އިންޑިޔާގެ ހުޅަނގުއުތުރު މަނީޕޫރު ސްޓޭޓްގައި ނަސްލީ ހަމަނުޖެހުންތައް ބޮޑުވެ, އިތުރު ހަ މީހުން މަރުވެއްޖެއެވެ. މަނީޕޫރުގައި ހަމަނުޖެހުންތައް ހިނގަމުން ދަނީ އާބާދީ ބޮޑު މެއިޓީ ދަރިކޮޅާއި ކުއްކީ ދަރިކޮޅުގެ މީހުންނާ ދެމެދުގައެވެ. އެންމެ ފަހުން ހިނގި ހަމަނުޖެހުންތަކުގައި މަރުވި މީހުންގެ ތެރޭގައި ޢާންމުންގެ އެކަކު ހިމެނެއެވެ.
ހުސްވި އަހަރު މެއިޓީއާއި ކުއްކީ ދަރިކޮޅުގެ މީހުންގެ މެދުގައި ހަމަނުޖެހުން ހިންގަން ފަށާފައި ވަނީ, ކުއްކީ ދަރިކޮޅަށް ޤާނޫނީ ގޮތުން ދީފައިވާ އިނާޔަތްތަކާއި ފުރުޞަތުތައް މެއިޓީ ދަރިކޮޅުގެ މީހުންނަށް ފަހިކޮށްދިނުމަށް ކޯޓަކުން އަމުރު ކުރުމުންނެވެ. ކުއްކީ ދަރިކޮޅުގެ މީހުންނަށް ލިބިދީފައިވާ އިނާޔަތްތަކާއި ފުރުޞަތުތަކުގެ ތެރޭގައި އިޤުތިޞާދީ އަދި ވިޔަފާރީގެ ފުރުޞަތުތަކާއި, ސަރުކާރު ވަޒީފާތައް ހޯދުމުގެ ފުރުޞަތާއި, ތަޢުލީމީ ފުރުޞަތުތައް ހިމެނެއެވެ.
މެއިޓީއާއި ކުއްކީ ދަރިކޮޅާ ދެމެދު ހިނގަމުންދާ ހަމަނުޖެހުންތަކުގައި މިހާތަނަށް މަރުވެފައިވާ މީހުންގެ ޢަދަދު 225އަށް އަރައެވެ. އަދި, 60,000އެއްހާ މީހުންގެ ގެދޮރުވަނީ ގެއްލިފައެވެ. މީގެ ހަފުތާއެއްހާ ދުވަސް ކުރިން އައު ހަމަނުޖެހުންތަކެއް ފެށިފައިވާއިރު, މިއީ އެއް ދުވަހެއްގެ ތެރޭގައި އެންމެ ގިނަ މީހުން މަރުވި ހަމަނުޖެހުންތަކެވެ. ފުލުހުން ބުނީ, ހަމަނުޖެހުންތަކުގައި ގޮވާތަކެތި ހަރު ކޮށްފައިވާ ޑްރޯންތަކެއް ބޭނުން ކޮށްފައިވާ ކަމުގައެވެ.
ފުލުހުން ތުހުމަތު ކުރާ ގޮތުގައި, ގޮވާތަކެތި ހަރު ކޮށްފައިވާ ޑްރޯންތައް ބޭނުން ކޮށްފައި ވަނީ ކުއްކީ ދަރިކޮޅު ހައްދުފަހަނަ އެޅި ހަނގުރާމަވެރިންނެވެ. ނަމަވެސް, ކުއްކީ ދަރިކޮޅުގެ ގުރޫޕުތަކުން ވަނީ އެ ތުހުމަތު ދޮގު ކޮށްފައެވެ. "އިރުއެރުމާ އެކު ދެ ދަރިކޮޅުގެ މީހުންގެ މެދުގައި ދަނީ ހަމަނުޖެހުން ހިންގަމުން. ދެ ފަރާތުގައި ވެސް ތިބީ ހަތިޔާރު އެޅި ގުރޫޕުތައް،" މަނީޕޫރުގެ ޖިރީބާމް ޑިސްޓްރިކްޓުގެ ފުލުހުންގެ ކޮނިޝަނަރުގެ ނައިބު ކްރިޝުން ކުމާރު ވިދާޅުވިއެވެ. ދެ ދަރިކޮޅުގެ މީހުންގެ މެދުގައި އެންމެ ބޮޑު ކުރިމަތިލުންތަކެއް ހިނގާފައި ވަނީ ޖިރީބާމްގައެވެ.
ހަމަނުޖެހުންތަކުގައި ޢާންމުންގެ މީހަކު މަރުވެފައި ވަނީ, އަމިއްލަ ގޭގައި ނިދާފައި އޮއްވާ ދިން ބަޑީގެ ޙަމަލާއެއްގައި ކަމަށް އިންޑިޔާގެ މީޑިޔާތަކުން ރިޕޯޓު ކުރެއެވެ. ހަމަނުޖެހުންތައް ކޮންޓްރޯލު ކުރުމަށް ފުލުހުން ހަރަކާތްތެރިވާން ފަށާފައިވާ ކަމުގައި ކުމާރު ވިދާޅުވިއެވެ. އަދި, މަނީޕޫރުގެ ސަރުކާރުން ވަނީ ހަމަނުޖެހުންތައް ކޮންޓްރޯލް ކުރެވެންދެން ހުރިހާ މަދަރުސާތަކެއް ބަންދު ކޮށްފައެވެ.
2.3 މިލިޔަން މީހުންގެ އާބާދީއެއް ދިރިއުޅޭ މަނީޕޫރުގެ ދެ ދަރިކޮޅުގެ މެދުގައި ލޭއޮހޮރުވުން ގިނަ ހަމަނުޖެހުންތަކެއް ފަށާފައި ވަނީ 2023ވަނަ އަހަރުގެ މޭ މަހުގެ ތެރޭގައެވެ. މަނީޕޫރުގެ މައި ވާދީގައި ދިރިއުޅެނީ މެއިޓީ ދަރިކޮޅުގެ މީހުންނެވެ. އަދި, އުސް ބިންތަކުގައި ދިރިއުޅެނީ ކުއްކީ ދަރިކޮޅުގެ ޢާއިލާތަކެވެ. ދެ ފަރާތުގެ ދެމެދުގައި ހިނގަމުންދާ ހަމަނުޖެހުންތައް ކޮންޓްރޯލް ކުރަން އިންޑިޔާގެ އަސްކަރިއްޔާއިން ވެސް ދަނީ މަސައްކަތް ކުރަމުންނެވެ.
ސެޕްޓެންބަރު 1ވަނަ ދުވަހު ވެސް ދެ ފަރާތުގެ ދެމެދުގައި ބޮޑެތި ހަމަނުޖެހުންތަކެއް ހިނގިއެވެ. އިމްފާލް ހުޅަނގުގެ ސަރަޙައްދުގައި ހިނގި ކުރިމަތިލުންތަކުގައި ދެ މީހުން މަރުވެ, ގިނަ ޢަދަދެއްގެ ބަޔަކު ޒަޚަމުވިއެވެ. އޭގެ ފަހުން ހަތިޔާރު އެޅި ޖަމާޢަތްތަކުން ޢާންމުން ދިރިއުޅޭ ގެއަކަށް އަމާޒުކޮށް ދިން ރޮކެޓު ޙަމަލާއެއްގައި 78 އަހަރުގެ ފިރިހެނެއް މަރުވެ, އިތުރު ހަ މީހުން ޒަޚަމުވިއެވެ. ރޮކެޓު ވެއްޓިފައި ވަނީ ބިޝްނޫޕޫރުގެ ކުރީގެ ޗީފް މިނިސްޓަރުގެ ގެކޮޅަށް ކަމުގައި ފުލުހުން ބުންޏެވެ.