ރޭވިގެން ހިންގާ ބޮޑެތި ކުށްތައް ހުއްޓުވުމަށް ފުލުހުންނަށް އިތުރު ތަމްރީނާއި ވަޞީލަތް ބޭނުންވޭ: ސީޕީ ޝުޖާއު

ކުށުގެ ވެއްޓަށް އަންނަމުންދާ ބަދަލުތަކާއެކު، ކުށްކުރުން ހުއްޓުވުމަށް ފުލުހުންނާއި ފުލުހުންގެ ވަޞީލަތްތައް މިހާރަށްވުރެ ހަރުދަނާވާންޖެހޭކަމަށް ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވެއްޖެއެވެ.

ކޮމިޝަނަރ ވިދާޅުވީ، އެންމެ ބޮޑުވެފައިވާ މަސްތުވާތަކެތީގެ މައްސަލައާއި ގޭންގު ކުށްހުއްޓުވުމަށް ތަފާތުގޮތަކަށް މަސައްކަތް ކުރަން މިހާރު ޖެހިފައިވާކަމަށެވެ.

ދިވެހި ފުލުހުންގެ ޚިދުމަތުގެ ދުވަހުގެ މުނާސަބަތުގައި އިސްކަންދަރު ބިލްޑިންގގައި ބޭއްވި ރަސްމީ ޖަލްސާގައި ވާހަކަދައްކަވަމުން ކޮމިޝަނަރ އޮފް ޕޮލިސް ޢަލީ ޝުޖާއު ވިދާޅުވީ، ކުށުގެ ވެއްޓަށް ބަދަލު އަންނަމުންދާކަމަށާއި އެކަންކަމަށް ފުލުހުން ތަމްރީނު ކުރަންޖެހޭކަމަށެވެ. އަދި މިވަގުތު ރާއްޖެއަށް ކުރިމަތިވެފައިވާ އެންމެ ބޮޑު މައްސަލައަކީ މަސްތުވާތަކެއްޗާއި ގޭންގު ކުށްތައްކަން ފާހަގަކުރައްވާ ސީޕީ ވިދާޅުވީ، އެމައްސަލަތަކާ ދެކޮޅަށް ތަފާތުގޮތަކަށް މަސައްކަތް ކުރަންޖެހިފައިވާކަމަށެވެ.

ޤައުމުގައި ރޭވިގެން ހިނގަމުންދާ ކުށްތައް، އެކުށަށް އަރައިގަތުމުގެ ކުރިން ހުއްޓުވުމަށްޓަކައި ފުލުހުން މިހާރަށްވުރެ ކުޅަދާނަވާންޖެހޭކަމަށް ސީޕީ ވިދާޅުވިއެވެ. އަދި ރާއްޖޭގައި މާލީ ގޮތުން ހިންގަމުންދާ ކުށް ނުވަތަ ފައިނޭންޝަލް ކްރައިމްތައް ތަޙުޤީޤުކުރުމަށް، ފުލުހުންގެ ކެޕޭސިޓީ އެތައް ގުނައަކުން އިތުރުކުރަންޖެހޭކަން ސީޕީ ފާހަގަކުރެއްވިއެވެ.

"ފުލުހުންގެ ތަޙުޤީޤަށް ބޭނުންކުރަމުންދާ ޓެކްނޮލޮޖީއާއި އާޓިފިޝަލް އިންޓެލިޖެންސް ބޭނުންކޮށްގެން ކުށް ހުއްޓުވުމުގެ ޤާބިލުކަން ފުލުހުންނަށް ލައިދޭންޖެހޭ. މިކަން ކޮށްދެއްވާނެކަމުގެ ޔަގީންކަން ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުވަނީ ދެއްވާފައި." ސީޕީ ޝުޖާއު ވިދާޅުވިއެވެ.

ސީޕީ ޝުޖާއުވަނީ 500 އެއްހާ މުވައްޒަފުންނާއެކު މަދަނީ ޚިދުމަތެއްގެ ގޮތުގައި ފެށި ފުލުހުންގެ ޚިދުމަތް ހަރުދަނާކުރެއްވުމަށް ވޭތުވެދިޔަ އެކި ދައުރުތަކުގައި ކުރެވިފައިވާ މަސައްކަތް ފާހަގަކުރައްވާ ޚިދުމަތް ކުރިއެރުވުމަށް މަސައްކަތްކޮށްދެއްވި ހުރިހާ ފަރާތަކަށްވެސް ޝުކުރުއަދާކުރައްވާފައެވެ.

ސީޕީ ވިދާޅުވީ، ފުލުހުންގެ ޚިދުމަތަކީ ޢާއްމުންގެ ތަޢުރީފާއި ފާޑުކިޔުން އަމާޒުވާނެކަމެއްކަން ޤަބޫލުކުރައްވާކަމަށެވެ. އަދި މިވޭތުވެދިޔަ 20 އަހަރުގެ ތެރޭގައި ޚިދުމަތް ހަރުދަނާކުރުމަށް ދިވެހި މީޑިއާއިން ކިޔާފައިވާ ބިނާކުރަނިވި ފާޑުކިޔުމަކީ ވަކިވަކި ފުލުހުންނާއި މުޅި މުއައްސަސާއަށް ހެޔޮ ބަދަލުތައް ގެނައުމުގައި ލިބިގެންދިޔަ ބާރެއްގެގޮތުގައި ފާހަގަކުރެއްވިއެވެ.

ސީޕީ ޝުޖާއުވަނީ ފުލުހުންގެ ޑިއުޓީގައި ހުންނަވަނިކޮށް ޝަހީދުވެފައިވާ ފުލުހުންގެ ހަނދާންވެސް މިޖަލްސާގައި އައުކުރައްވާފައެވެ. އެގޮތުން ދިވެހި ރައްޔިތުންނާއި، ފަސްގަނޑަށްޓަކާ ދިވެހި ފުލުހުން، އަމިއްލަ ފުރާނައާއި ލެއިން ޤުރުބާންވެފައިވާކަން ސީޕީ ފާހަގަކުރެއްވިއެވެ.

ސީޕީވަނީ ރައްޔިތުންގެ އިތުބާރު ހޯދުމަށް ކޮންމެ ފުލުހަކަށްވެސް ކުރެވުނު ކޮންމެ ކަމެއްވެސް ކޮށްދެއްވުމަށް އިލްތިމާސްކުރައްވާފައެވެ. އަދި ރައްޔިތުންނަށް ޚިދުމަތްކުރުމަށްވުރެ ލޯބިކުރާ އެއްވެސްކަމެއް ފުލުހުންނަށް އޮވެގެން ނުވާނެކަމަށް ސީޕީ ވިދާޅުވިއެވެ.

ދިވެހި ފުލުހުންގެ ޚިދުމަތުގެ ދުވަހުގެ މުނާސަބަތުގައި ބޭއްވި ރަސްމީ ޖަލްސާގައި ވަނީ 25 އަހަރު ދުވަހު ފުލުހުންގެ މުއައްސަސާއަށް ޚިދުމަތްކުރައްވާފައިވާ އޮފިސަރުންނަށް ހަނދާނީ ފިލާއަރުވާފައެވެ. އެ އޮފިސަރުންނަށް ހަނދާނީފިލާ ޙަވާލުކޮށްދެއްވީ ކޮމިޝަނަރ އޮފް ޕޮލިސް ޢަލީ ޝުޖާއުއެވެ.

ރާއްޖޭގައި މަދަނީ ޚިދުމަތެއްގެ ގޮތުގައި ފުލުހުންގެ ޚިދުމަތް ދޭންފެށިތާ މިހާރުވަނީ 20 އަހަރުވެފައެވެ. މީގެ 91 އަހަރުކުރިން ނޭޝަނަލް ސެކިއުރިޓީ ސާވިސްގެ ފިޔަވަތީގައި ފޯރުކޮށްދެމުންދިޔަ ފުލުހުންގެ ޚިދުމަތް 2004 ވަނަ އަހަރުގެ ސެޕްޓެންބަރު މަހުގެ 1 ވަނަ ދުވަހުވަނީ މަދަނީ ވަކި މުއައްސަސާއެއްގެ ގޮތުގައި ޤާއިމުކޮށްފައެވެ.