ރާއްޖޭގައި ބިނާކޮށްފައިވާ ގިނަ މިސްކިތްތަކަކީ ފެންވަރުގެ ގޮތުންވެސް ރަގަޅު ރީތި މިސްކިތްތަކެކެވެ. ނަމަވެސް މި ހުރިހާ މިސްކިތްތަކާ ޚިލާފަށް އއ.ތޮއްޑޫގައި ބިނާކޮށްފައިވާ މަސްޖިދުލް އާޢިޝާ މިސްކިތަކީ ރާއްޖެއިން ފާހަގަކޮށްލެވޭ ފަދަ ރީތި މިސްކިތެކެވެ. ދެ ގުއްބާއާއި މުންނާރެއް ހުންނަ ގޮތަށް ފަރުމާކޮށްފައިވާ މި މިސްކިތަކީ ޖާގައިގެ ގޮތުންވެސް ބޮޑު މިސްކިތެކެވެ.
މަޝްހޫރު ވިޔަފާރިވެރިޔާ ޤާސިމް އިބްރާހިމް ބިނާކޮށްދެއްވި މި މިސްކިތަކީ 1800 މީހުންގެ ޖާގައިގެ މިސްކިތެކެވެ.
2008 ވަނަ އަހަރު މަސައްކަތްފެށި މި މިސްކިތް ނުނިމި ދިގުލައިގެންދިޔައީ އެންމެ ޒަމާނީ ތަކެތީގައި، ރަގަޅުފެންވަރަކަށް މިސްކިތްހަދަން ބޭނުންވާތީކަމަށްވެސް އެ ކުންފުނިން ބުނެއެވެ. މި މިސްކިތް ހަދާފައިވަނީ އެންމެ ޒަމާނީ ފެންވަރަށް، ފުލްކޮންޓްރީޓްކޮށް، މާބްލް އާ ގްލާސް އެލްމެނިއަމް، ބޭނުންކޮށްގެންކަމަށް އެކުންފުނިން ބުނެއެވެ.
މި މިސްކިތުގައި ޖުމްލަ 53 މީހުންނަށް އެއްފަހަރާ ވުޟޫއު ކުރެވޭނެއެވެ. އަންހެނުންނާއި ފިރިހެނުންނަށްވެސް ނަމާދުކުރެވޭގޮތަށް ހަދާފައިވާ މި މިސްކިތް ރަސްމީކޮށް ހުޅުވުމަށް ހަމަޖެހިފައިވަނީ ޙަރަމްފުޅުގެ އިމާމަކު ގެނެސްގެންކަމަށްވެސް މި މިސްކިތުގެ މަސައްކަތްކުރާ ފަރާތުން ބުނެއެވެ. މި މިސްކިތް ހުޅުވުމަށް ހަމަޖެހިފައިވަނީ މާދަމާއެވެ.
ތޮއްޑޫގައި ހުންނަނީ މި މިސްކިތާ އެކީ ޖުމްލަ 4 މިސްކިތެވެ. ތޮއްޑޫއަކީ އާބާދީގައި 1998 މީހުން ދިރިއުޅޭ ރަށެކެވެ.