ޔޫކްރެއިންގެ ރައީސް ވޮލޮޑޮމީރް ޒެލެންސްކީ އޭނާގެ ކެބިނެޓަށް ބޮޑެތި ބަދަލުތަކެއް ގެންނެވުމަށް އަމުރު ކުރެއްވުމާ އެކު އޭނާގެ ޚާރިޖީ ވަޒީރު ދްމިތުރޯ ކޫލެބާ އިސްތިޢުފާ ދެއްވައިފިއެވެ. ކެބިނެޓަށް ޒެލެންސްކީ ބޮޑެތި ބަދަލުތަކެއް ގެންނަވަން މަސައްކަތް ފައްޓަވާފައި ވަނީ, ރަޝިޔާ-ޔޫކްރެއިން ހަނގުރާމަ 30ވަނަ މަހަކަށް ދެމިގެން ގޮސްފައިވާ ދަނޑިވަޅެއްގައެވެ. އަދި, އެ ޤައުމަށް އަރާފައިވާ ރަޝިޔާގެ ފައުޖުތަކުން އިރުމަތީ ދޮންބާސްގައި ބޮޑެތި ކުރިއެރުންތަކެއް ހޯދަމުންދާ ވަގުތެއްގައެވެ.
43 އަހަރުގެ ކޫލެބާއަކީ ޒެލެންސްކީއަށް ފަހު ބައިނަލްއަޤުވާމީ މައިދާނުގައި ޔޫކްރެއިންގެ އެންމެ މުހިންމު އެއް މޫނެވެ. ރަޝިޔާގެ ފައުޖުތަކާ ދެކޮޅަށް ހަނގުރާމަ ކުރަމުންދާ ޔޫކްރެއިންގެ ސިފައިންނަށް ބޭރުގެ އަސްކަރީ އެހީތެރިކަން ހޯދަން, އިނގިރޭސި ބަހަށް ފަރިތަ ކޫލެބާ ގިނަގުނަ މަސައްކަތްތަކެއް ކުރައްވާފައިވެއެވެ. ކެބިނެޓަށް ޒެލެންސްކީ ގެންނަވާ ބަދަލުތަކާ ގުޅިގެން ކޫލެބާގެ އިތުރުން ފަސް ވަޒީރަކު ވަނީ އިސްތިޢުފާ ހުށަހަޅުއްވާފައެވެ. އޭގެ ތެރެއިން ބައެއް ބޭފުޅުންނަށް އެހެން މަޤާމުތައް ހަމަޖައްސާނެ ކަމަށް ބެލެވެއެވެ.
ކޫލެބާގެ އިތުރުން އިސްތިޢުފާ ދެއްވާފައިވާ ބައެއް ބޭފުޅުންގެ ތެރޭގައި ސްޓްރެޓީޖިކް އިންޑަސްޓްރީޒާ ބެހޭ ވަޒީރު އޮލެކްސާންދްރަ ކަމީޝިން, ބޮޑުވަޒީރުގެ ނައިބު އޮލްހާ ސްޓެފަނިޝަނާ އަދި ޝަރުޢީ ދާއިރާއާއި, ތިމާވެއްޓާ ބެހޭ ވަޒީރުގެ އިތުރުން ޢުމްރާނީ ތަރައްޤީއާ ބެހޭ ވަޒީރު ހިމެނެއެވެ. އޭގެ އިތުރުން, ހަތިޔާރު އުފެއްދުމުގެ ކަންކަން ވިލަރެސް ކުރާ ވަޒީރު ވެސް ވަނީ އިސްތިޢުފާ ދެއްވާފައެވެ. މި ބަދަލުތަކަކީ, ކުރިއަށް އޮތް ފިނި މޫސުމުން ފެށުމުގެ ކުރިން ޔޫކްރެއިންގެ ސަރުކާރު އަލުން އެކުލަވައިލަން ޒެލެންސްކީ ކުރައްވާ މަސައްކަތެއްގެ ގޮތުގައި އޭނާގެ މުޝީރުން ބުންޏެވެ.
ޒެލެންސްކީ ވިދާޅުވީ, ކެބިނެޓަށް ބޮޑެތި ބަދަލުތަކެއް ގެނައުމަކީ ކުރިއަށް އޮތް ދުވަސްތަކުގައި ޔޫކްރެއިނުން ހާސިލު ކުރަން ބޭނުންވާ ލަނޑުދަނޑިތައް ކާމިޔާބު ކުރަން ބޭނުންވާ މުހިންމު ބަދަލުތަކެއް ކަމުގައެވެ. "ޚަރީފު މޫސުމަކީ ޔޫކްރެއިނަށް މުހިންމު ވަގުތެއް. އަޅުގަނޑުމެންގެ ލަނޑުދަނޑިތައް ހާސިލު ކުރަން މުވައްސަސާތައް އޮންނަން ވާނީ އެންމެ ފުރިހަމަ ތައްޔާރީ ހާލަތެއްގައި. އެއީ އެންމެންގެ ރަނގަޅަށް ގެންނަ ބަދަލެއް،" އޭނާ ވިދާޅުވިއެވެ.
އެ ބަދަލުތަކާ ގުޅިގެން ޔޫކްރެއިންގެ އިދިކޮޅު ވެރިޔާ އިރީނާ ހެރާޝްޗެންކޯ ވަނީ ޒެލެންސްކީއަށް ވަރަށް ބޮޑަށް ފާޑު ވިދާޅުވެފައެވެ. "މި ސަރުކާރަކީ ވަޒީރުންނާ ނުލައި ހިންގާ ސަރުކާރެއް. މިއީ, ވިސްނުންތެރި ގޮތުން އަދި އަމިއްލަ ގޮތުން ބަލާއިރު ވެސް ބޮޑު ކާރިސާއެއް،" އޭނާ ވިދާޅުވިއެވެ.
ޒެލެންސްކީގެ ކެބިނެޓުން ބޮޑެތި ބަދަލުތަކެއް ފެނިގެނެ ގޮސްފައި މި ވަނީ, ޔޫކްރެއިންގެ ރަށްތަކަށް އަމާޒުކޮށް ރަޝިޔާގެ ފައުޖުތަކުން ވަރުގަދަ ޙަމަލާތަކެއް އަމާޒު ކުރަމުންދާ ދަނޑިވަޅެއްގައެވެ. މި ގޮތުން, ވެރިރަށް ކީވްގެ އިތުރުން މީހުން ދިރިއުޅޭ ބޮޑެތި ރަށްތަކަށް އަމާޒުކޮށް ދެމުންދާ މިސައިލާއި ޑްރޯން ޙަމަލާތައް ރަޝިޔާއިން ވަނީ އިތުރު ކޮށްފައެވެ. ސެޕްޓެންބަރު 3ވަނަ ދުވަހު ޔޫކްރެއިންގެ މެދުތެރޭގައި އޮތް ޕޮލްތާވާއަށް ރަޝިޔާގެ ފައުޖުތަކުން ދިން ޙަމަލާތަކުގައި 50އެއްހާ މީހުން މަރުވިއެވެ. އޭގެ ތެރޭގައި ޔޫކްރެއިންގެ ސިފައިން ވެސް ހިމެނެއެވެ.
ޔޫކްރެއިންގެ ކެބިނެޓަށް ޒެލެންސްކީ ގެންނަވަމުން ގެންދަވާ ބަދަލުތަކާ ގުޅޭ ގޮތުން ރަޝިޔާއިން ބުނީ, އެ ބަދަލުތަކާ ގުޅުވައި ރަޝިޔާގެ މަޤާމު ބަދަލު ނުކުރާނެ ކަމުގައެވެ. އަދި, ސުލްޙައިގެ މަޝްވަރާތައް ބޭއްވުމާ މެދު ރަޝިޔާއިން ދެކޭ ގޮތަށް ބަދަލުތަކެއް ނުގެންނާނެ ކަމުގައެވެ. ސުލްޙައިގެ މަޝްވަރާތަކުގައި ބައިވެރިވާން ޔޫކްރެއިނުން ދަޢުވަތު އަރުވާފައި އޮތް ނަމަވެސް, ރަޝިޔާއިން ވަނީ އެ ކަމަށް އިންކާރު ކޮށްފައެވެ.
ސުލްޙައިގެ ވާހަކަތައް ބާއްވަން ކްރެމްލިނުން ދެކޮޅު ހަދަން ފެށީ, އޮގަސްޓު 6ވަނަ ދުވަހު ޔޫކްރެއިންގެ ބިޔަ ލަޝްކަރަކުން ރަޝިޔާގެ ހުޅަނގު ކޫރްސްކު ސަރަހައްދަށް އަރައި ވަރުގަދަ ޢުދުވާނެއް ފެށުމާ ގުޅިގެންނެވެ. އެ ސަރަޙައްދުގެ 100އެއްހާ އަވަށް ހިމެނޭ ގޮތުން 1,200އަށް އަކަ ކިލޯމީޓަރުގެ ސަރަޙައްދަކަށް އަތްގަދަ ކޮށްފައިވާނެ ކަމުގައި ޔޫކްރެއިނުން ބުންޏެވެ. އަދި, ރަޝިޔާގެ ފައުޖުތަކުން ދަނީ, ޔޫކްރެއިންގެ ފައުޖުތަކަށް ފަހަތަށް ޖައްސަން ވަރުގަދަ ޙަމަލާތަކެއް އަމާޒު ކުރަމުންނެވެ.