މިޔަންމާގެ ރޮހިންޔާ ދަރިކޮޅުގެ މުސްލިމުންނާ ދެކޮޅަށް އެ ޤައުމުގެ އަސްކަރިއްޔާއާއި ހަތިޔާރު އެޅި ޖަމާޢަތްތަކުން ހިންގަމުންދާ ގަތުލުއާންމު ހުއްޓައިލަން ގޮވައިލައިފިއެވެ. ރޮހިންޔާ ދަރިކޮޅުގެ އެތަކެއް ހާސް ބަޔަކު އެ ކަމަށް ގޮވައިލާފައި ވަނީ, އެ މީހުންނާ ދެކޮޅަށް މިޔަންމާގެ އަސްކަރިއްޔާއިން ހިންގަމުންދާ ގަތުލުއާންމަށް ހަތް އަހަރު ފުރުން ފާހަގަ ކުރުމުގެ ގޮތުން ބަންގްލަދޭޝްގައި ބޭއްވި އެއްވުމެއްގައެވެ. އެ ޤައުމުގައި ރޮހިންޔާ ދަރިކޮޅުގެ މިލިޔަނެއްހާ ރެފިއުޖީން ދިރިއުޅެއެވެ.
ރޮހިންޔާ ދަރިކޮޅުގެ އެތަކެއް ސަތޭކަ ހާސް ބަޔަކު ބަންގްލަދޭޝަށް ހިޖުރަ ކޮށްފައި ވަނީ, މިޔަންމާގެ އަސްކަރިއްޔާއިން އެ މީހުންނާ ދެކޮޅަށް ހިންގަމުންދާ ގަތުލުއާންމުން ސަލާމަތްވުމަށެވެ. އެ މީހުން މި ވަގުތު ދިރިއުޅެމުން ދަނީ ބަންގްލަދޭޝްގެ ދެކުނުގެ ސަރަޙައްދުތަކުގައި ގާއިމު ކޮށްފައިވާ ރެފިއުޖީ ކޭމްޕުތަކުގައި ވަރަށް ނިކަމެތި ހާލުގައެވެ. ގަތުލުއާންމާއި އަނިޔާވެރިކަމާ ދެކޮޅަށް ބަންގްލަދޭޝްގައި ބޭއްވި އެއްވުމުގައި އެތަކެއް ހާސް ކުޑަކުދިންނާއި އުމުރުން ދުވަސްވީ މީހުން ބައިވެރިވިއެވެ.
ފާއިތުވި ހަފުތާތަކުގެ ތެރޭގައި ވެސް މިޔަންމާގެ ރާހައިން ސްޓޭޓްގައި ދިރިއުޅޭ ރޮހިންޔާ ދަރިކޮޅުގެ އެތަކެއް ހާސް ބަޔަކު ބަންގްލަދޭޝަށް ހިޖުރަ ކޮށްފައިވެއެވެ. އަމިއްލަ ވަޒަން ދޫކޮށް ބަންގްލަދޭޝަށް ހިޖުރަ ކުރާ ރޮހިންޔާއިންގެ ޢަދަދު އިތުރުވެފައި ވަނީ މިޔަންމާގެ އަސްކަރީ ސަރުކާރުގެ ލަޝްކަރާއި, އިދިކޮޅު ހަނގުރާމަވެރިންގެ ޖަމާޢަތް, އަރާކަން އާމީއާ ދެމެދު ބަދަލު ކުރަމުންދާ ޙަމަލާތައް އިތުރުވުމާ ގުޅިގެންނެވެ. ބުދުދީނަށް އަޅުކަން ކުރާ މީހުންގެ މައްޗަށް އެކުލެވިގެންވާ އަރާކަން އާމީން ވެސް ދަނީ ރޮހިންޔާ މުސްލިމުންނަށް ޙަމަލާތައް އަމާޒު ކުރަމުންނެވެ.
"އުންމީދަކީ އެނބުރި އަމިއްލަ ވަޒަނަށް ދިޔުން. އަޅުގަނޑުމެން, ރޮހިންޔާއަކީ ވެސް މިޔަންމާގެ ރައްޔިތުން،" ބަންގްލަދޭޝްގެ ކޮކްސް ބާޒާރު ސަރަޙައްދުގައި ބޭއްވި އެއްވުމުގެ ބައިވެރިން ބުންޏެވެ. "ކެތްވާނީ މިހާ ވަރަކަށް. ރޮހިންޔާ ދަރިކޮޅާ ދެކޮޅަށް ހިންގަމުންދާ ގަތުލުއާންމާއި އަނިޔާވެރިކަން ހުއްޓައިލާ،" އެއްވުމުގައި ބައިވެރިވި ރޮހިންޔާ ދަރިކޮޅުގެ ރެފިއުޖީއެއް ކަމުގައިވާ ޙަފީޟް އަލް-ރަޙްމާން ގޮވައިލިއެވެ.
ރާހައިން ސްޓޭޓްގައި ދިރިއުޅޭ ރޮހިންޔާ ދަރިކޮޅުގެ މުސްލިމުންނާ ދެކޮޅަށް މިޔަންމާގެ އަސްކަރިއްޔާއިން 2017ވަނަ އަހަރު ފެށި އަސްކަރީ އޮޕަރޭޝަނަކީ ގަތުލުއާންމެއްގެ ގޮތުގައި އދން ވެސް ވަނީ ސިފަ ކޮށްފައެވެ. އެ ޢުދުވާނާ ގުޅިގެން 73,000އަށްވުރެ ގިނަ ރޮހިންޔާއިން އަމިއްލަ ވަޒަން ދޫކޮށް ހިޖުރަ ކުރަން މަޖުބޫރުވެފައިވާ ކަން ވެސް އދން ހާމަކުރިއެވެ. ނަމަވެސް, މިޔަންމާގެ އަސްކަރިއްޔާއިން މިހާރު ވެސް ދަނީ ރޮހިންޔާ މުސްލިމުންނާ ދެކޮޅަށް ހިންގަމުންދާ ގަތުލުއާންމު އިތުރަށް އަނިޔާވެރި ކުރަމުންނެވެ.
ބަންގްލަދޭޝަށް ހިޖުރަ ކުރަމުންދާ ރޮހިންޔާ ދަރިކޮޅުގެ މީހުންގެ ޢަދަދު އިތުރުވަމުން ދާތީ އެ ޤައުމުން ވަނީ ކަންބޮޑުވުން ފާޅު ކޮށްފައެވެ. އަދި, އެ މައްސަލައަށް އޮތް ހަމައެކަނި ޙައްލަކީ, ރޮހިންޔާ ދަރިކޮޅުގެ މުސްލިމުން އަނބުރާ ވަޒަނަށް ފޮނުވައިލުން ކަމަށް ބަންގްލަދޭޝުން ގަބޫލު ކުރެއެވެ. ބަންގްލަދޭޝްގައި ދިރިއުޅޭ ރޮހިންޔާ ދަރިކޮޅުގެ މުސްލިމުންނަށް އެހީތެރިކަން ފޮރުކޮށްދޭން ބޭރުގެ އެހީދޭ ޖަމާޢަތްތަކުން ދީފައިވާ މާލީ އެހީތެރިކަން ހުސްވާން ފެށުމާ އެކު, ބަންގްލަދޭޝްގެ ރައްޔިތުންނާއި ރޮހިންޔާ ދަރިކޮޅުގެ ރެފިއުޖީންނާ ދެމެދު ވެސް ވަނީ މަސްރަޙު ހޫނުވެފައެވެ.
ބަންގްލަދޭޝް މި ވަގުތު އޮތީ އިތުރު ރެފިއުޖީން ބަލައިގަނެވޭނެ ފަދަ ހާލަތެއްގައި ނޫން ކަމުގައި އެ ޤައުމުގެ ޚާރިޖީ ވަަޒީރުގެ މަޤާމުގައި ވަގުތީ ގޮތުން ފުރުއްވަމުން ގެންދަވާ މުޙައްމަދު ތަވްޙީދު ޙުސައިން ވިދާޅުވިއެވެ. އަދި, ރޮހިންޔާ ދަރިކޮޅުގެ ރެފިއުޖީންނަށް ހިޔާވަހިކަން ފޯރުކޮށްދޭން އޭނާ ވަނީ އަވައްޓެރި އިންޑިޔާއާއި އެހެން ޤައުމުތަކުގެ ކިބައިން އެދިވަޑައިގަންނަވާފައެވެ. އަދި, އަރަކާން އާމީން ރޮހިންޔާ ދަރިކޮޅުގެ މުސްލިމުންނަށް އަމާޒުކޮށް ދެމުންދާ ޙަމަލާތައް ހުއްޓުވަން ބައިނަލްއަޤުވާމީ މުޖުތަމަޢުން ހަރުދަނާ ފިޔަވަޅުތަކެއް އެޅުމަށް ވެސް އޭނާ ވަނީ ގޮވައިލައްވާފައެވެ.
މިޔަންމާގެ ރާހައިން ސްޓޭޓްގައި ދިރިއުޅޭ މީހުންގެ, ޚާއްޞަކޮށް ކުޑަކުދިންގެ ހާލަތު އިތުރަށް ގޯސްވެފައިވާ ކަމުގައި ކުޑަކުދިންނާ ބެހޭ އދގެ އިދާރާ, ޔުނިސެފުން ދާދި ފަހުން އިންޒާރު ކޮށްފައިވެއެވެ. ރޮހިންޔާ ދަރިކޮޅުގެ ކުޑަކުދިންނަށް އަމާޒުކޮށް ދެމުންދާ ޙަމަލާތައް އިތުރުވެފައިވާ ކަން ވެސް ޔުނިސެފުން ހާމަކުރިއެވެ. އެ އިދާރާއިން ބުނީ, ރޮހިންޔާ ދަރިކޮޅުގެ ބައި މިލިޔަނަށް ވުރެ ގިނަ ކުޑަކުދިންނަށް ދުނިޔޭގައިވާ އެންމެ ބޮޑު ރެފިއުޖީ ކޭމްޕުގައި ދިރިއުޅެން މަޖުބޫރު ކުރުވުމަކީ ބަލައިގަނެވޭނެ ކަމެއް ނޫން ކަމުގައެވެ.
"އަޅުގަނޑުމެން ބޭނުމީ އަޅުގަނޑުމެންގެ ވަޒަނަށް އެނބުރި ދާން. އަޅުގަނޑުމެންގެ އަސާސީ ޙައްޤުތައް ކަށަވަރު ކޮށްދިނުމަށް. އަޅުގަނޑުމެންގެ ދިރިއުޅުން ސަލާމަތްކޮށް, މިނިވަންކަމާއި ސުލްޙަވެރިކަމާ އެކު [މިޔަންމާގެ އެހެން ރައްޔިތުންނާ އެކު] ދިރިއުޅުމުގެ ފުރުޞަތު ކަށަވަރު ކޮށްދޭން އދއިން ހަރުދަނާ މަސައްކަތްތަކެއް ކުރަން ޖެހޭ،" ބަންގްލަދޭޝްގައި ދިރިއުޅޭ ރޮހިންޔާ ދަރިކޮޅުގެ މުޙައްމަދު ޠާހިރު ބުންޏެވެ.