ފަލަސްޠީނުގެ ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާން ފެށުމާ ގުޅިގެން ހުޅަނގު އައްސޭރީގައި ތާށިވި ޣައްޒާގެ ރައްޔިތުންނަށް މާލީ އެހީތެރިކަން ފޯރުކޮށްދިނުމަށް އެއްބަސްވުމެއް އެކުލަވައިލައިފިއެވެ. ހުޅަނގު އައްސޭރީގައި ތާށިވެފައިވާ 4,400އެއްހާ ޣައްޒާގެ ރައްޔިތުންގެ ތެރޭގައި, ވަޒީފާ އަދާ ކުރުމަށް ހުޅަނގު އައްސޭރިއަށް ދަތުރު ކޮށްފައިވާ މީހުންނާއި ބޭސް ފަރުވާއަށް ހުޅަނގު އައްސޭރިއަށް ދިޔަ މީހުން ހިމެނެއެވެ.
ޤަޠަރުގެ ރެޑް ކްރެސެންޓާއި ފަލަސްޠީނުގެ ރެފިއުޖީންނަށް އެހީތެރިވާ އދގެ އިދާރާ (އުންރްވާ)އާ ދެމެދު ސޮއި ކޮށްފައިވާ އެއްބަސްވުމުގެ ދަށުން, ހުޅަނގު އައްސޭރީގައި ތާށިވެފައިވާ ޣައްޒާގެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަށް 4.5 މިލިޔަން އެމެރިކާ ޑޮލަރުގެ ފަންޑެއް ވަނީ ކަނޑައަޅާފައެވެ. އެ ފައިސާ ފޯރު ކޮށްދީފައި ވަނީ ޤަޠަރުންނެވެ.
"އެ މާލީ އެހީތެރިކަމަކީ, ހުސްވި އޮކްޓޫބަރުގައި އިސްރާއީލުން [ޔަހޫދީ ފައުޖުން] ފެށި ލާއިންސާނީ ޢުދުވާނުގެ ސަބަބުން ޣައްޒާއިން ބޭރުގައި ތާށިވެފައިވާ މީހުންނަށް ފޯރު ކޮށްދެވޭ މުހިންމު އެހީތެރިކަމަކަށް ވާނެ،" ޤަޠަރުގެ ދަޢުލަތުގެ މީޑިޔާއިން ނެރުނު ބަޔާނެއްގައި ހާމަ ކޮށްފައިވެއެވެ. މީގެ 11 މަސް ކުރިން ޣައްޒާގެ މުސްލިމުންނާ ދެކޮޅަށް ލާއިންސާނީ ޢުދުވާނެއް ފެށުމާ އެކު ޔަހޫދީ ފައުޖުން ވަނީ ޣައްޒާގެ ފުރަބަންދު ހަރުކަށިކޮށް, އެ ސަހަރަށް ވަދެނިކުމެ ވެވެން އޮތް ހުރިހާ ދޮރެއް ބަންދު ކޮށްފައެވެ.
"ޣައްޒާގެ އެތައް ހާސް ރެފިއުޖީންނެއް ވަނީ ހުޅަނގު އައްސޭރީގައި ތާށިވެފައި, ކާރިސާއެއްގެ ތެރޭގައި ތާށިވެފައި, ޢާއިލާގެ މެންބަރުންނާ ވަޒީފާތަކާ ދުރުގައި ތާށިވެފައި،" އުންރްވާގެ ވެރިޔާ ފިލީޕް ލެޓްޒަރީނީ ވިދާޅުވިއެވެ.
ޔަހޫދީ ފައުޖުން އެންމެ ފުރަތަމަ ޣައްޒާ ފުރަބަންދު ކޮށްފައި ވަނީ 2007ވަނަ އަހަރުއެވެ. އެއަށް ފަހު, ޔަހޫދީ ފައުޖުން ވަނީ ޣައްޒާގެ ރައްޔިތުންނަށް އެ ސަހަރަށް ވަދެނިކުމެވުމަށް ހުރަސް އަޅާފައެވެ. އެ ސަހަރަށް ވަދެނިކުމެ ވެވެނީ ޔަހޫދީ ފައުޖުގެ ހައްދުފަހަނަ އެޅި ސިފައިން ގާއިމު ކޮށްފައިވާ ޗެކްޕޮއިންޓުތައް ހުރަސް ކުރުމަށް ފަހުއެވެ. އަދި, އެ ކަމަށް ހުއްދަ ދެމުން ދަނީ ޔަހޫދީ ފައުޖުން ބޭނުންވާ ބަޔަކަށް އެކަންޏެވެ.
ޣައްޒާގެ ފުރަބަންދާ ގުޅިގެން ޒަރޫރީ ބޭނުންތަކަށް ޤައުމު ދޫކޮށް ބޭރު ޤައުމުތަކަށް ދަތުރު ކުރުމަށް އެ ސަހަރުގެ ރައްޔިތުންނަށް އޮތީ ހުރަސް އަޅާފައެވެ. އެ ކަމާ ގުޅިގެން ބޭސް ފަރުވާގެ ޚިދުމަތްތަކާއި, ތަޢުލީމާއި, ވަޒީފާ އަދާ ކުރުމަށް ޣައްޒާގެ ރައްޔިތުންނަށް ދަތުރު ކުރެވޭ ހަމައެކަނި ތަނަކީ ހުޅަނގު އައްސޭރިއަށް ވެގެންދިޔައެވެ.
މީގެ 11 މަސް ކުރިން ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ފެށި ލާއިންސާނީ ޢުދުވާނުގައި ޝަހީދު ކޮށްލާފައިވާ މީހުންގެ ޢަދަދު ވަނީ 40,988އަށް އުފުލިފައެވެ. އޭގެ ތެރޭގައި 16،000އަށްވުރެ ގިނަ ޢަދަދަކަށް މައުސޫމު ކުޑަކުދިން ހިމެނެއެވެ. އަދި، ޔަހޫދީ ފައުޖުން ސުންނާފަތި ކޮށްލާފައިވާ އިމާރާތްތަކުގެ ދަށުގައި އިތުރު 10،000އަށްވުރެ ގިނަ މީހުންގެ ހަށިތައް ތާށިވެފައިވާ ކަމުގައި ޣައްޒާގެ އޮފިޝަލުން ގަބޫލު ކުރެއެވެ. ޔަހޫދީންގެ ރަޙުމު ކުޑަ ޙަމަލާތަކުގައި ޒަޚަމު ކޮށްލާފައިވާ މީހުންގެ ޢަދަދު ވަނީ 94,825އަށް އުފުލިފައެވެ.