ޕޯޗުގަލްގައި ސަލާމަތީ ފިޔަވަޅުތައް އެންމެ ބޮޑަށް ހަރުކަށި ކޮށްފައިވާ ޖަލަކުން ފަސް ގައިދީން ފިލައިފިއެވެ. ވަލް ދެ ޖުދިއުސް ޖަލުން ފިލާފައިވާ ފަސް ގައިދީންގެ ތެރޭގައި ހިމެނެނީ އިނގިރޭސިވިލާތާއި, އާޖެންޓީނާގެ އިތުރުން ޖޯޖިޔާގެ ރައްޔިތަކާއި ޕޯޗުގަލްގެ ދެ މީހުންނެވެ. ވަލް ދެ ޖުދިއުސް ޖަލަކީ ވެރިރަށް ލިސްބަންގެ 30 ކިލޯމީޓަރު އުތުރުގައި އޮންނަ ރަށެއްގައި ހުންނަ ޖަލެކެވެ.
ޕޯޗުގަލްގެ ޖަލުތަކާ ބެހޭ އިދާރާއިން ބުނީ, އެ ފަސް ގައިދީން ޖަލުން ފިލާފައި ވަނީ އެހެން ބަޔެއްގެ އެހީތެރިކަމާ އެކުގައި ކަމުގައެވެ. އަދި, ޖަލުގެ ބޭރު ފާރުމައްޗަށް އަރައި, ގައިދީންތައް ފިލާފައި ވަނީ ބޭރުގައި ތިބި ބަޔަކު ފޯރުކޮށްދިން ހަރުގަނޑެއް ބޭނުން ކޮށްގެން ކަމުގައެވެ. އެ ފަސް ޖައިދީން އަތުލައިގަތުމަށް ޕޯޗުގަލްގެ ފުލުހުން ވަނީ ޚާއްޞަ އޮޕަރޭޝަނެއް ފަށާފައެވެ.
ޖަލުން ފިލާފައިވާ ޕޯޗުގަލްގެ ދެ ރައްޔިތުންނަކީ މަސްތުވާތަކެތީގެ ވަގުފާރިއާއި, ކުށްކުރާ ގުރޫޕުތަކުގައި ބައިވެރިވުމާއި, ވައްކަމާއި, މީހުން ވަގަށް ގެންދިޔުމުގެ ކުށުގައި 25 އަހަރުގެ ޖަލު ޙުކުމް އިއްވާފައިވާ ދެ މީހުންނެވެ. އެ ޤައުމުގެ ޖަލުތަކާ ބެހޭ އިދާރާއިން ބުނީ, ޖަލުން ފިލާފައިވާ އަނެއް ތިން ގައިދީންނަކީ ވައްކަމާއި މީހުން ވަގަށް ގެންދިޔުމުގެ ކުށުގެ ދަޢުވާ ސާބިތުވެ, ޖަލު ޙުކުމް ތަންފީޒު ކުރަމުން ދިޔަ ބަޔެއް ކަމުގައެވެ.
"މި ކަމުގައި ޕޯޗުގަލްގެ މުޅި ދަޢުލަތް މި ވަނީ ފޭލުވެފައި. ސަބަބަކީ, ޖަލުތަކުގައި ވަޒީފާ އަދާ ކުރާ ގާޑުންގެ ޢަަދަދު އިތުރު ކޮށްދޭން ދެކޮޅު ހަދައި, އެ ތަންތަނުގެ ސަލާމަތީ ފިޔަވަޅުތައް ހަރުދަނާ ކުރަން ފައިސާ ޚަރަދު ނުކުރުން. އެއާ އެކު, އެންމެންގެ ސަލާމަތަށް މި ވަނީ ނުރައްކާވެފައި،" ޕޯޗުގަލްގެ ޖަލުތައް ބަލަހައްޓާ ގާޑުންގެ ޔޫނިއަންގެ ވެރިޔާ ފްރެދެރީކޯ މުރާއިޝް ވިދާޅުވިއެވެ.
ވަލް ދެ ޖުދިއުސް ޖަލުން ފަސް ގައިދީއަކު ފިލުމާ ގުޅިގެން ޕޯޗުގަލްގެ ޖަލުތަކުގެ ބެލެނިވެރި ފަރާތް ކަމުގައިވާ ޝަރުޢީ ވުޒާރާއިން ވަކި އެއްޗެއް ހާމަ ކޮށްފައެއް ނެތެވެ. ސަލާމަތީ ފިޔަވަޅުތައް އެންމެ ވަރުގަދަ ކޮށްފައިވާ ވަލް ދެ ޖުދިއުސް ޖަލުގައި 560 ގައިދީން ޙުކުމް ތަންފީޒު ކުރަމުންދާ ކަމުގައި އެ ތަނުގެ ވެބްސައިޓުގައި ހާމަ ކޮށްފައިވެއެވެ.