ފަރަންސޭސިވިލާތުގެ ބޮޑުވަޒީރު ކަމުގެ މަޤާމަށް މިޝެލް ބަޣުނިޔޭ ޢައްޔަން ކުރަން ރައީސް އިމަނުއެލް މެކްޚޮން ނިންމަވައިފިއެވެ. މީގެ ކުރިން ވަޒީރު ކަމުގެ މަޤާމުތައް ފުރުއްވާފައިވާ ބަޣުނިޔޭއަކީ ފަރަންސޭސިވިލާތުގެ ގިނަ ރައްޔިތުން ދަންނަ މޫނެއް ނޫނެވެ. ނަމަވެސް, ވިލާތުގެ އިއްތިހާދު (އީޔޫ)ން ވަކިވުމަށް އިނގިރޭސިވިލާތުން ކުރި މަސައްކަތުގައި (ބްރެކްސިޓްގައި) އީޔޫގެ ފަރާތުން އިސް ނެގޯޝިއޭޓަރުގެ މަޤާމު ފުރުއްވާފައިވަނީ އޭނާއެވެ.
ދާދިފަހުން ފަރަންސޭސިވިލާތުގައި ބޭއްވި ޢާންމު އިންތިޚާބުގައި އެއްވެސް ޕާޓީއަކަށް ފުރިހަމަ އަޣުލަބިއްޔަތު ހޯދިފައި ނުވި ނަމަވެސް ބަޣުނިޔޭ ވަނީ ހުރިހާ ސިޔާސީ ޕާޓީއަކާ ގުޅިގެން މަސައްކަތް ކުރައްވަން ވަޢުދުވެ ވަޑައިގަންނަވާފައެވެ. ބޮޑުވަޒީރު ކަމުގެ މަޤާމުގައި އޭނާއަށް ކުރިމަތިވާނެ އެންމެ ފުރަތަމަ ބޮޑު ގޮންޖެހުމަކީ 2025ވަނަ އަހަރުގެ ބަޖެޓު ޤާނޫނު ހަދާ މަޖިލީހަށް ހުށަހަޅުއްވައި އެއަށް ރުހުން ހޯއްދެވުމެވެ.
ޢާންމު އިންތިޚާބުގައި ޤާނޫނު ހަދާ މަޖިލީހުން އެންމެ ގިނަ ޢަދަދެއްގެ ގޮނޑި ކާމިޔާބު ކޮށްފައިވާ ކަނާތު ފިޔައިގެ ނޭޝަނަަލް ރެލީ (އާރްއެން)ގެ ވެރިޔާ މަރީން ލެ ޕެން ވަނީ ބޮޑުވަޒީރު ކަމުގެ މަޤާމަށް ބަޣުނިޔޭ ޢައްޔަން ކުރަން ރުހުން ދެއްވާނެ ކަން ހާމަ ކުރައްވާފައެވެ. ނަމަވެސް, ހިޖުރަ ކުރުމާއި, ސަލާމަތީ ކަންކަމުގެ އިތުރުން މާލިއްޔަތާ ގުޅޭ ގޮތުން ބަޣުނިޔޭ ގެންގުޅުއްވާ ސިޔާސަތުތަކާ މެދު ހިތްހަމަނުޖެހިއްޖެ ނަމަ, އޭނާއަށް ކުރި ތާޢީދު އަނބުރާ ގެންދަވާނެ ކަމުގެ އިންޒާރު ލެ ޕެން ދެއްވިއެވެ.
މި ވަގުތު ހައްލު ހޯދައިދޭން މަސައްކަތް ކުރާނެ ބައެއް ދާއިރާތައް 73 އަހަރުގެ ބަޣުނިޔޭ ވަނީ ހާމަ ކުރައްވާފައެވެ. އޭގެ ތެރޭގައި, ފަރަންސޭސިވިލާތުގެ ރައްޔިތުންނަށް ކުރިމަތިވެފައިވާ ގޮންޖެހުންތަކާއި, ރައްޔިތުންގެ ހިތްތަކުގައި އުފެދިފައިވާ ރުޅިވެރިކަމާއި, ސަރުކާރުން ޢާންމު ރައްޔިތުންނަށް އަޅައިނުލާ ކަމަށް ކުރެވޭ އިހުސާސަށް ހައްލު ހޯދައިދިނުމާއި, ރަށްތަކުގައި ޢާންމުވެފައިވާ ނާއިންސާފު ހުއްޓުވަން މަސައްކަތް ކުރުން ހިމެނެއެވެ.
ބަޣުނިިޔޭއަކީ ފަރަންސޭސިވިލާތުގެ ބޮޑުވަޒީރު ކަމުގެ މަޤާމާ ހަވާލުވެ ވަޑައިގަންނަވާ އެންމެ ދޮށީ ބޭފުޅާއެވެ. އޭނާގެ ކުރިން އެ މަޤާމު ފުރުއްވަމުން ގެންދަވާފައިވާ ގެބްރިއޭލް އަތާލަކީ މިހާތަނަށް އެ މަޤާމު ފުރުއްވާފައިވާ އެންމެ ހަގު ބޭފުޅާއެވެ. ބަޣުނިޔޭ ވިދާޅުވީ ހުރިހާ ސިޔާސީ ގުރޫޕުތަކުގެ އަޑު އައްސަވާނެ ކަމުގައެވެ. އަދި, އެންމެ ބޮޑު އިސްކަމެއް ދެއްވާނީ ޞިއްޙީ ނިޒާމު ހަރުދަނާކޮށް, ޢާންމުންގެ ސަލާމަތާއި ރައްކާތެރިކަން ކަށަވަރު ކޮށްދީ, ވަޒީފާތައް އިތުރުކޮށް, ދަރަނި ކުޑަ ކުރުމަށް ކަމުގައި ވެސް އޭނާ ވިދާޅުވިއެވެ.
ބަޣުނިޔޭއަށް އާރްއެނުން ރުހުން ދީފައިވީ ނަމަވެސް, އިންތިޚާބުގައި ގިނަ ދާއިރާތަކަކުން ކާމިޔާބީ ހޯދާފައިވާ ވައަތު ފިޔައިގެ ޕާޓީތަކުން ވަނީ އޭނާއާ ދެކޮޅަށް މަސައްކަތް ކުރާނެ ކަން އިޢުލާނު ކޮށްފައެވެ. ވައަތު ފިޔައިގެ ޕާޓީއެއްގެ ވެރިއެއް ކަމުގައިވާ ޜޯން-ލޫކް މިލޯންޝުން ވިދާޅުވީ "ފަރަންސޭސިވިލާތުގެ ރައްޔިތުންގެ އަތުން އިންތިޚާބު ފޭރިގަނެފައިވާ" ކަމުގައެވެ. އޭނާ ވަނީ މެކްޚޮންގެ ސަރުކާރާއި, ބަޣުނިޔޭއާ ދެކޮޅަށް މުޒާހަރާ ކުރުމަށް ވެސް ގޮވައިލައްވާފައެވެ. ވައަތު ފިޔައިގެ ޕާޓީއަކަށް ނިސްބަތްވާ ޤާނޫނު ހަދާ މަޖިލީހުގެ މެންބަރެއް ކަމުގައިވާ މަތިލްދް ޕަނޫ ސިފަ ކުރެއްވި ގޮތުގައި މިއީ ބަލައިނުގަނެވޭނެ ފަދަ ދުސްތޫރީ ބަޣާވާތެކެވެ.
އާރްއެނުން ބަޣުނިޔޭއަށް ތާޢީދު ކުރަން ނިންމާފައިވީ ނަމަވެސް, ޤާނޫނު ހަދާ މަޖިލީިހުގައި އެ ޕާޓީ ތަމްސީލު ކުރައްވާ ލޯޣޯންތު ޜަކޮބެލީ ވަނީ ވީ އެންމެ އަވަހަކަށް ޤާނޫނު ހަދާ މަޖިލިސް އުވައިލައި, އަލުން އިންތިޚާބެއް ބޭއްވުމަށް ގޮވައިލައްވާފައެވެ. މަސްރަޙު ދިރާސާ ކުރާ ފަރާތްތަކުން ބުނީ, އެންމެ އަވަހަށް ވެސް އެ ފިޔަވަޅު އެޅޭނީ އަންނަ އަހަރުގެ ޖުލައި މަހު ކަމުގައެވެ. އެ ޕާޓީގެ ރައީސް ޖޯޑަން ބަޚްދެލާ ވެސް ވަނީ އެ ޕާޓީން ބޭނުންވާ ކަންކަން ފުރިހަމަ ވާން ޖެހޭނެ ކަމަށް ވިދާޅުވެފައެވެ.
ބޮޑުވަޒީރު ކަމުގެ މަޤާމަށް ޢައްޔަން ކުރުމަށް ހުށަހަޅާފައިވާ ބަޣުނިޔޭ ޤާނޫނު ހަދާ މަޖިލީހަށް އިންތިޚާބުވެ ވަޑައިގަތީ އުމުރުން 27 އަހަރުގައެވެ. އެއަށްފަހު, އޭނާ ވަނީ އެކި ސަރުކާރުތަކުގައި ވަޒީރު ކަމުގެ މަޤާމު ފުރުއްވާފައެވެ. އޭގެ ތެރޭގައި ޚާރިޖީ ވަޒީރު ކަމުގެ މަޤާމާއި, ދަނޑުވެރިކަމާ ބެހޭ ވަޒީރު ކަމުގެ މަޤާމު ވެސް ހިމެނެއެވެ. ފާއިތުވި 15 އަހަރު އޭނާ ހޭދަ ކުރައްވާފައި ވަނީ އީޔޫގެ އެކިއެކި މަޤާމުތަކުގައެވެ.