ފަލަސްޠީނުގެ ޣައްޒާގައި ވެރިކަން ކުރާ ޙަމާސް ޖަމާޢަތުގެ އިސް އޮފިޝަލުންގެ މައްޗަށް އެމެރިކާއިން ޖިނާޢީ ދަޢުވާ އުފުލާފައިވާ ކަން ހާމަވެއްޖެއެވެ. ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޙަމާސްގެ ހަ އޮފިޝަލެއްގެ މައްޗަށް ޣައިރު ހާޒިރުގައި އެމެރިކާއިން ޖިނާޢީ ދަޢުވާ އުފުލާފައި ވަނީ, 2023 އޮކްޓޫބަރު 7ވަނަ ދުވަހު ޒަޔަނިސްޓު ދަޢުލަތަށް ދިން ޙަމަލާތަކާ ގުޅިގެންނެވެ. ޙަމާސްގެ މުޖާހިދުން ޔަހޫދީންގެ ރަަށްތަކަށް ޙަމަލާދީފައި ވަނީ ޔަހޫދީންގެ އިސްތިޢުމާރީ ވެރިކަމާއި އަޅުވެތި ކަމަށް ކެތް ނުކުރެވިގެންނެވެ.
އެމެރިކާގެ ބަންޑާރަނައިބުގެ އޮފީހުން ބުނީ, ޙަމާސްގެ ހަ އޮފިޝަލެއްގެ މައްޗަށް ދަޢުވާ އުފުލާފައި ވަނީ އޮކްޓޫބަރު 7ގެ ޙަމަލާ ރާވައި, އެހީތެރިކަން ފޯރުކޮށްދީ, ހިންގުމުގައި ބައިވެރިވުމުގެ ކުށުގައި ކަމުގައެވެ. ޙަމާސްގެ ޙަމަލާއާ ގުޅިގެން ޔަހޫދީ ފައުޖުން ވަނީ ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ލާއިންސާނީ ޢުދުވާނެއް ފަށާފައެވެ. އަދި, އެ ޢުދުވާނުގެ ދަށުން ހިންގަމުންދާ ގަތުލުއާންމުތައް ހުއްޓައިލަން ޔަހޫދީންގެ ނިރުބަވެރި ބޮޑުވަޒީރު ބެންޖަމިން ނަތަންޔާހޫ ދަނީ ދެކޮޅު ހަދަމުންނެވެ.
"އަޅުގަނޑުމެން ހުށަހަޅާފައިވާ މައްސަލައިގައި ބަޔާން ކޮށްފައިވާ ގޮތަށް, އެ މީހުން—ނުރައްކާތެރި ހަތިޔާރާއި ސިޔާސީ އެހީތެރިކަމާއި, އަދި އީރާނުގެ ސަރުކާރުގެ މާލީ އެހީތެރިކަމާއި [ލުބްނާންގެ މުޖާހިދުންގެ ޖަމާޢަތް] ޙިޒްބުاللهގެ އެއްބާރުލުމާ އެކު—އިސްރާއީލުގެ ރަށްތައް ސުންނާފަތިކޮށް ޢާންމު ރައްޔިތުން މަރަން ޙަމާސުން ދިން ޙަމަލާގައި ބައިވެރިވި،" އެމެރިކާގެ ބަންޑާރަނައިބު މެރިކް ގާލެންޑް ވިދާޅުވިއެވެ.
އެމެރިކާއިން ޖިނާޢީ ދަޢުވާ އުފުލާފައިވާ ޙަމާސްގެ ހަ މެންބަރުންގެ ތެރެއިން ތިން މެންބަރަކު ޔަހޫދީ ފައުޖުން ވަނީ ޝަހީދު ކޮށްލާފައެވެ. އޭގެ ތެރެއިން ދުނިޔޭގައި ތިއްބެވީ ޙަމާސްގެ ސިޔާސީ ގޮފީގެ ވެރިޔާ ޔަޙްޔާ އަލް-ސަންވާރާއި, ޤަޠަރުގެ ވެރިރަށް ދަވްޙާގައި ހުންނެވި ޙަމާސްގެ އިސް އޮފިޝަލް ޚާލިދު މަޝާލާއި, އަދި ލުބްނާނުގައި ހުންނެވި އެ ޖަމާޢަތުގެ އޮފިޝަލް ޢަލީ ބަރަކާއެވެ. ދަޢުވާ އުފުލާފައިވާ އިތުރު ތިން ބޭފުޅުންނަކީ, ސިޔާސީ ގޮފީގެ ކުރީގެ ވެރިޔާ އިސްމާޢީލް ހަނިއްޔާއާއި, އަސްކަރީ ގޮފީގެ ވެރިޔާ މުޙައްމަދު ޟަޔިފް އަދި އަސްކަރީ ކޮމާންޑަރުގެ ނައިބު މަރްވާން ޢީސާއެވެ. ޔަހޫދީ ފައުޖުން ވަނީ އެ ތިން ބޭފުޅުން ޝަހީދު ކޮށްލާފައެވެ.
ޔަހޫދީ ފައުޖުން ހަނިއްޔާ ޝަހީދު ކޮށްލާފައި ވަނީ އީރާނުގެ ވެރިރަށް ތަހްރާނަށް ދިން ނިރުބަވެރި ޙަމަލާއެއްގައެވެ. އީރާނުގެ ސިޔާދަތީ މިނިވަން ކަމާއި އިސްތިޤުލާލަށް ޔަހޫދީ ފައުޖުން އަރައިގަނެފައިވާ ކަމަށް ބުނެ, އެ ޤައުމުން ވަނީ ޔަހޫދީންގެ ކިބައިން ބަދަލު ހިފާނެ ކަމުގެ އިންޒާރު ދީފައެވެ. ޟަޔިފް ޝަހީދު ކޮށްލާފައި ވަނީ ޖުލައި މަހު ޔަހޫދީ ފައުޖުން ދިން ވައިގެ ޙަމަލާއެއްގައެވެ. އަދި, ޢީސާ ޝަހީދު ކޮށްލާފައި ވަނީ މާރިޗު މަހުއެވެ.
އެ ހަ ބޭފުޅުންނާ ދެކޮޅަށް އެމެރިކާއިން ދަޢުވާ އުފުލާފައި ވަނީ ފެބުރުވަރީ މަހުއެވެ. ނަމަވެސް, ހަނިއްޔާ ހައްޔަރު ކުރެވޭނެ ކަމުގެ އުންމީދުގައި އެމެރިކާއިން އޮތީ އެ ކަން ސިއްރު ކޮށްފައެވެ. ދަޢުވާތަކުގެ މަޢުލޫމާތު ހާމަ ކުރަން ނިންމާފައި މި ވަނީ ހަނިއްޔާ ޝަހީދު ކޮށްލުމާ ގުޅިގެންނެވެ. ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ އެންމެ ބޮޑު މަދަދުގާރަކީ އެމެރިކާއެވެ.
ޢުދުވާންތައް ހުއްޓުނަ ނުދީ ކުރިއަށް ގެންދިޔުމަށް އެއްބާރުލުން ދިނުމުގެ ގޮތުން އެމެރިކާއިން ދަނީ ޔަހޫދީންނަށް ބޭނުންވާ ހުރިހާ ބާވަތެއްގެ ނުރައްކާތެރި އަދި ފަނާކުރަނިވި ހަތިޔާރުތައް މެދުކެނޑުމެއް ނެތި ފޯރުކޮށްދެމުންނެވެ. އެ ކަމަށް ބައިނަލްއަޤުވާމީ މުޖުތަމަޢާއި އެމެރިކާ ރައްޔިތުންގެ ނުރުހުމާއި ފާޑު ކިޔުންތައް އަމާޒުވާން ފެށުމުން އެމެރިކާއިން ވަނީ ޙަމާސްގެ މުޖާހިދުންނާއި ޔަހޫދީންނާ ދެމެދު ކުރަމުންދިޔަ ސުލްޙައިގެ މަޝްވަރާތައް ވިލަރެސް ކުރުމުގައި އެހީތެރިކަން ފޯރުކޮށްދޭން މަސައްކަތް ފަށާފައެވެ. ނަމަވެސް, އެއީ މުސްލިމުންގެ ލޮލުގައި އަނދުން އަޅުވަން ނަމެއްގައި ކުރާ މަސައްކަތެކެވެ.
މީގެ 10 މަސް ކުރިން ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 40,819އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 94,291އަށް އުފުލިފައެވެ.