މެލޭޝިޔާގެ އިދިކޮޅު ލީޑަރު އަދި ކުރީގެ ބޮޑުވަޒީރު މުޙްޔިއްދީން ޔާސީނާ ދެކޮޅަށް ބަޣާވާތަކަށް ހިތްވަރު ދިނުމުގެ ދަޢުވާ އުފުލައިފިއެވެ. މުޙްޔިއްދީންގެ ޤާނޫނީ ވަކީލު ބުނީ, އޭނާއާ ދެކޮޅަށް ދަޢުވާ އުފުލާފައި ވަނީ މެލޭޝިޔާގެ ކުރީގެ ރަސްގެފާނާ ދެކޮޅަށް ދެއްކެވި ވާހަކައަކާ ގުޅުވައި ކަމުގައެވެ. އޭނާއާ ދެކޮޅަށް ދަޢުވާ އުފުލާފައި ވަނީ މެލޭޝިޔާގެ އިރުއުތުރު ކެލަންތަން ސްޓޭޓްގެ ކޯޓެއްގައެވެ.
މުޙްޔިއްދީން ބޮޑުވަޒީރު ކަމުގެ މަޤާމު ފުރުއްވާފައި ވަނީ 2020ން 2021އަށް, 17 މަސްދުވަހުގެ މުއްދަތަކަށެވެ. އޭނާގެ ޤާނޫނީ ވަކީލު ބުނީ, މުޙްޔިއްދީނާ ދެކޮޅަށް ދަޢުވާ އުފުލާފައި ވަނީ މެލޭޝިޔާގެ ކުރީގެ ރަސްގެފާނު އަލް-ސުލްޠާން ޢަބްދުالله އަޙްމަދު ޝާޙާ ދެކޮޅަށް ވާހަކަ ދެއްކެވުމާ ގުޅިގެންނެވެ. އަދި, އެ ވާހަކަތަކަކީ ބަޣާވާތަކަށް ހިތްވަރު ދިނުމުގެ ޢަމަލެއްގެ ގޮތުގައި ބަލައި ކަމުގައެވެ. ނަމަވެސް, މުޙްޔިއްދީން ވަނީ އޭނާއާ ދެކޮޅަށް ހުށަހަޅާފައިވާ ދަޢުވާއަށް އިންކާރު ކުރައްވާފައެވެ.
މެލޭޝިޔާގައި ޢަމަލު ކުރަމުންދާ ސެޑިޝަން ޤާނޫނުގެ ދަށުން, އެ ޤައުމުގެ ރަސްކަމާ ދެކޮޅަށް އަޑު އުފުލައި, ބަދުބަސް ރައްދު ކުރުމަކީ ޤާނޫނީ ކުށެކެވެ. ނަމަވެސް, އޮގަސްޓު 15ވަނަ ދުވަހު ބޭއްވި ސިޔާސީ އެއްވުމެއްގައި ކުރީގެ ރަސްގެފާނު އަލް-ސުލްޠާން ޢަބްދުاللهއަށް މުޙްޔިއްދީން ފާޑު ވިދާޅުވެފައިވެއެވެ.
މުޙްޔިއްދީން ވިދާޅުވީ, 2022ވަނަ އަހަރު ބޭއްވި ޢާންމު އިންތިޚާބަށް ފަހު އޭނާގެ ޕާޓީން އައު ސަރުކާރެއް އެކުލަވައިލެވޭ މިންވަރަށް ޤާނޫނު ހަދާ މަޖިލީހުގެ މެންބަރުންގެ ތާޢީދު ހޯދި ނަމަވެސް, ސަރުކާރު އެކުލަވައިލައި ބޮޑުވަޒީރު ކަމުގެ މަޤާމާ ހަވާލުވުމަށް ރަސްގެފާނު އޭނާއަށް ފުރުޞަތު ދެއްވާފައި ނުވާ ކަމުގައެވެ. އަދި, އެ އަމަލާ އެކު ރަސްގެފާނުގެ އިތުބާރު ގެއްލިފައިވާ ކަމަށް އޭނާ ވިދާޅުވިއެވެ.
2022 ނޮވެންބަރުގެ އިންތިޚާބަށް ފަހު ރަސްގެފާނު އަލް-ސުލްޠާން ޢަބްދުالله އައު ސަރުކާރު އެކުލަވައިލުމުގެ ފުރުޞަތު އަރުވާފައި ވަނީ ބޮޑުވަޒީރު އަންވަރު އިބްރާހީމަށެވެ. އަދި, ކޮންމެ ފަސް އަހަރަކުން މެލޭޝިޔާގެ ރަސް ކަމުގެ ތަޚުތު, އެހެން ރަސްގެފާނެއްގެ މައްޗަށް ފުރޮޅިގެންދާއިރު, ރަސްގެފާނު އަލް-ސުލްޠާން ޢަބްދުاللهގެ ރަސްކަން ވަނީ ޖަނަވަރީ މަހު ނިމުމަކަށް އައިސްފައެވެ. އޭނާއާ މެދު މުޙްޔިއްދީން ކުރައްވާފައިވާ ތުހުމަތުތަކަށް ރަސްގެފާނު ޢަބްދުالله ރައްދު ދެއްވާފައެއް ނެތެވެ. މެލޭޝިޔާގެ ރަސްކަމަށް އެ ޤައުމުގެ ރައްޔިތުން އިޙުތިރާމު ކުރި ނަމަވެސް, އެއީ ރަމްޒީ މަޤާމެކެވެ.
ރަސްގެފާނު އަލް-ސުލްޠާން ޢަބްދުاللهއަަށް ފާޑުވިދާޅުވެ ވާހަކަ ދެއްކެވުމަކީ ބަޣާވާތަކަށް ހިތްވަރު ދިނުމުގެ ގޮތުގައި ބަލައި މުހްޔިއްދީންގެ މައްޗަށް އުފުލާފައިވާ ދަޢުވާ ސާބިތުވެއްޖެ ނަމަ, އޭނާއަށް ތިން އަހަރު ދުވަހުގެ ޖަލު ހުކުމަކާ ކުރިމަތިލައްވަން ޖެހިވަޑައިގަންނަވާނެއެވެ. އަދި, 1,148 އެމެރިކާ ޑޮލަރުގެ ޖޫރިމަނާއެއް ދައްކަވަން ޖެހިވަޑައިގަންނަވާނެވެ.
މީގެ އިތުރުން, ބޮޑުވަޒީރު ކަމުގެ މަޤާމު ފުރުއްވަމުން ގެންދެވިއިރު ޚިޔާނާތުގެ އަމަލުތައް ހިންގަވައި, މަނީ ލޯންޑްރިންގގެ ކުށް ކުރައްވާފައިވާ ކަމުގެ ތުޙުމަތު ވެސް މުޙްޔިއްދީންގެ މައްޗަށް ކުރެވެއެވެ. އެ މައްސަލައިގެ ޝަރިޢަތް މިހާރު ދަނީ ހިނގަމުންނެވެ. އެއީ, ސިޔާސީ ދަޢުވާތެއް ކަމަށް އޭނާ ގަބޫލު ކުރައްވައެވެ. ނަމަވެސް, އެއީ ސިޔާސީ މަޤުޞަދެއްގައި އުފުލާފައިވާ ދަޢުވާތަކެއް ނޫން ކަމަށް އަންވަރު ގެ ސަރުކާރުން ބުންޏެވެ.