ޔަހޫދީންގެ އަޅުވެތި ކަމަށް ކެތް ނުކުރެވިގެން, ދެކޮޅު ހެދުމުގެ ގޮތުން ފަލަސްޠީނުގެ ޣައްޒާގައި ވެރިކަން ކުރާ ޙަމާސް ޖަމާޢަތުން ޒަޔަނިސްޓު ދަޢުލަތަށް ދިން ކުއްލި ޙަމަލާގެ ތެރެއިން ރަހީނު ކޮށްގެން ގެންގޮސްފައިވާ އަސީރުންގެ ތެރެއިން އެކަކު ސަލާމަތް ކޮށްފިއެވެ. އޭނާ ފެނިގެން ސަލާމަތް ކޮށްފައި ވަނީ ޣައްޒާގެ ދެކުނުގެ ސަރަޙައްދެއްގައި ބިނާ ކޮށްފައިވާ ބިންގަރާހެއްގެ ތެރެއިންނެވެ. ބަދަވީ ދަރިކޮޅަށް ނިސްބަތްވާ 52 އަހަރުގެ ޤާޔިދު ފަރްޙާން އަލް-ޤާޟީ މިހާރު ވަނީ ޔަހޫދީންގެ ހަސްފަތާލަކަށް ގެންގޮސްފައެވެ.
ރަހީނު ކޮށްފައިވާ އަސީރުންނަށް ޙަމާސްގެ މުޖާޙިދުން އިންސާނިއްޔަތާ ޚިލާފު އަނިޔާތައް ދެމުންދާ ކަމަށް ޔަހޫދީން ދަނީ ތުހުމަތު ކުރަމުންނެވެ. ނަމަވެސް, އަލް-ޤާޟީ ހަސްފަތާލަށް ގެންގޮސް ހަދާފައިވާ ތަހްލީލުތަކުން, އޭނާއަށް އެއްވެސް އަނިޔާތަކެއް ދީފައިވާ ކަން ކަށަވަރު ކުރެވިފައެއް ނެތެވެ. އަދި, އޭނާގެ ޞިއްޙީ ހާލު ރަނގަޅު ކަމުގައި ޑޮކްޓަރުން ވަނީ ހާމަ ކޮށްފައެވެ.
ޔަހޫދީންގެ މީޑިޔާތަކުން ބުނީ, ޙަމާސުން އަލް-ޤާޟީ ބަހައްޓާފައި ހުރީ އެހެން އަސީރަކާ އެކުގައި ކަމުގައެވެ. އަދި, ޤާޟީއާ އެކު ބަހައްޓާފައި ހުރި ދެވަނަ މީހާ މަރުވެފައިވާ ކަން ރިޕޯޓު ކޮށްފައިވީ ނަމަވެސް, އޭނާ މަރުވި ސަބަބު ހާމަ ކޮށްފައެއް ނެތެވެ. ޔަހޫދީ ފައުޖުން ބުނީ, ޤާޟީ ފެނުނުއިރު އޭނާ ހުރީ އެކަނި ކަމުގައެވެ. އޭނާ ސަލާމާތް ކުރެވުމަކީ ޔަހޫދީ ފައުޖަށް ލިބުނު ވަރަށް ބޮޑު ކާމިޔާބީއެއްގެ ގޮތުގައި ޒަޔަނިސްޓުންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ ވަނީ ސިފަ ކޮށްފައެވެ.
ޔަހޫދީ އަސީރުންގެ ޢާއިލާތަކުން ވެސް ވަނީ ޤާޟީ ސަލާމަތް ކުރުމުން އެ ކަމަށް މަރުޙަބާ ކިޔާފައެވެ. ނަމަވެސް, އެ ޢާއިލާތަކުގެ މެންބަރުން ހިމެނޭ ޖަމުޢިއްޔާ, ހޮސްޓޭޖް ފެމިލީސް ފޯރަމުން ބުނީ, ޣައްޒާގެ މުސްލިމުން ޝަހީދުކޮށް ނެތިކޮށްލަން ލާއިންސާނީ ޢުދުވާންތަކެއް ހިންގައިގެން ޙަމާސްގެ ބެލުމުގެ ދަށުގައި ބާކީ ތިބި 100އެއްހާ އަސީރުން މިނިވަން ކުރެވޭނެ ކަމަށް ގަބޫލު ނުކުރާ ކަމުގައެވެ. އަދި, ޢުދުވާންތައް ވަގުތުން ހުއްޓައިލަން އެއްބަސްވާން އެ ޖަމުޢިއްޔާއިން ވަނީ ބިރުބަވެރި ނަތަންޔާހޫއަށް ގޮވައިލާފައެވެ.
"މި ކަމަށް އޮތް ހަމައެކަނި ޙައްލަކީ އެއްބަސްވުމެއް އެކުލަވައިލުން. މިހާރު ހުށަހަޅާފައިވާ އެއްބަސްވުމަށް ރުހުން ދޭން ޙަމާސް ޖަމާޢަތަށް ވެސް ބާރު އެޅުމަށް ބައިނަލްއަޤުވާމީ މުޖުތަމަޢަށް އަޅުގަނޑުމެން ގޮވައިލަން. ޢުދުވާން ހިންގައިގެން ބާކީ ތިބި އަސީރުން މިނިވަނެއް ނުކުރެވޭނެ،" އެ ޖަމާޢަތުން ނެރުނު ބަޔާނެއްގައި ބުންޏެވެ. މުސްލިމުން ޝަހީދު ކުރަން ނިރުބަވެރި ނަތަންޔާހޫ ހިންގަމުންދާ ލާއިންސާނީ ޢުދުވާން ހުއްޓައިލަން ގޮވައިލައި އެތަކެއް ހާސް ބަޔަކު އަދިވެސް ދަނީ ޔަހޫދީންގެ ވެރިރަށް ތެލް އަވީވުގެ މަގުތަކުގައި ސިލްސިލާ މުޒާހަރާތައް ބާއްވަމުންނެވެ.
ޙަމާސްގެ ބެލުމުގެ ދަށުގައި 108 އަސީރުން އަދިވެސް ތިބި ކަމަށް ޤަބޫލު ކުރެވޭ އިރު, އޭގެ ތެރެއިން ތިންބައިކުޅަ އެއްބައި މީހުން މަރުވެފައިވާ ކަމަށް ބެލެވެއެވެ. ޙަމާސުން ބުނީ, އަސީރުންގެ ތެރެއިން ބަޔަކު މަރުވެފައި ވަނީ ބެލުމެއް އަދި ހައްދެއް ނެތި ޔަހޫދީ ފައުޖުން ޣައްޒާގެ އެކި ސަރަޙައްދުތަކަށް ދެމުންދާ ރަޙުމު ކުޑަ ޙަމަލާތަކުގައި ކަމުގައެވެ. ޙަމާސުން މީީގެ ކުރިން މިނިވަން ކޮށްފައިވާ ބައެއް އަސީރުން ވެސް އެ ކަމަށް ހެކިވެއެވެ.
ޔަހޫދީ ފައުޖުން މިހާރު ވެސް ދަނީ ޣައްޒާގެ އެކި ކަންކޮޅުތަކަށް ވަރުގަދަ ޙަމަލާތަކެއް އަމާޒު ކުރަމުންނެވެ. އެންމެ ފަހުގެ ޙަމަލާތައް އަމާޒު ކޮށްފައި ވަނީ ދަޔިރް އަލް-ބަލަޙާއި ޚާން ޔޫނިސަށެވެ. ދަޔިރް އަލް-ބަލަޙް ހުސް ކުރަން ޔަހޫދީ ފައުޖުން ދާދި ފަހުން އެންގުމުން, އެ ރަށުގައި ތިބި އެތަކެއް ހާސް ބަޔަކު ވަނީ ރައްކާތެރި ކަމަށް ބެލެވޭ ސަރަޙައްދުތަކަށް ބަދަލުވެފައެވެ. ފާއިތުވި 24ވަރަކަށް ގަޑިއިރުގެ ތެރޭގައި ޔަހޫދީ ފައުޖުން އެ ރަށަށް ދީފައިވާ ޙަމަލާތަކުގައި 20އަށްވުރެ ގިނަ މީހުން ޝަހީދު ކޮށްލިއެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި މައުސޫމު ކުޑަކުދިންނެވެ.
މީގެ އިތުރުން, ފަލަސްޠީނުގެ ހުޅަނގު އައްސޭރިއަށް އަރައި ވެސް ޔަހޫދީ ފައުޖުން މި ވަގުތު ދަނީ ޢުދުވާން ހިންގަމުންނެވެ. ހުޅަނގު އައްސޭރީގެ ޖަނީނާއި ޠުލްކަރްމަށް ޔަހޫދީ ފައުޖުގެ ހައްދުފަހަނަ އެޅި ސަތޭކައެއްހާ ސިފައިން ވަނީ އަރައިގަނެފައެވެ. އަދި, އެ ރަށްތަކުގެ މުސްލިމުންނަށް އަމާޒުކޮށް ދެމުންދާ ޙަމަލާތަކުގައި ނުވަ މީހުން ޝަހީދު ކޮށްލާފައިވާ ކަމުގައި އޮފިޝަލުން ބުންޏެވެ.
2023 އޮކްޓޫބަރު 7ގައި ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 40,534އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 93,778އަށް އުފުލިފައެވެ.