ޕާކިސްތާނުގެ ހުޅަނގުދެކުނު ބަލޫޗިސްތާނުގައި ހަރަކާތްތެރިވާ ހަތިޔާރު އެޅި ޖަމާޢަތްތަކަށް އަމާޒުކޮށް އެ ޤައުމުގެ އަސްކަރިއްޔާއިން ވައިގެ ޙަމަލާތަކެއް ދީފިއެވެ. ޕާކިސްތާންގެ އަސްކަރިއްޔާއިން ބަލޫޗިސްތާނަށް ބޮން އަޅަން ފަށާފައި ވަނީ, އެ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތްތަކުން ދާދި ފަހުން ދީފައިވާ ޙަމަލާތަކެއްގެ ބަދަލު ހިފުމުގެ ގޮތުންނެވެ. ފުލުހުންނާއި އަސްކަރިއްޔާގެ އިތުރުން ޢާންމުންނަށް އަމާޒުކޮށް ހަތިޔާރު އެޅި ޖަމާޢަތްތަކުން ދީފައިވާ ޙަމަލާތަކުގައި 50އެއްހާ މީހުން މަރައިލާފައިވެއެވެ.
ޕާކިސްތާންގެ އަސްކަރިއްޔާއިން ބުނީ, ހަތިޔާރު އެޅި ޖަމާޢަތްތަކުން ހަރަކާތްތެރިވާ ސަރަޙައްދުތަކަށް އަމާޒުކޮށް ދީފައިވާ ވައިގެ ޙަމަލާތަކުގައި ހަނގުރާމަވެރިންގެ ފަސް މީހުން މަރައިލައި, އިތުރު ތިން މީހުން ޒަޚަމު ކޮށްލާފައިވާނެ ކަމުގައެވެ. ހަނގުރާމަވެރިން ހަރަކާތްތެރިވަމުން ދިޔަ ތިން ސަރަޙައްދަކަށް ވައިގެ ޙަމަލާތައް އަމާޒު ކޮށްފައިވާނެ ކަމުގައި ވެސް އަސްކަރިއްޔާއިން ބުންޏެވެ.
"[ބަލޫޗިސްތާނުގައި ދާދި ފަހުން ދީފައިވާ] ޙަމަލާތަކުގައި ބައިވެރިވި, އަދި އެ ކަމަށް ހިތްވަރުދިން ގުރޫޕުތަކާއި މީހުން އިންސާފުގެ ކުރިމައްޗަށް ގެނެވެން ދެން [އަސްކަރިއްޔާގެ] އޮޕަރޭޝަން ހުއްޓައިނުލައި ކުރިއަށް ގެންދާނަން،" އަސްކަރިއްޔާއިން ނެރުނު ބަޔާނެއްގައި އިންޒާރު ދިނެވެ.
އަސްކަރިއްޔާއާއި ފުލުހުންނާއި ޢާންމުން ދިރިއުޅޭ ސަރަޙައްދުތަކަށް ދާދި ފަހުން ދީފައިވާ ނިރުބަވެރި ޙަމަލާތަކުގެ ޒިންމާ އުފުލާ ކަމުގައި އެ ސަރަޙައްދުގައި ހަރަކާތްތެރިވާ ހަތިޔާރު އެޅި ޖަމާޢަތް, ބަލޫޗިސްތާން ލިބެރޭޝަން އާމީ (ބީއެލްއޭ)ން ވަނީ ބުނެފައެވެ. އަސްކަރިއްޔާއިން ބުނީ, ޙަމަަލާތައް ފެށުމާ އެކު ރައްދު ޙަމަލާދީ ހަނގުރާމަވެރިންގެ 21 މީހުން މަރައިލާފައިވާނެ ކަމުގައެވެ.
ބީއެލްއޭގެ ޙަމަލާތަކުގެ މަޤުޞަދަކީ, އެ ސަރަޙައްދަށް ސަރުކާރުން ގެންނަން އުޅޭ ޢުމްރާނީ އަދި އިޤުތިޞާދީ ތަރައްޤީއަށް ހުރަސް އެޅުން ކަމަށް ބޮޑުވަޒީރު ޝެހްބާޒް ޝަރީފް ތުހުމަތު ކުރައްވައެވެ. އޭނާ ވިދާޅުވީ, ހަނގުރާމަވެރިންގެ އަމާޒަކީ ޗައިނާ-ޕާކިސްތާން އިކޮނޮމިކް ކޮރިޑޯ (ސީޕީއީސީ) ޕުރޮގުރާމުގެ ދަށުން ހިންގަމުންދާ އިޤުތިޞާދީ އަދި ޢުމްރާނީ ތަރައްޤީގެ މަޝްރޫޢުތައް ހުއްޓުވުން ކަމުގައެވެ.
ޗައިނާގެ ރައީސް ޝީ ޖިންޕިންގގެ ބެލްޓް އެންޑް ރޯޑް އިނިޝިއެޓިވް (ބީއާރްއައި)ގެ ދަށުން ޗައިނާއިން ވަނީ ޕާކިސްތާނުގެ ޢުމްރާނީ ތަރައްޤީއަށް 65 ބިލިޔަން އެމެރިކާ ޑޮލަރު ޚަރަދު ކުރަން ނިންމާފައެވެ. ސީޕީއީސީން ހިންގަމުންދާ މަޝްރޫޢުތަކަކީ ބީއާރްއައިގެ ދަށުން ހިންގަމުންދާ މަޝްރޫޢުތަކެކެވެ. ބަލޫޗިސްތާނަކީ ރަނާއި ރަތުލޯ މައިންތައް މުއްސަނދި ސަރަޙައްދެކެވެ. ޗައިނާއިން ވެސް ވަނީ, އެ ޤައުމުން ބަލޫޗިސްތާނުގައި ހިންގާ މަޝްރޫޢުތައް ހުއްޓުވުމުގެ މަޤުޞަދުގައި ހަނގުރާމަވެރިން ދީފައިވާ ޙަމަލާތައް ކުށްވެރި ކޮށްފައެވެ.
ބަލޫޗިސްތާނުގައި ހިންގަމުންދާ މަޝްރޫޢުތަކުގައި އަމަލީ ގޮތުން މަސައްކަތް ކުރަމުންދާ ޗައިނާގެ ރައްޔިތުންނަށް އޮތް ނުރައްކަލާ މެދު ޗައިނާއިން މީގެ ކުރިން ވެސް ކަންބޮޑުވުން ފާޅުކޮށް, އެ މަޢުލޫމާތު ޕާކިސްތާނުގެ ސަރުކާރާ ހިއްސާ ކޮށްފައިވެއެވެ. އެ ސަރަޙައްދުގައި ހިންގަމުންދާ ހަމަނުޖެހުންތަކުގައި މާރިޗު މަހަށް ފަހު ޗައިނާގެ ހަ އިންޖިނޭރުން ވަނީ މަރުވެފައެވެ. ހަތިޔާރު އެޅި ޖަމާޢަތްތަކުގެ ގިނަ ޙަމަލާތައް އަމާޒު ކުރަމުން ދަނީ ޗައިނާގެ އެހީތެރިކަމާ އެކު ގަވާދަރުގައި ބިނާ ކުރަމުންދާ ބަނދަރަށެވެ.