓްގައި ޑޮލަރު މާރުކުރާކަމަށް ކުރެވޭ ތުހުމަތާއި ގުޅިިގެންކަމަށެވެ. އެހެންކަމުން މިކަމަށް ނިމުމެއް ގެނައުމަށްޓަކައި 3 ކަމެއް ތަންފީޒްކުރެއްވުމަށް ނިންމެވީކަމަށްވެސް ބަންޑާރަ ނައިބު ވިދާޅުވިއެވެ.

"މީގެއިތުރުންވެސް ރާއްޖެއަށް ދިމާވެފައި މިއޮތް ޑޮލަރުގެ މައްސަލައަށް ހައްލުތަކެއް ހޯދުމަށްޓަކައި އިތުރަށް މަޝްވަރާކޮށްފައި ގެންނަންޖެހޭ ބަދަލުތައް ގެންނާނަން. މި 3 ކަމަކީ ކެބިނެޓުން ނިންމާފައި އޮތް 3 ނިންމުން. މަޖިލީހަށް ހުށައަޅަންޖެހޭ އިސްލާހެއް އޮތްނަމަ ކުރިއަށްއޮތް 2 ހަފްތާއެއްހައި ދުވަހުގެ ތެރޭގައި މަޖިލީހަށް ހުށައަޅާނަން. އެއްވެސް ޤަވައިދެއް އިސްލާހެއް ކޮށްގެން ކުރަންޖެހޭ ކަމެއް އޮވެއްޖެނަމަ މިއޮތް ހަފްތާއެއްހައި ދުވަހުގެ ތެރޭގައި އަޅުގަނޑުމެން އެކަންކޮށް އެ ތަންފީޒްކުރުމުގެ މަސައްކަތް ފަށާނަން." ބަންޑަރަ ނައިބު އަޙްމަދު އުޝާމް ވިދާޅުވިއެވެ.

ސަރުކާރުން ވިދާޅުވީ، ދައުލަތައް ލިބޭ ޑޮލަރު އާމްދަނީ އިތުރުކުރުމަށް މި ފިޔަވަޅުތައް ވީހާވެސް އަވަހަކަށް އެޅުމަށް ހަމަޖެހިފައިވާކަމަށެވެ. ޑޮލަރުގެ މައްސަލަ ހައްލުކުރައްވާނެކަމަށް މީގެކުރިންވެސް އެތައް ފަހަރަކު ރައީސުލްޖުމްހޫރިއްޔާ އަދި ވަޒީރުންވެސް ވަނީ ވިދާޅުވެފައެވެ. އަދި މިކަމަށް ސަރުކާރުން ދަނީ މަސައްކަތްކުރައްވަމުންނެވެ.

އެމްއެމްއޭއިންވެސް ވިދާޅުވެފައިވަނީ ފައިނޭންޝަލް ސެކްޓަރއަށް ދިމާވެފައިވާ ނިޒާމީ ބައެއް މައްސަލަތަކަށް ޒަމާނީ ހައްލުތައް ގެނައުމުގެ މަސައްކަތް ކުރަމުންގެންދަވާ ކަމަށާއި، މި ބަދަލުތައް ވެގެންދާނީ ރާއްޖޭގައި ފޮރިން ޑިރެކްޓް އިންވެސްޓްމަންޓަށް ފަހި މާހައުލެއް އުފެދިގެންދާނެ ފަދަ ބަދަލުތަކަށްކަމަށެވެ.