ޔޫކްރެއިންގެ ސިފައިންގެ ލަޝްކަރެއް ރަޝިޔާގެ ހުޅަނގު ކޫރްސްކް ސަރަޙައްދަށް އަރައިގަނެ, ރަޝިޔާގެ ސަރަޙައްދުތަކަށް އަތްގަދަ ކުރަން ފަށާފައި ވަނީ ޝަރުޢީ ސަބަބަކަށް ޓަކައި ކަމަށާއި, އެއީ ޔޫކްރެއިންގެ ރައްޔިތުންގެ ދިފާޢުގައި ހިންގަމުންދާ އަސްކަރީ އޮޕަރޭޝަނެއްގެ ގޮތުގައި ދެކެވަޑައިގަންނަވާ ކަމުގައި ނޭޓޯގެ ސެކްރެޓަރީ-ޖެނެރަލް ޔެންސް ސްޓޮލްޓެންބަރގް ވިދާޅުވެއްޖެއެވެ. ޔޫކްރެއިންގެ ސިފައިން ކޫރްސްކަށް އަރައި ރަށްތަކަށް އަތްގަދަ ކުރަން ފަށާފައި ވަނީ އޮގަސްޓު 6ވަނަ ދުވަހުއެވެ.
މި ކަމާ ގުޅޭ ގޮތުން ފުރަތަމަ ފަހަރަށް ވާހަކަފުޅު ދައްކަވަމުން ސްޓޮލްޓެންބަރގް ވިދާޅުވީ, އަމިއްލަ ނަސްފުގެ ދިފާޢުގައި ހަނގުރާމަ ކުރުމަކީ ޔޫކްރެއިންގެ ރައްޔިތުންނަށް ލިބިގެންވާ ޝަރުޢީ ޙައްޤެއް ކަމުގައެވެ. "ބައިނަލްއަޤުވާމީ ޤާނޫނުތަކުން ބުނަނީ, ސަރަޙައްދީ ރޮނގާ ހިސާބުން އެ ޙައްޤު ނުހުއްޓޭނެ ކަމަށް،" އޭނާ ވިދާޅުވިއެވެ. ކޫރްސްކުގައި ޢުދުވާން ފެށުމުގެ ކުރިން ކީވުން އެ މަޢުލޫމާތު ނޭޓޯއާ ހިއްސާ ކޮށްފައި ނުވާ ކަމުގައި ވެސް އޭނާ ވިދާޅުވިއެވެ.
ކޫރްސްކް ޢުދުވާނާ ގުޅޭ ގޮތުން ސްޓޮލްޓެންބަރގް ވިދާޅުވީ, ރަޝިޔާގެ ރަށްތަކަށް އަރައިގަތުމަކީ ޔޫކްރެއިނަށް ބޮޑު ހިރާސެއް އޮތް ނުރައްކާތެރި އަމަލެއް ކަމުގައެވެ. ނަމަވެސް, ހަނގުރާމަ ކުރިއަށް ގެންދާނެ ގޮތް ނިންމާނީ ޔޫކްރެއިނުން ކަމުގައި ވެސް އޭނާ ވިދާޅުވިއެވެ.
"[ޔޫކްރެއިންގެ] ރައީސް [ވޮލޮޑޮމީރް] ޒެލެންސްކީ ވިދާޅުވެފައި ވަނީ, އެ އޮޕަރޭޝަނުގެ މައިގަނޑު މަޤުޞަދަކީ ރަޝިޔާއިން ދެމުންދާ ޙަމަލާތައް ހުއްޓުވަން ބަފަރ ޒޯނެއް ގާއިމު ކުރުމޭ. ކޮންމެ އަސްކަރީ އޮޕަރޭޝަނެކޭ އެއްގޮތަށް މީގައި ވެސް ހިރާސްތަކެއް އެބައޮތް. ނަމަވެސް, އަމިއްލަ ދިފާޢުގައި އަޅާނެ ފިޔަވަޅުތައް އިނގޭނީ ޔޫކްރެއިނަށް،" ސްޓޮލްޓެންބަރގް ވިދާޅުވިއެވެ.
ސަރަޙައްދީ ރޮނގު ހުރަސްކޮށް ކޫރްސްކަށް އެރި ޔޫކްރެއިންގެ ފައުޖުން ދަނީ އެ ސަރަޙައްދުގެ ރަށްތަކާއި އަަވަށްތަކަށް އަތްގަދަ ކުރަމުންނެވެ. މި ގޮތުން, 100އެއްހާ އަވަށާ އެކު, އެ ސަރަޙައްދުން 1,200 އަކަ ކިލޯމީޓަރުގެ ސަރަޙައްދަކަށް އަތްގަދަ ކޮށްފައިވާނެ ކަމުގައި ޔޫކްރެއިނުން ބުންޏެވެ. އޭގެ ބަދަލުގައި ރަޝިޔާގެ ސިފައިން ވެސް ދަނީ ޔޫކްރެއިންގެ އިރުމަތީގައި އޮތް ދޮންބާސްގެ އިތުރު ސަރަޙައްދުތަކަށް އަތްގަދަ ކުރަން މަސައްކަތް ކުރަމުންނެވެ. ރަޝިޔާއިން މި ވަގުތު ހިފަން މަސައްކަތް ކުރަނީ ޕޯކްރޮވްސްކެވެ.
ކޫރްސްކަށް ޔޫކްރެއިންގެ ސިފައިން ފޮނުވައި ހަނގުރާމަ ފުޅާކޮށްފައި ވަނީ, ރަޝިޔާ-ޔޫކްރެއިން ހަނގުރާމަ ހުއްޓުމަކަށް ގެނައުމަށް އެކުލަވައިލަމުންދާ ބޮޑު ރޭވުމެއްގެ ދަށުން ކަމުގައި ޒެލެންސްކީ ދާދިފަހުން ވިދާޅުވެފައިވެއެވެ. އޭނާ ވިދާޅުވީ, ހަނގުރާމައަށް ނިމުމެއް ގެނެވޭނީ ރަޝިޔާއާ އެކު ސުލްޙައިގެ މަޝްވަރާތައް ބާއްވައިގެން ކަމަށް ޤަބޫލު ކުރައްވާ ކަމުގައެވެ. ނަމަވެސް, އޭގެ ކުރިން ޔޫކްރެއިން އޮތް މަޤާމު ވަރުގަދަ ކުރަން ޖެހޭ ކަމަށާއި, އެއިރުން މަޝްވަރާތަކުގައި އެ ޤައުމަށް ލިބޭ ބާރާއި ފުރުޞަތު ބޮޑުވެގެންދާނެ ކަމުގައެވެ.
ޔޫކްރެއިންގެ އެންމެ ދެކުނުން އޮތް ކްރައިމިޔާއަށް އަރައިގަނެ, ރަޝިޔާއިން އެ ސަރަޙައްދަށް އަތްގަދަ ކޮށްފައި ވަނީ 2014ވަނަ އަހަރުއެވެ. އަދި, 2022 ފެބުރުވަރީ 24ވަނަ ދުވަހު ފެށި ހަނގުރާމައިގައި ރަޝިޔާއިން ވަނީ ޔޫކްރެއިންގެ ބިމުން 18 އިންސައްތައަށް ވެރިވެގަނެފައެވެ. އޭގެ ތެރޭގައި ޔޫކްރެއިންގެ އިރުމަތީ ދޮންބާސްގެ ލުހާންސްކާއި ދޮންޏެސްކުގެ ބޮޑު ސަރަޙައްދެއްގެ އިތުރުން
ދެކުނުގައި އޮތް ޒަޕޮރީޜިޔާގެ ބައެއް ސަރަޙައްދުތައް ވެސް ހިމެނެއެވެ.