ޤައުމީ ފުޓްބޯޅާ ޓީމްގެ ކޯޗް ރިކީ ހަރބަރޓް މަޤާމުން ވަކިކޮށްފިއެވެ.
އޭއެފްސީ އޭޝިއަން ކަޕް ކޮލިފައިން ޕްލޭއޮފް މެޗްގައި ޔަމަނާއި ދެކޮޅަށް މިއަދު ހެދުނު ޤައުމީ ޓީމް ޤަތަރަށް ފުރާފައިވާއިރު، ޓީމާއި ހަވާލުވެގެން ގޮސްފައިވަނީ އެސިސްޓެންޓް ކޯޗް އިސްމާޢީލް މަހުފޫޒެވެ. މަޢުލޫމާތު ލިބިފައިވާ ގޮތުގައި ކޯޗް ރިކީ ހަރބަރޓް މަޤާމުން ދުރުކުރިކަން ރޭ އެފްއޭއެމް ހައުސްގައި އޮތް ބައްދަލުވުމުގައި ޤައުމީ ޓީމްގެ ކުޅުންތެރިންނަށްވެސްވަނީ އަންގާފައެވެ.
އޭނާ ކޯޗުގެ މަގާޤުން ދުރުކޮށްފައިވާއިރު، މިދިޔަ ބުރާސްފަތި ދުވަހުގެ ރޭ ޔަމަން އަތުން ރާއްޖެ ބަލިވުމާއި ގުޅިގެން، ސަޕޯޓަރުންވެސް ކޯޗްގެ އިސްތިއުފާއަށް ގޮވާފައިވާކަން ފާހަގަކޮށްލެވެއެވެ. އެފްއޭއެމްއިން ރަސްމީކޮށް އަދި މިކަން ހާމަކޮށްފައިވައިނުވާއިރު، ޤައުމީ ޓީމްގެ އެސިސްޓަންޓް ކޯޗް އިސްމާޢީލް މަހުފޫޒް މިއަދު ހެދުނު ޤަތަރަށް ފުރުމުގެ ކުރިން ބުނީ އޭނާއާ އެފްއޭއެމްއިން މިޒިންމާ ހަވާލްކޮށްފައިވަނީ އެންމެ ފަހުން ޤައުމީ ޓީމުން ނެރެފައިވާ ނަތީޖާއަށްވުރެ ރަނގަޅު ނަތީޖާއެއް ކުރިއަށް އޮތް މެޗުގައި ނެރުމުގެ މަޤްޞަދުގައިކަމަށެވެ. އަދި މިއީ ވަރަށް ބޮޑު ޒިންމާއެއްގެ ގޮތުގައި މަހުފޫޒް ފާހަގަކޮށްފައިވެއެވެ.
މަޢުލޫމާތު ލިބިފައިވާ ގޮތުގައި ރިކީ ހަރބަރޓް ދެ ދުވަހެއްގެ ތެރޭގައި ފުރުމަށްވަނީ ހަމަޖެހިފަައެވެ. އަދި އޭނާއާއިއެކު އެންމެ ގާތުން ޓްރެއިނަރެއްގެ ގޮތުގައި މަސައްކަތް ކުރި މިލާން މީރިކްވެސް މީގެ ދުވަސްކޮޅެއް ކުރިން އެފްއޭއެމްއިންވަނީ ފޮނުވާލާފައެވެ. ރިކީ ހަރބަރޓްއާއި ދެމެދު ޖެހުނު މައްސަލައަކާއި ގުޅިގެން އެސިސްޓަންޓް ކޯޗް އަސްޢަދު ޢަބްދުލް ޢަނީއާއި ގޯލް ކީޕަރު ޓްރެއިނަރ އަސްލަމްވެސްވަނީ މީގެ ކުރިން އިސްތިޢުފާ ދީފައެވެ.
img:http://s1.psmnews.mv/images/660x400/14650956745714.jpg|ގައުމީ ފުޓްބޯޅަ ޓީމްގެ ކޯޗް ރިކީ ހާބަޓް (ފޮޓޯ:ޕީއެސްއެމް ވަހީދު)
ރިކީ ހަރބަރޓްއަކީ ޤައުމީ ޓީމާއި މިހާތަނަށް ހަވާލުވި އެންމެ ޕްރޮފައިލް ހައި ކޯޗެވެ. އޭނާއަކީ 2010ވަނަ އަހަރު ނިއުޒީލެންޑް ވޯލްޑްކަޕަށް ކޮލިފައިކޮށްދިން ކޯޗެވެ. ނަމަވެސް ރާއްޖޭގެ ޤައުމީ ޓީމްގެ ކޯޗްކަމާ އޭނާ ހަވާލުވީ ފަހުން، ޤައުމީ ޓީމް މޮޅުވެފައިވަނީ އެންމެ ދެ މެޗުންނެވެ. އެއީ ވޯލްޑްކަޕް ކޮލިފައިންގައި ބޫޓާން އަތުންނެވެ. ހަރބަރޓްގެ އިރުޝާދުގެ ދަށުން ވޯލްޑްކަޕް ކޮލިފައިން އަދި އޭޝިއަން ކަޕް ކޮލިފައިންގައި 6 މެޗް ރާއްޖޭގެ ޓީމުން މިހާތަނަށް ކުޅެފައިވެއެވެ. މީގެ ތެރެއިން ޤަތާރު، ހޮންގކޮންގ، ޗައިނާ އަދި ޔަމަންގެ އަތުން ޤައުމީ ޓީމްވަނީ ބަލިވެފައެވެ.
img:http://s4.psmnews.mv/images/660x400/14650956899531.jpg|ގައުމީ ފުޓްބޯޅަ ޓީމްގެ ކޯޗް ރިކީ ހާބަޓް (ފޮޓޯ:ޕީއެސްއެމް ވަހީދު)
ބަންގްލަދޭޝްގައި ކުރިއަށްދިޔަ ބަންގުބަންދު ގޯލްޑްކަޕުން ރާއްޖެ ކަޓާފައިވަނީ ސެމީ ފައިނަލްގައި ނޭޕާލް އަތުންނެވެ. ފަސޭހަކަމާއިއެކު މީގެ ކުރިން ރާއްޖެ ނޭޕާލް އަތުން މޮޅުވިނަމަވެސް، ބަންގުބަންދު ގޯލްޑްކަޕުގެ ސެމީއިން ރާއްޖެ ކަޓާފައިވަނީ 4 ލަނޑު 1 ލަނޑުންނެވެ. ހަރބަރޓްގެ ކޯޗްކަމުގެ ދަށުން ރާއްޖެއިން މިހާތަނަށް 19 މެޗު ކުޅެފައިވާއިރު 11 މެޗުން ވަނީ ބަލިވެފައެވެ. އަދި 7 މެޗުން މޮޅުވިއިރު 1 މެޗުންވަނީ އެއްވަރުވެފައެވެ.