ތުރުކީވިލާތުގެ ވައިގެ ސިފައިން ޢިރާޤުގެ އުތުރުގެ ސަރަޙައްދުތަކަށް ދިން ޑްރޯން ޙަމަލާއެއްގައި ތިން މީހުން މަރުވެއްޖެއެވެ. ތުރުކީވިލާތުގެ ޙަމަލާ އަމާޒުކޮށްފައި ވަނީ ޢިރާޤުގެ ސުލައިމާނިއްޔާގައި ދުއްވާފައި ދިޔަ އުޅަނދަކަށެވެ. އެ ޙަމަލާގައި މަރުވީ ކޮން ބައެއް ކަމެއް އަދި ސާފެއް ނޫނެވެ.
ދޭތެރެ ދޭތެރެއިން ތުރުކީވިލާތުގެ އަސްކަރިއްޔާއިން ޢިރާޤުގެ ކުރްދިސްތާން ވަރކަރސް ޕާޓީ (ޕީކޭކޭ)ގެ އަމާޒުތަކަށް ބޮންއަޅައެވެ. މި ހަފުތާގައި ވެސް ތުރުކީވިލާތުން ވަނީ ޕީކޭކޭގެ 20 އަމާޒަކަށް ބޮން އަޅައި ގިނަ ޢަދަދެއްގެ ހަނގުރާމަވެރިން މަރައިލައިފައެވެ. އެ ވުޒާރާއިން ބުނީ އެ ޙަމަލާތައް އަމާޒުކޮށްފައި ވަނީ ޕީކޭކޭގެ ހަނގުރާމަވެރިން ބޭނުންކުރާ ހޮހަޅަތަކަށާއި ބިންގަރާސްތަކަށާއި ހަތިޔާރުގުދަންތަކަށް ކަމަށެވެ. ޕީކޭކޭގެ އަމާޒުތަކަށް ތުރުކީވިލާތުން ދެމުންދާ ޙަމަލާތައް ފަހަކަށް އައިސް ވަނީ އިތުރުކޮށްފައެވެ.
ޕީކޭކޭއަކީ, ތުރުކީވިލާތުގެ އިތުރުން އެމެރިކާއާއި ވިލާތުގެ އިއްތިހާދުން ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ހަނގުރާމަވެރިންގެ ޖަމާޢަތެކެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ 1984ވަނަ އަހަރުއެވެ. އަދި, އޭގެ ފަހުން އެ ޖަމާޢަތުން ދަނީ ތުރުކީވިލާތުގެ ސަރުކާރާއި އަސްކަރިއްޔާގެ އިތުރުން ޢާންމު ރައްޔިތުންނަށް އަމާޒުކޮށް ނިރުބަވެރި ޙަމަލާތައް ދެމުންނެވެ.
ޢިރާޤުގެ އިތުރުން ސޫރިޔާގައި ހަރަކާތްތެރިވާ ކުރުދީންނާ ގުޅުން އޮތް ހަތިޔާރު އެޅި ޖަމާޢަތްތަކަށް އަމާޒުކޮށް ވެސް ތުހުކީވިލާތުގެ އަސްކަރިއްޔާއިން ދަނީ ޙަމަލާ ދެމުންނެވެ. ސޫރިޔާގައި ހަރަކާތްތެރިވާ ކަރޑިޝް ވައިޕީޖީއަކީ ޕީކޭކޭއާ ގުޅުން އޮތް ހަތިޔާރު އެޅި ޖަމާޢަތެކެވެ. އެ ޖަމާޢަތްތަކާ ދެކޮޅަށް ހިންގަމުންދާ އޮޕަރޭޝަންގެ ދަށުން ތުރުކީވިލާތުގެ ސަރަޙައްދީ ރޮނގު ކައިރީގައި އޮންނަ ސޫރިޔާގެ ބައެއް ސަރަޙައްދުތަކުގައި ތުރުކީވިލާތުގެ އަސްކަރިއްޔާއިން ދަނީ ހަރަކާތްތެރިވަމުންނެވެ.