ޔަހޫދީ ފައުޖުގެ ނިރުބަވެރި ސިފައިން ދިން ނިރުބަވެރި ޙަމަލާތަކެއްގައި އީރާނުގެ އިސްލާމީ އިންޤިލާބީ ލަޝްކަރު (އައިއާރްޖީސީ)ގެ ކޮމާންޑަރުގެ ނައިބު ޢައްބާސް ނިލްފުރޫޝާން ޝަހީދު ކޮށްލުމުން އެ ކަމުގެ ބަދަލު ހިފާނެ ކަމުގެ އިންޒާރު އެ ޤައުމުން ދީފިއެވެ. ބްރިގޭޑިޔަރ ޖެނެރަލް ނިލްފުރޫޝާން އަވަހާރަ ކޮށްލި ޙަމަލާއާ ގުޅޭ ގޮތުން ވާހަކަ ދައްކަވަމުން އީރާނުގެ ޚާރިޖީ ވަޒީރު ޢައްބާސް ޢަރާޤިޖީ ވިދާޅުވީ އެ "އަނިޔާވެރި ޖަރީމާއަށް" އެ ޤައުމުން ޖަވާބު ނުދޭނެ އެއްވެސް ގޮތެއް ނޯންނާނެ ކަމުގައެވެ.
ނިލްފުރޫޝާން ޝަހީދު ކޮށްލާފައި ވަނީ, ސެޕްޓެންބަރު 28ވަނަ ދުވަހު ޔަހޫދީ ފައުޖުން ލުބްނާންގެ ވެރިރަށް ބައިރޫތުގެ ޟާޙިޔާ ޑިސްޓްރިކްޓަށް ދިން ރަޙުމު ކުޑަ ނިރުބަވެރި ޙަމަލާތަކުގައެވެ. ލުބްނާންގެ ޢާންމު ރައްޔިތުން ދިރިއުޅޭ ސަރަޙައްދަކަށް ނުރައްކާތެރި އަދި ފަނާކުރަނިވި ހަތިޔާރު ބޭނުން ކޮށްގެން ދިން ޙަމަލާތަކުގައި ލުބްނާންގެ މުޖާހިދުންގެ ޖަމުޢިއްޔާ, ޙިޒްބުاللهގެ ވެރިޔާ އަލް-ސައްޔިދް ޙަސަން ނަޞްރުالله ވެސް ޝަހީދު ކޮށްލިއެވެ.
"އެއްވެސް ޝައްކެއް ނެތް, ޒަޔަނިސްޓު ދަޢުލަތުން [އިސްރާއީލުން] ހިންގާފައިވާ ހަޑިމުޑުދާރު ޖަރީމާއަށް ޖަވާބު ނުދީ ދޫކޮށެއް ނުލާނަން،" އައިއާރްޖީސީގެ ކޮމާންޑަރު މޭޖަރ ޖެނެރަލް ޙުސައިން ސަލާމީއަށް އެޑުރެސްކޮށް ނެރުއްވި ބަޔާނެއްގައި ޢަރާޤިޖީ ވިދާޅުވިއެވެ.
ޔަހޫދީންގެ ނުބައިކަމާ ދެކޮޅަށް ޖިހާދު ކުރުމަށް އައިއާރްޖީސީން އަޑީގައި އޮވެގެން 1982ވަަނަ އަހަރު އުފެއްދި ޙިޒްބުالله ޖަމާޢަތުގެ ވެރިޔާ ޝަހީދު ކޮށްލުމުން އެ ކަމުގެ ބަދަލު ހިފާނެ ކަމުގެ އިންޒާރު ވެސް އީރާނުން ވަނީ ދީފައެވެ. އީރާނުގެ ޤާނޫނު ހަދާ މަޖިލީހުގެ ރައީސް މުޙައްމަދު ބާޤިރު ޤާލިބާފީ ވިދާޅުވީ, ޔަހޫދީންގެ ކިބައިން ބަދަލު ހިފުމާ ގުޅޭ ގޮތުން ތަހްރާނުން އެކްސިސް އޮފް ރެސިސްޓެންސާ އެކު މަޝްވަރާ ކުރަމުންދާ ކަމުގައެވެ. އެކްސިސަކީ މެދުއިރުމަތީގެ ޤައުމުތަކުގައި ހަރަކާތްތެރިވާ މުޖާހިދުންނާއި ހަތިޔާރު އެޅި ޖަމާޢަތްތަކުގެ ތެރެއިން އީރާނުން ވާގިވެރިވާ ޖަމާޢަތްތަކުގެ މައްޗަށް އެކުލެވިގެންވާ ބާރުގަދަ ލަޝްކަރެކެވެ.
ޙިޒްބުاللهއަކީ ވެސް އެކްސިސްގެ މެންބަރެކެވެ. މީގެ އިތުރުން, އެ ލަޝްކަރުގައި ހިމެނޭ ޖަމާޢަތްތަކުގެ ތެރޭގައި ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޙަމާސް ޖަމާޢަތާއި, ޔަމަންގައި ހަރަކާތްތެރިވާ ހަތިޔާރު އެޅި ޖަމާޢަތް, ޙޫޘީންނާއި, ޢިރާޤާއި ސޫރިޔާގައި ހަރަކާތްތެރިވާ ހަތިޔާރު އެޅި ޖަމާޢަތްތައް ހިމެނެއެވެ. "ރެސިސްޓެންސަށް [އެކްސިސްގެ މެންބަރުންނަށް] ވާގިވެރިވުމުގެ ގޮތުން އަޅަން ޖެހޭ އެއްވެސް ފިޔަވަޅެއް އަޅަން އަޅުގަނޑުމެން [އީރާނުން] ފަސް ނުޖެހޭނަން،" ޤާލިބާފީ ވިދާޅުވިއެވެ.
އޭނާ ވަނީ އެމެރިކާއަށް ވެސް ވަރުގަދަ އިންޒާރެއް ދެއްވާފައެވެ. "[ޔަހޫދީ ފައުޖުން] ހިންގަމުންދާ ހުރިހާ ޖަރީމާތަކެއް ހިންގަމުން ދަނީ އެމެރިކާގެ ބައިވެރިވުމާ އެކު. ބަދަލު ހިފުމުގެ ގޮތުން އަޅާ ފިޔަވަޅުތަކަށް [އެމެރިކާ] ޒިންމާވާން ޖެހޭނެ،" އޭނާ ވިދާޅުވިއެވެ. އެމެރިކާއަކީ ޔަހޫދީންގެ އެންމެ ބޮޑު މަދަދުގާރެވެ. އަދި, ލުބްނާންގެ އިތުރުން ޣައްޒާގެ މުސްލިމުން ޝަހީދުކޮށް ނެތިކޮށްލަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ އެންމެ ބޮޑު ބައިވެރިއަކީ ވެސް އެމެރިކާއެވެ. ޢުދުވާންތައް ހިންގުމަށް ޔަހޫދީންނަށް ނުރައްކާތެރި އަދި ފަނާކުރަނިވި ހަތިޔާރު ފޯރު ކޮށްދެމުން ދަނީ އެމެރިކާއިންނެވެ.
ސެޕްޓެންބަރު 23ވަނަ ދުވަހުން ފެށިގެން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނުގެ ޝަހީދު ކޮށްލާފައިވާ މީހުންގެ ޢަދަދު 1,670އަށް އުފުލިފައިވާ ކަމުގައި ލުބްނާންގެ ޞިއްޙަތާ ބެހޭ ވުޒާރާއިން ހާމަކުރިއެވެ. އޭގެ ތެރޭގައި 100އަށްވުރެ ގިނަ މައުސޫމު ކުޑަކުދިން ހިމެނެއެވެ. އަދި, 6,000އަށްވުރެ ގިނަ މީހަކު ވަނީ ޒަޚަމު ކޮށްލާފައެވެ. އަދި, މިލިޔަނަކަށް ވުރެ ގިނަ މީހުން ވަނީ ގެދޮރު ނެތިކޮށްލާފައެވެ.