ނޮވެންބަރު މަހު އެމެރިކާގައި ބާއްވާ ރިޔާސީ އިންތިޚާބުގައި ވާދަކުރައްވާ ރިޕަބްލިކަން ޕާޓީގެ ކެނޑިޑޭޓު, ކުރީގެ ރައީސް ޑޮނަލްޑް ޓްރަމްޕުގެ މައްޗަށް ވެރިކަން ކުރާ ޑިމޮކްރެޓިކް ޕާޓީގެ ކެނޑިޑޭޓު, ނައިބު ރައީސާ ކަމަލާ ހެރިސް ކުރި ހޯއްދަވަމުން ގެންދަވާ ކަމަށް ޚިޔާލު ހޯދުުމުގެ ވޯޓުތަކުން ހާމަވެއްޖެއެވެ. މި ގޮތުން, ރޮއިޓަރސް އަދި އިޕްސޮސް ގުޅިގެން އެންމެ ފަހުން ނަގާފައިވާ ވޯޓުގައި ބައިވެރި މީހުންގެ ތެރެއިން 45 އިންސައްތަ މީހުން ވަނީ ހެރިސަށް ތާޢީދު ކުރާ ކަން ހާމަ ކޮށްފައެވެ. އެ ވޯޓުގައި ޓްރަމްޕަށް ތާޢީދު ކުރާ ކަމަށް ބުނެފައި ވަނީ 41 މީހުންނެވެ.
ޖުލައި މަހު ނެގި ރޮއިޓަރސް/އިޕްސޮސް ވޯޓުގެ ނަތީޖާއާ އަޅައިބަލާއިރު, ހެރިސް މި ވަނީ 1 އިންސައްތައިގެ ކުރިއެރުމެއް ހޯއްދަވާފައެވެ. ޕޯލްގެ ނަތީޖާއިން ހާމަވެފައި ވަނީ, ވޯޓުލާ މީހުންގެ ތެރޭގައި ހިމެނޭ އަންހެނުންނާއި, ހިސްޕޭނިކް ނުވަތަ ސްޕެއިން ދަރިފަސްކޮޅުގެ މީހުންގެ ތާޢީދު ހެރިސަށް އިތުރުވެފައިވާ ކަމެވެ. ޚިޔާލު ހޯދުމުގެ ވޯޓުުގައި ބައިވެރި އަންހެނުންނާއި ހިސްޕޭނިކް ދަރިކޮޅުގެ މީހުންގެ ތެރެއިން ގިނަ ބަޔަކު ތާޢީދު ކުރަނީ ހެރިސަށެވެ. އޭނާއަށް ތާޢީދު ކުރާ ކަމަށް 49 އިންސައްތަ މީހުން ހާމަ ކޮށްފައިވާއިރު, ޓްރަމްޕަށް ވޯޓު ދޭނެ ކަމަށް ބުނެފައި ވަނީ އޭގެ ތެރެއިން 36 އިންސައްތައެވެ.
ކުރިން ނަގާފައިވާ ޚިޔާލު ހޯދުމުގެ ވޯޓުތަކުގެ ނަތީޖާއެކޭ އެއްގޮތަށް, ދޮން ނަސްލުގެ އަންހެނުންނާއި ފިރިހެނުންގެ ތާޢީދު އަދިވެސް އޮތީ ޓްރަމްޕަށެވެ. ނަމަވެސް, ވޯޓުގައި ބައިވެރިވި މީހުންގެ ތެރެއިން ޑިގްރީ ފެންވަރަށް ތަޢުލީމު ހާސިލު ކޮށްފައިވާ މީހުންގެ ތާޢީދު ޓްރަމްޕަށް ވަނީ ގެއްލިފައެވެ. އެ މިންގަނޑަށް ފެތޭ މީހުންގެ ތެރެއިން 14 އިންސައްތަ މީހުން ކުރިން ޓްރަމްޕަށް ތާޢީދު ކުރާ ކަން ހާމަކޮށްފައިވީ ނަމަވެސް, އެ އިންސައްތަ ވަނީ 7އަށް ވެއްޓިފައެވެ.
ޑިމޮކްރެޓިކް ޕާޓީގެ ޓިކެޓު ހެރިސަށް އަރުވާފައި ވަނީ, ދެވަނަ ރިޔާސީ ދައުރެއް ކަށަވަރު ކުރައްވަން ކެމްޕޭން ކުރައްވަމުން ގެންދެވި ރައީސް ޖޯ ބައިޑަން އެ ޢަޒުމު ދޫކޮށްލެއްވުމުންނެވެ. ޓްރަމްޕާ ދެކޮޅަށް ބޭއްވި ރިޔާސީ ބަހުސަކާ ގުޅިގެން ކުރިމަތިވި ފާޑުކިޔުންތަކާ އެކު ބައިޑަން ރިޔާސީ ޓިކެޓު ދޫކޮށްލައްވާފައި ވަނީ ޖުލައި 21ވަނަ ދުވަހުއެވެ. އަދި, އޭނާގެ ބަދަލުގައި ހެރިސަށް ތާޢީދު ކުރުމަށް އޭނާ ވަނީ ޕާޓީގެ މެންބަރުންނަށް ގޮވައިލައްވާފައެވެ. އެއިރު, ޚިޔާލު ހޯދުމުގެ ވޯޓުތަކުގައި ތާޢީދު ބޮޑީ ޓްރަމްޕަށެވެ. ނަމަވެސް, ހެރިސްގެ ކެމްޕޭން ވަރުގަދަވެ, މިއަދު މި ވަނީ ހާލަތާއި މަންޒަރު ބަދަލުވެފައެވެ.
ކޮންމެ އިންތިޚާބެއްގައި ވެސް ތާޢީދު ކުރާ ޕާޓީ ބަދަލުވާ ކަމަށް ނުވަތަ ހަމަހަމަ ތާޢީދެއް އޮތް ކަމަށް ފާހަގަ ކުރެވޭ ސްވިންގ ސްޓޭޓްސްތަކުގައި ވެސް ހެރިސް ގެންދަވަނީ ތާޢީދު އިތުރު ކުރައްވަމުންނެވެ. އޭނާގެ ކެމްޕޭންގެ މައިގަނޑު މަޤުޞަދަކީ ވެސް, އެ ސްޓޭޓްތަކުން އިތުރު ވޯޓު ހޯދުމެވެ. 2020ވަނަ އަހަރު ބޭއްވި ރިޔާސީ އިންތިޚާބުގައި ދާދި ހަމަހަކޮށް ދެ ޕާޓީއަށް ތާޢީދު ލިބިފައިވާ ސްވިންގ ސްޓޭޓްތަކުގެ ގޮތުގައި ފާހަގަ ކުރެވުނު ހަތް ސްޓޭޓެއްގައި ޓްރަމްޕަށް އޮތް ތާޢީދު އަދިވެސް ބޮޑެވެ. އޭގެ ތެރޭގައި ވިސްކޮންސިން, ޕެންސިލްވޭނިިޔާ, ޖޯޖިޔާ, އެރިޒޯނާ, އުތުރު ކެރޮލައިނާ, މިޝިގަން އަދި ނެވާޑާގައި ވޯޓުލުމުގެ ޙައްޤު ލިބިގެންވާ މީހުންގެ ތެރެއިން 45 އިންސައްތަ މީހުންގެ ތާޢީދު އޮތީ ޓްރަމްޕަށެވެ. ނަމަވެސް, ހެރިސަށް ތާޢީދު ކުރާ މީހުންގެ ޢަދަދު އިތުރުވެފައިވާއިރު, 43 އިންސައްތަ މީހުން ބުނަނީ އޭނާއަށް ވޯޓު ދޭނެ ކަމުގައެވެ.
ނަމަވެސް, ބްލޫމްބަރގ ނިއުސް އަދި މޯނިންގ ކޮންސަލްޓުން އެ ސްޓޭޓްތަކުގައި ނަގާފައިވާ ޚިޔާލު ހޯދުމުގެ ވޯޓުތަކުން ދެ ބޭފުޅުންނަށް ވެސް ތާޢީދު އޮތް ކަން ހާމަވެފައި ވަނީ ވަރަށް ހަމަހަމަ ކޮށެވެ. "[ބައިޑަންގެ ބަދަލުގައި] ހެރިސާ ވާދަ ކުރުމަކީ ޓްރަމްޕަށް ދަތި ކަމަކަށް ވާނެ ކަން ޚިޔާލު ހޯދުމުގެ ވޯޓުތަކުގެ ނަތީޖާއިން ފެނޭ،" ރިޕަބްލިކަން ޕާޓީގެ ކެމްޕޭން ސްޓްރެޓީޖިސްޓެއް ކަމުގައިވާ މެޓް ވޯކިންގ ބުންޏެވެ.
ޑިމޮކްރެޓިކް ޕާޓީގެ ކެނޑިޑޭޓަކީ ހެރިސް ކަން ކަށަވަރުވުމާ އެކު, އިންތިޚާބާ މެދު އެ ޕާޓީގެ މެންބަރުންގެ މެދުގައި އޮތް ޖޯޝާއި ޝަޢުޤުވެރި ކަން އިތުރުވެފައިވާ ކަން ވެސް ޚިޔާލު ހޯދުމުގެ ވޯޓުތަކުގެ ނަތީޖާއިން ހާމަވެއެވެ. މި ގޮތުން, ރިޔާސީ ރޭހާ ހެރިސް ގުޅިވަޑައިގަތުމުން ވޯޓުގައި ބައިވެރިވާން ބޭނުންވާ ކަން ހާމަ ކޮށްފައިވާ ޕާޓީގެ މެންބަރުންގެ ޢަދަދު 73 އިންސައްތައަށް އިތުރުވިއެވެ. މިއާ އެކު, ވޯޓުލާން ނިކުންނަ އެ ޕާޓީގެ މެންބަރުންގެ ޢަދަދު އެތަކެއް ގުނައަކުން އިތުރުވެގެންދާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
ވަކިވަކި މައްސަލަތަކަށް ބަލައިލާއިރު, ޓްރަމްޕްގެ އިޤުތިޞާދީ ސިޔާސަތުތަކަށް ތާޢީދު ކުރާ މީހުންގެ ޢަދަދު އިތުރު ކަމަށް ވެސް ޚިޔާލު ހޯދުމުގެ ވޯޓުން ފާހަގަވިއެވެ. މި ގޮތުން, ޓްރަމްޕްގެ އިޤުތީޞާދީ ސިޔާސަތުތަކަށް ތާޢީދު ކުރާ މީހުންގެ ނިސްބަތް 45 އިންސައްތައިގައި އޮތްއިރު, އިޤުތިޞާދު ހަމަ މަގަށް އެޅުވުމުގެ ޤާބިލު ކަން ހެރިސްގައި ކިބައިގައި ހުރި ކަމަށް 36 އިންސައްތަ މީހުން ޤަބޫލު ކުރެއެވެ. ނަމަވެސް, އަންހެނުންގެ ޙައްޤުތައް ކަށަވަރު ކޮށްދިނުމާއި, ޚާއްޞަކޮށް އަންހެނުންގެ ޞިއްޙަތާ ބެހޭ މައްސަލަތައް ޙައްލު ކުރެވޭނީ ހެރިސަށް ކަމަށް ވޯޓުގައި ބައިވެރިވި 47 އިންސައްތަ މީހުން ދެކެއެވެ.
ވޯލް ސްޓްރީޓް ޖަރނަލުން އެންމެ ފަހުން ނަގާފައިވާ ޚިޔާލު ހޯދުމުގެ ވޯޓުގައި ހެރިސަށް ޓްރަމްޕްގެ މައްޗަށް ކުރި ލިބިފައި ވަނީ އެންމެ 1 އިންސައްތައިންނެވެ. އެ ވޯޓުގައި ބައިވެރިވި މީހުންގެ ތެރެއިން 48 އިންސައްތަ މީހުން ހެރިސަށް ތާޢީދު އޮތް ކަން ހާމަ ކޮށްފައިވާއިރު, ނޮވެންބަރު 5ގައި ބާއްވާ ރިޔާސީ އިންތިޚާބުގައި ޓްރަމްޕަށް ވޯޓު ދޭނެ ކަމަށް ބުނެފައި ވަނީ 47 އިންސައްތަ މީހުންނެވެ.