ޔަހޫދީންގެ ރަށްތަކާއި ޔަހޫދީ ފައުޖުގެ ހައްދުފަހަނަ އެޅި ސިފައިންނަށް އަމާޒުކޮށް އިތުރު ޙަމަލާތަކެއް ދިނުމާ މެދު ލުބްނާންގެ މުޖާހިދުންގެ ޖަމާޢަތް ޙިޒްބުاللهން ވިސްނަމުންދާ ކަމުގައި އެ ޖަމާޢަތުގެ ވެރިޔާ އަލް-ސައްޔިދް ޙަސަން ނަޞްރުالله ހާމަ ކުރައްވައިފިއެވެ. އޭނާ އެ ކަން ހާމަ ކުރައްވާފައި ވަނީ ޓީވީ މެދުވެރިކޮށް ލުބްނާންގެ ރައްޔިތުންނާ މުޚާޠަބު ކުރައްވައި ވާހަކަ ދައްކަވަމުންނެވެ.
ޙިޒްބުاللهގެ ޙަމަލާތައް އަމާޒު ކޮށްފައި ވަނީ ޔަހޫދީ ދައުލަތުގެ އުތުރާއި މެދުތެރޭ ސަރަޙައްދުތަކުގައި ޤާއިމުކޮށްފައިވާ އަސްކަރީ މަރުކަޒުތަކަށެވެ. ޙަމަލާތަކުގައި ގިނަ ޢަދަދެއްގެ ޑްރޯނާއި ކަތުޔޫޝާ މަރުކާގެ 320 ވަރަކަށް ރޮކެޓް ބޭނުން ކުރިއެވެ. ޙިޒްބުاللهން ބުނީ, އެންމެ ގިނަ ޙަމަލާތައް އަމާޒު ކޮށްފައި ވަނީ ޔަހޫދީންގެ ވެރިރަށް ތެލް އަވީވާ 1.5 ކިލޯމީޓަރު އުތުރުގައި އޮންނަ ޔަހޫދީ ފައުޖުގެ ޖާސޫސީ މަރުކަޒަކަށް ކަމުގައެވެ.
އެ ޖަމާޢަތުން ޙަމަލާ ދޭން ފެށުމުން ޔަހޫދީންގެ ރަށްތަކުގައި އިންޒާރުގެ ރަނގަބީލު ޖެހިއެވެ. އަދި, ޔަހޫދީން ވަނީ ރައްކާތެރި ކަން ހޯދުމަށް ބިންގަރާސްތަކަށް ވަދެ ފިލާފައެވެ. އެއީ, ލުބްނާންގެ ވެރިރަށް ބައިރޫތަށް ދިން ޙަމަލާއެއްގައި އެ ޖަމާޢަތުގެ އަސްކަރީ ކޮމާންޑަރެއް ކަމަށްވާ ފުޢާދު ޝުކްރު ޝަހީދު ކޮށްލުމުން, އެ ކަމުގެ ބަދަލު ހިފުމުގެ ގޮތުން ދީފައިވާ ނުރައްކާތެރި ޙަމަލާތަކެކެވެ.
ނަޞްރުالله ވިދާޅުވީ, ޙިޒްބުاللهގެ ރޭވުންތަކާ އެއްގޮތަށް ޙަމަލާތައް ކާމިޔާބު ކަމާ އެކު ދެވުނު ކަމުގައެވެ. އަދި, ޔަހޫދީންނަށް އަމާޒުކޮށް އިތުރު ޙަމަލާތައް ދިނުމާ މެދު ގޮތެއް ނިންމާނީ, ޙަމަލާތަކުގެ ފުރަތަމަ މަރުޙަލާގައި ޔަހޫދީންނަށް ލިބިފައިވާ ގެއްލުންތައް ވަޒަން ކުރުމަށް ފަހު ކަމުގައެވެ. ޙިޒްބުاللهން ޙަމަލާ ދިނުމަށް ތައްޔާރުވަމުން ދިޔަ ވަގުތު ޔަހޫދީ ފައުޖުގެ އަސްކަރީ މަތިންދާބޯޓުތަކުން ބޮން އަޅައި ގިނަ ޢަދަދެއްގެ ހަތިޔާރު ނައްތައިލައި, ޙަމަލާތައް ފޭލުކޮށްލާފައިވާނެ ކަމަށް ޔަހޫދީން ބުނުމުން ނަޞްރުالله ވަނީ އެ ކަން ދޮގު ކުރައްވާފައެވެ.
ޙިޒްބުاللهގެ މުޖާހިދުންނާއި ޔަހޫދީންނާ ދެމެދު ޙަމަލާ ބަދަލު ކުރަން ފަށާފައި ވަނީ, ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން މީގެ ދިހަ މަސް ކުރިން ޔަހޫދީ ފައުޖުން ފެށި ލާއިންސާނީ ޢުދުވާނާ ދެކޮޅު ހެދުމުގެ ގޮތުންނެވެ. ނަޞްރުالله ވިދާޅުވީ, ޔަހޫދީން އަމަލު ކުރަމުންދާ ގޮތާ ޚިލާފަށް, ޙިޒްބުاللهގެ ޙަމަލާތަކުގައި ޔަހޫދީ ޢާންމުންގެ ފުރާނައަށް ނުރައްކާ ކޮށްފައި ނުވާނެ ކަމުގައެވެ. އަދި, ޢާންމުންގެ ގެދޮރާއި, ޢުމްރާނީ ވަސީލަތްތަކުގެ އިތުރުން ތެލް އަވީވުގައި ހުންނަ ބެން ގޫރިޔޮން ވައިގެ ބަނދަރަށް ޙަމަލާތައް އަމާޒު ނުކުރަން ޚާއްޞަ އިސްކަމެއް ދީފައިވާނެ ކަމުގައެވެ.
އެއީ, ބަދަލު ހިފުމުގެ ޙަމަލާތަކުގެ ފުރަތަމަ މަރުޙަލާ ކަން ޙިޒްބުاللهން ހާމަކޮށްފައިވީ ނަމަވެސް, ނަޞްރުالله ވިދާޅުވީ އިތުރު ޙަމަލާތަކެއް ދޭނީ, ފުރަތަމަ މަރުޙަލާގެ ދަށުން ދީފައިވާ ޙަމަލާތަކުގެ ލަނޑުދަނޑިތައް ހާސިލު ކުރެވިފައިވާ މިންވަރު ދެނެގަތުމަށް ފަހު ކަމުގައެވެ. "ނަތީޖާއާ މެދު ހިތްހަމަ ނުޖެހޭ ނަމަ, ފަހުގެ ވަގުތެއްގައި އިތުރު ޙަމަލާތަކެއް ދިނުމަކީ އަޅުގަނޑުމެންނަށް ލިބިގެންވާ ޙައްޤެއް،" ނަޞްރުالله ވިދާޅުވިއެވެ.
ޔަހޫދީންނަށް އަމާޒުކޮށް ދިން ޙަމަލާތަކުގައި ޙިޒްބުاللهން ބޭނުން ކޮށްފައިވާ ބައެއް އުކުޅުތައް ވެސް ނަޞްރުالله ވަނީ ހާމަ ކުރައްވާފައެވެ. އޭނާ ވިދާޅުވީ, ފުރަތަމަ ކަތުޔޫޝާ މަރުކާގެ ރޮކެޓް ޙަމަލާތައް ދީފަައި ވަނީ ޔަހޫދީންގެ އަޔަން ޑޯމް ވައިގެ ދިފާޢީ ނިޒާމަށް ބާރު ބޮޑުކޮށް ފޭލު ކޮށްލަން ކަމުގައެވެ. އަދި, ޑްރޯންތައް ބޭނުންކޮށް ޔަހޫދީ ފައުޖުގެ އަމާޒުތަކަށް ޙަމަލާ ދޭން ފަށާފައި ވަނީ އެއަށް ފަހުގައި ކަމަށް އޭނާ ވިދާޅުވިއެވެ. ޑްރޯންތައް އުދުއްސައިލާފައި ވަނީ އަލް-ބިޤާޢު ވާދީން ކަމަށް ވެސް އޭނާ ހާމަ ކުރެއްވިއެވެ.
ޔަހޫދީ ފައުޖުން ބުނެފައި ވަނީ, ޙިޒްބުاللهގެ ޙަމަލާތައް ރޫޅައިލުމަށް 100އެއްހާ އަސްކަރީ މަތިންދާބޯޓު ބޭނުންކޮށް, އެ ޖަމާޢަތުގެ އަމާޒުތަކަށް ވަރުގަދަ ޙަމަލާތަކެއް ދީފައިވާނެ ކަމުގައެވެ. އަދި, ޙިޒްބުاللهގެ ޙަމަލާތައް ފޭލު ކޮށްލާފައިވާނެ ކަމުގައެވެ. ނަމަވެސް, ނަޞްރުالله ވިދާޅުވީ ޙަމަލާތައް ފެށުމުގައި ލަސްތަކެއް ކުރިމަތިވި ނަމަވެސް, އެ ކަން ކާމިޔާބު ކުރެވިފައިވާ ކަމުގައެވެ. ޙަމަލާތައް ލަސްވީ, ޔަހޫދީންގެ އެންމެ ބޮޑު މަދަދުގާރު, އެމެރިކާގެ އަމަލުތަކާ ގުޅިގެން ކަމަށް ވެސް އޭނާ ވިދާޅުވިއެވެ.
މެދުއިރުމަތީގެ މަސްރަޙު ހޫނުވެ, ޔަހޫދީންނަށް ވަރުގަދަ ޙަމަލާތަކެއް ދޭނެ ކަމުގެ އިންޒާރު ޙިޒްބުاللهގެ އިތުރުން އީރާނާއި އެކްސިސް އޮފް ރެސިސްޓެންސްގައި ހިމެނޭ ޖަމުޢިއްޔާތަކުން ދިނުމާ އެކު އެމެރިކާއިން ވަނީ ޔަހޫދީންގެ ސަލާމަތާއި ރައްކާތެރި ކަން ކަށަވަރު ކޮށްދޭން ފިޔަވަޅުތަކެއް އަޅާފައެވެ. މި ގޮތުން, އެމެރިކާއިން ވަނީ އެ ޤައުމުގެ އަސްކަރީ މަތިންދާބޯޓު އުފުލާ މަނަވަރަކާއި, ސްޓްރައިކް ގުރޫޕެއްގެ އިތުރުން ނުރައްކާތެރި ހަތިޔާރު އުފުލާ ސަބްމެރިންތައް މެދުއިރުމައްޗަށް ފޮނުވާފައެވެ.