ރަޝިޔާއިން ޔޫކްރެއިންގެ ރަށްތަކަށް ވަރުގަދަ ޙަމަލާތަކެއްދީ ޢާންމުންގެ ފަސް މީހުން މަރައިލައިފިއެވެ. ޔޫކްރެއިންގެ ސަރުކާރުން ބުނީ, އެ ޤައުމުގެ އެކި ސަރަޙައްދުތަކަށް ޙަމަލާ ދޭން ރަޝިޔާއިން 200އެއްހާ މިސައިލާއި އަސްކަރީ ޑްރޯން ބޭނުން ކޮށްފައިވާ ކަމުގައެވެ. އަދި, އެ ޙަމަލާތަކާ ގުޅިގެން ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބި, ބައެއް ސަރަޙައްދުތަކުން ފެނާއި ކަރަންޓުގެ ޚިދުމަތް ކެނޑިފައިވާ ކަމުގައެވެ.
ޔޫކްރެއިންގެ 10 ސަރަޙައްދަކަށް ޙަމަލާތައް އަމާޒު ކޮށްފައިވާއިރު, އޭގެ ތެރޭގައި ވެރިރަށް ކީވް ވެސް ހިމެނެއެވެ. ކީވުން ބުނީ ގިނަ ޙަމަލާތައް އަމާޒު ކޮށްފައި ވަނީ ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ކަމުގައެވެ. ޙަމަލާތަކާ އެކު ކީވްގެ ބޮޑު ސަރަޙައްދަކުން ވެސް ވަނީ ކަރަންޓުގެ ޚިދުމަތް ކެނޑިފައެވެ. ޔޫކްރެއިންގެ ކަރަންޓު ވިއުގައަށް އަމާޒުކޮށް ދެމުންދާ ޙަމަލާތައް މި އަހަރުގެ މާރިޗު މަހަށް ފަހު ރަޝިޔާއިން ވަނީ އިތުރު ކޮށްފައެވެ. ބޭނުމަކީ, ފިނި މޫސުން ފެށުމުގެ ކުރިން, ޢާންމުން ދިރިއުޅޭ ސަރަޙައްދުތަކަށް ކަރަންޓުގެ ޚިދުމަތް ދިނުމަށް ހުރަސް އެޅުމެވެ.
އޮގަސްޓު 26ވަނަ ދުވަހުގެ ޙަމަލާތަކަކީ ފަހުގެ ތާރީޚެއްގައި ރަޝިޔާއިން ޔޫކްރެއިންގެ ރަށްތަކަށް އަމާޒުކޮށް ދީފައިވާ އެންމެ ނުރައްކާތެރި ޙަމަލާތަކެވެ. މި ޙަމަލާތައް ދީފައި މި ވަނީ, ޔޫކްރެއިންގެ ލަޝްކަރެއް ރަޝިޔާގެ ހުޅަނގުގައި އޮތް ކޫރްސްކް ސަރަޙައްދަށް އަރައި, ރަށްތަކާއި އަވަށްތަކަށް އަތްގަދަ ކުރަމުންދާ ދަނޑިވަޅެއްގައެވެ. ޔޫކްރެއިންގެ ސިފައިން ކޫރްސްކަށް އަރައިގަނެފައި ވަނީ އޮގަސްޓު 6ވަނަ ދުވަހުއެވެ. ރަޝިޔާގެ ސިފައިން ވެސް ދަނީ ޔޫކްރެއިންގެ އިރުމަތީގައިވާ ޕޯކްރޮވްސްކަށް އަތްގަދަ ކުރަން މަސައްކަތް ކުރަމުންނެވެ.
"އެއީ ފަހަކަށް އައިސް ދީފައިވާ އެންމެ ބޮޑު ޙަމަލާ. އެކި ވައްތަރުގެ ސަތޭކައަށް ވުރެ ގިނަ މިސައިލާއި ސަތޭކައަށް ވުރެ ގިނަ ޝާހިދު މަރުކާގެ އަސްކަރީ ޑްރޯން ބޭނުން ކުރި. އެހެން ޙަމަލާތަކޭ އެއް ފަދައިން އެ މީހުން މި ފަހަރު ވެސް އިސްކޮށްފައި ވަނީ ހީލަތްތެރިކަން. ޙަމަލާތައް އަމާޒު ކޮށްފައި ވަނީ ޢާންމު ޚިދުމަތްތައް ދޭން ބޭނުން ކުރާ ވަސީލަތްތަކަށް،" ރަޝިޔާއިން އެންމެ ފަހުން ދީފައިވާ ޙަމަލާތަކާ މެދު ކަންބޮޑުވުން ފާޅު ކުރައްވައި ޔޫކްރެއިންގެ ރައީސް ވޮލޮޑޮމީރް ޒެލެންސްކީ ވިދާޅުވިއެވެ.
އޭނާ ވިދާޅުވީ, ރަޝިޔާގެ ޙަމަލާތަކުގައި ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ބޮޑެތި ގެއްލުންތަކެއް ލިބުނު ކަމުގައެވެ. އަދި, އެ ޤައުމުގެ ބޮޑުވަޒީރު ޑެނިސް ޝްމިހަލް ވިދާޅުވީ, ޔޫކްރެއިންގެ 15 ސަރަޙައްދެއްގައިވާ ރަށްތަކަށް ރަޝިޔާގެ ޙަމަލާތައް އަމާޒު ކޮށްފައިވާ ކަމުގައެވެ.
ނޭޓޯގެ މެންބަރު ޤައުމެއް ކަމުގައިވާ ޕޮލެންޑުން ވެސް ވަނީ, އެ ޤައުމުގެ ވައިގެ ސަރަޙައްދަށް ޑްރޯނެއް ފަދަ އުޅަނދެއް އެތެރެވެފައިވާ ކަމުގައެވެ. އެ އުޅަނދު, ޕޮލެންޑުގެ ސަރަޙައްދަކަށް ޖައްސާފައިވާ ކަމަށް ބެލެވޭ ކަމަށާއި, އެ އުޅަނދު ހޯދުމުގެ މަސައްކަތް ކުރަމުންދާ ކަމުގައި ވެސް އެ ޤައުމުން ބުންޏެވެ. "ބޮޑަށް ވައްތަރީ ޑްރޯނަކާ. އޭތި ދަތުރު ކުރި މަގާއި, ދަތުރު ކުރި ގޮތަށް ބަލާއިރު އެއީ މިސައިލެއް ނޫން ކަމަށް ބެލެވޭ،" ޕޮލެންޑުގެ އަސްކަރިއްޔާގެ ތަރުޖަމާނު ޔަތުސެކް ގުރަޝެވްސްކީ ވިދާޅުވިއެވެ.
މި ކަމާ ގުޅިގެން, ޒެލެންސްކީ ވަނީ ރަޝިޔާގެ މިސައިލާއި ޑްރޯންތައް ދިފާޢު ކޮށް ވައްޓައިލުމުގައި އެ ޤައުމަށް އެހީތެރިކަން ފޯރުކޮށްދޭން ޕޮލެންޑުގެ ސަރުކާރަށް ގޮވައިލައްވާފައެވެ. އަދި, ހުޅަނގުގެ ޤައުމުތަކުން ފޮނުވަމުންދާ ދުރު-ރާސްތާ ހަތިޔާރު, ރަޝިޔާގެ ރަށްތަކަށް ޙަމަލާ ދިނުމަށް ބޭނުން ކުރުމުގެ ހުއްދަ ދިނުމަށް ވެސް ޒެލެންސްކީ ވަނީ ތަކުރާރުކޮށް ގޮވައިލައްވާފައެވެ.
ޔޫކްރެއިނަށް އެންމެ ފަހުން ދީފައިވާ ޙަމަލާތައް އަމާޒު ކޮށްފައި ވަނީ ހަކަތަ އުފައްދާ މަރުކަޒުތަކަށާއި ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ކަން ރަޝިޔާގެ ދިފާޢީ ވުޒާރާއިން އެއްބަސްވިއެވެ. އެ ތަންތަނަށް ޙަމަލާ ދީފައި ވަނީ, އަސްކަރީ މަތިންދާބޯޓުތަކަށް ބޭނުންވާ ހަތިިޔާރު އެ ތަންތަނުގައި ރައްކާކޮށްފައި ހުރުމުން ކަމަށް ވެސް އެ ވުޒާރާއިން ބުންޏެވެ.