ގިނަ ޢަދަދެއްގެ މިސައިލާއި ޑްރޯން ބޭނުންކޮށް ރަޝިޔާއިން ޔޫކްރެއިންގެ ރަށްތަކަށް އަނެއްކާ ވެސް ވަރުގަދަ ޙަމަލާތަކެއް ދީފިއެވެ. އެއީ, ރަޝިޔާއިން ޔޫކްރެއިންގެ ވެރިރަށް ކީވްގެ އިތުރުން ޢާންމުން ދިރިއުޅޭ ބޮޑެތި ރަށްތަކަށް އަމާޒުކޮށް ވަރުގަދަ ޙަމަލާތަކެއް އަމާޒު ކުރަމުންދާ ދެވަނަ ދުވަހެވެ.
ޔޫކްރެއިނުން ބުނީ, ރަޝިޔާގެ އެންމެ ފަހުން ދިން ޙަމަލާތަކުގައި ޢާންމުންގެ ހަތަރު މީހުން މަރުވި ކަމުގައެވެ. އޭގެ ތެރެއިން ދެ މީހަކު މަރުވީ އެ ޤައުމުގެ މެދުތެރޭގައި އޮތް ކްރެވޮޔީ ރީހަށް ދިން ޙަމަލާތަކެއްގައި ކަމަށް އެ ސަރަޙައްދުގެ އޮފިޝަލުން ހާމަ ކުރިއެވެ. އެ މީހުން މަރުވީ, އެ ސަރަޙައްދުގައި ހުންނަ ހޮޓަލަކަށް އަމާޒުކޮށް ރަޝިޔާއިން ދިން ޙަމަލާތަކެއްގައެވެ. އެ ސަރަޙައްދުގެ އޮފިޝަލުން ބުނީ ޙަމަލާތަކުގައި އެ ހޮޓާ ސުންނާފަތިވެ, ބިމާ ހަމަވެފައިވާ ކަމުގައެވެ.
އެ ޙަމަލާގައި ފަސް މީހުން ޒަޚަމުވި ކަމަށާއި, އިމާރާތުގެ ދަށުގައި އިތުރު ދެ މީހުން ތާށިވެފައިވާ ކަމަށް ބެލެވޭ ކަމުގައި ދްނީޕްރޮޕެތްރޮވްސްކާގެ ގަވަރުނަރު ސަރްހީ ލީސަކް ވިދާޅުވިއެވެ. ކްރެވޮޔީ ރީހަށް ދީފައިވާ ޙަމަލާތަކުގައި ހަ ފިހާރައަކާއި, ޢާންމުން ދިރިއުޅޭ ހަތަރު އެޕާޓްމަންޓް އިމާރާތާއި އަށް އެއްގަމު އުޅަނދަށް ބޮޑެތި ގެއްލުންތަކެއް ލިބުނު ކަމުގައި ވެސް އޭނާ ވިދާޅުވިއެވެ.
އިތުރު ދެ މީހުން މަރުވީ ދެކުނުގައި އޮތް ޒަޕޮޮރީޜިޔާއަށް ދިން ޙަމަލާތަކެއްގައެވެ. ވެރިރަށް ކީވަށް އަމާޒުކޮށް ދީފައިވާ ޙަމަލާތައް ދިފާޢު ކުރަން ޔޫކްރެއިންގެ އަސްކަރިއްޔާއިން ވަނީ ވައިގެ ދިފާޢީ ނިޒާމު ބޭނުން ކޮށްފައެވެ. ޒަޕޮރީޜިޔާގެ ސަރަޙައްދީ ގަވަރުނަރު އިވާން ފެދެރޮވް ވިދާޅުވީ, ރަޝިޔާގެ ޙަމަލާތަކުގައި ހަތަރު މީހުން ޒަޚަމުވި ކަމުގައެވެ. "މިހާ ބޮޑު ގެއްލުންތަކެއް ލިބިފައި ވަނީ ޝާހިދު މަރުކާގެ އަސްކަރީ ޑްރޯންތަކެއް ބޭނުން ކޮށްގެން ޙަމަލާ ދިނުމުން،" އޭނާ ވިދާޅުވިއެވެ.
އޮގަސްޓު 26ވަނަ ދުވަހު ވެސް ރަޝިޔާއިން ވަނީ 200އެއްހާ ޑްރޯނާއި މިސައިލް ބޭނުން ކޮށްގެން ރަޝިޔާގެ މައި ރަށްތަކަށް ވަރަގަދަ ޙަމަލާތަކެއް ދީފައެވެ. އެ ޙަމަލާތަކުގައި ޢާންމުންގެ ހަތް މީހުން މަރުވެފައިވާއިރު, ގިނަ ޙަމަލާތައް އަމާޒު ކޮށްފައި ވަނީ ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށެވެ. އެމެރިކާގެ ރައީސް ޖޯ ބައިޑަން ވަނީ އެ ޙަމަލާތައް ކުށްވެރި ކުރައްވާފައެވެ.
މަސްރަޙު ދިރާސާ ކުރާ ފަރާތްތަކުން ބުނީ, ރަޝިޔާގެ ޙަމަލާތައް ދެވަނަ ދުވަހަށް ދިގުދެމިގެން ދިޔަ ނަމަވެސް, މި ފަދަ ބޮޑެތި ޙަމަލާތަކެއް ޖެހިޖެހިގެން ގިނަ ދުވަސްތަކެއް ވަންދެން ދިނުމުގެ ގާބިލުކަން އެ ޤައުމުގެ އަސްކަރިއްޔާގެ ކިބައިގައި ނެތް ކަމުގައެވެ. ރަޝިޔާ-ޔޫކްރެއިންގެ ހަނގުރާމައިގެ މަޢުލޫމާތު ހާމަކުރާ ރަޝިޔާގެ ބްލޮގަރުން ބުނީ, ޔޫކްރެއިނަށް އެންމެ ފަހުން ދީފައިވާ ޙަމަލާތަކަކީ ކޫރްސްކް ޢުދުވާނުގެ ބަދަލު ހިފުމުގެ ގޮތުން ދީފައިވާ ޙަމަލާތަކެއް ކަމުގައެވެ.
ސަރަޙައްދީ ރޮނގު ހުރަސްކޮށް ޔޫކްރެއިންގެ ލަޝްކަރަކުން ރަޝިޔާގެ ހުޅަނގުގައި އޮތް ކޫރްސްކް ސަރަޙައްދަށް އަރާފައި ވަނީ އޮގަސްޓު 6ވަނަ ދުވަހުއެވެ. އަދި, ޔޫކްރެއިނުން ދަނީ އެ ސަރަޙައްދުގެ ރަށްތަކާއި އަވަށްތަކަށް އަތްގަދަ ކުރަމުންނެވެ. އެ ސަރަޙައްދުގެ 1,200އެއްހާ އަކަ ކިލޯމީޓަރުގެ ސަރަޙައްދަކަށް އަތްގަދަ ކޮށްފައިވާނެ ކަމަށް ޔޫކްރެެއިނުން ބުންޏެވެ. އެ ސަރަޙައްދަށް އަރާފައިވާ ޔޫކްރެއިންގެ ފައުޖުތަކަށް ފަހަތަށް ޖައްސަން ރަޝިޔާގެ ސިފައިން އަދިވެސް ދަނީ މަސައްކަތް ކުރަމުންނެވެ.
ރަޝިޔާއިން ޔޫކްރެއިނަށް އެންމެ ފަހުން ދީފައިވާ ވައިގެ ޙަމަލާތަކުގައި ލިބުނު ގެއްލުން ވަޒަން ކުރެވިފައި ނުވާ ކަމަށް ޔޫކްރެއިނުން ބުންޏެވެ. ޔޫކްރެއިންގެ ވައިގެ ސިފައިން ބުނީ, އެ ޙަމަލާތަކުގައި ރަޝިޔާއިން ގިނަ ޢަދަދެއްގެ އަސްކަރީ ޑްރޯން ބޭނުން ކޮށްފައިވާ ކަމުގައެވެ. އަދި, ރަޝިޔާގެ ޓޫ-85އާއި މިގް-31 މަރުކާގެ ގިނަ ޢަދަދެއްގެ އަސްކަރީ މަތިންދާބޯޓު ބޭނުން ކޮށްފައިވާ ކަމުގައެވެ.
ރަޝިޔާގެ ޙަމަލާތައް ޔޫކްރެއިންގެ ޢާންމުން ދިރިއުޅޭ ސަރަޙައްދުތަކަށް އަމާޒު ކުރަމުންދާ ކަމަށް އެ ޤައުމުން ކުރަމުންދާ ތުހުމަތުތައް ރަޝިޔާއިން ދޮގު ކުރެއެވެ. ރަޝިޔާގެ ދިފާޢީ ވުޒާރާއިން ބުނީ ޙަމަލާތައް އަމާޒު ކޮށްފައި ވާނީ އަސްކަރީ މަރުކަޒުތަކާއި, ހަތިޔާރު ގުދަންތަކުގެ އިތުރުން ކަރަންޓުގެ ޚިދުމަތް ދިނުމަށް ބޭނުން ކުރާ ވަސީލަތްތަކަށް ކަމުގައެވެ. އެ ތަންތަނުގައި ހަތިޔާރު ރައްކާކޮށްފައި ހުރި ކަމަށް ރަޝިޔާއިން ތުހުމަތު ކުރެއެވެ.