ޢިރާޤުގެ އުތުރުގެ ސަރަޙައްދުތަކުގައި ޙަރަކާތްތެރިވާ ކުރްދިސްތާން ވަރކަރސް ޕާޓީ (ޕީކޭކޭ)ގެ ހަނގުރާމަވެރިންނާ ދެކޮޅަށް ބަދަލުކުރި ޙަމަލާތަކެއްގައި ތުރުކީވިލާތުގެ ސިފައިންގެ މީހަކު މަރުވެއްޖެއެވެ.
ތުރުކީވިލާތުގެ ދިފާޢީ ވުޒާރާއިން ނެރުނު ބަޔާނެއްގައި ބުނެފައި ވަނީ ޕީކޭކޭގެ 21 އަމާޒުތަކަށް ވައިގެ ޙަމަލާތައް ދީފައިވާނެ ކަމަށެވެ. އަދި އެ ޙަމަލާތަކުގައި ގިނަ ޢަދަދެއްގެ ހަނގުރާމަވެރިން މަރުވެފައިވާ ކަމަށް ވެސް ތުރުކީވިލާތުގެ ދިފާޢީ ވުޒާރާއިން ވަނީ ބުނެފައެވެ.
ޕީކޭކޭގެ އަމާޒުތަކަށް ތުރުކީވިލާތުން ދެމުންދާ ޙަމަލާތައް ފަހަކަށް އައިސް ވަނީ އިތުރުކޮށްފައެވެ. މިދިޔަ ހަފުތާގައި ވެސް ތުރުކީވިލާތުން ވަނީ ޕީކޭކޭގެ 20 އަމާޒަކަށް ބޮން އަޅައި ގިނަ ޢަދަދެއްގެ ހަނގުރާމަވެރިން މަރައިލައިފައެވެ. އެ ވުޒާރާއިން ބުނީ އެ ޙަމަލާތައް އަމާޒުކޮށްފައި ވަނީ ޕީކޭކޭގެ ހަނގުރާމަވެރިން ބޭނުންކުރާ ހޮހަޅަތަކަށާއި ބިންގަރާސްތަކަށާއި ހަތިޔާރުގުދަންތަކަށް ކަމަށެވެ.
ޕީކޭކޭއަކީ, ތުރުކީވިލާތުގެ އިތުރުން އެމެރިކާއާއި ވިލާތުގެ އިއްތިހާދުން ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ހަނގުރާމަވެރިންގެ ޖަމާޢަތެކެވެ. އެ ޖަމާޢަތުން ތުރުކީވިލާތުގެ ސަރުކާރާ ދެކޮޅަށް ހަތިޔާރު އުފުލާފައި ވަނީ 1984ވަނަ އަހަރުއެވެ. އަދި, އޭގެ ފަހުން އެ ޖަމާޢަތުން ދަނީ ތުރުކީވިލާތުގެ ސަރުކާރާއި އަސްކަރިއްޔާގެ އިތުރުން ޢާންމު ރައްޔިތުންނަށް އަމާޒުކޮށް ނިރުބަވެރި ޙަމަލާތައް ދެމުންނެވެ. އެ ޙަމަލާތަކުގައި 40،000އަށްވުރެ ގިނަ މީހުން ވަނީ މަރުވެފައެވެ.
ޢިރާޤުގެ އިތުރުން ސޫރިޔާގައި ހަރަކާތްތެރިވާ ކުރުދީންނާ ގުޅުން އޮތް ހަތިޔާރު އެޅި ޖަމާޢަތްތަކަށް އަމާޒުކޮށް ވެސް ތުހުކީވިލާތުގެ އަސްކަރިއްޔާއިން ދަނީ ޙަމަލާ ދެމުންނެވެ. ސޫރިޔާގައި ހަރަކާތްތެރިވާ ކަރޑިޝް ވައިޕީޖީއަކީ ޕީކޭކޭއާ ގުޅުން އޮތް ހަތިޔާރު އެޅި ޖަމާޢަތެކެވެ. އެ ޖަމާޢަތްތަކާ ދެކޮޅަށް ހިންގަމުންދާ އޮޕަރޭޝަންގެ ދަށުން ތުރުކީވިލާތުގެ ސަރަޙައްދީ ރޮނގު ކައިރީގައި އޮންނަ ސޫރިޔާގެ ބައެއް ސަރަޙައްދުތަކުގައި ތުރުކީވިލާތުގެ އަސްކަރިއްޔާއިން ދަނީ ހަރަކާތްތެރިވަމުންނެވެ.