ސްޕެއިނުގެ ޒުވާން ވިންގް ލަމީން ޔަމާލަށް އަނިޔާވެ، އެ ޓީމުގެ ސްކޮޑުން ވަކިވެއްޖެއެވެ.
އުމުރުން 17 އަހަރުގެ ޔަމާލަށް އަނިޔާވީ، ޔުއެފާ ނޭޝަންސް ލީގުގައި އެންމެ ފަހުން ޑެންމާކާ ދެކޮޅަށް ސްޕެއިން ކުޅުނު މެޗުގައެވެ. ޔަމާލްގެ ވާތު ފަޔަށް ލިބުނު މި އަނިޔާގެ ސަބަބުން އެ މެޗުގެ 93 ވަނަ މިނެޓުގައި ވަނީ ބަދަލުކޮށްފައެވެ.
ޔަމާލްގެ އަނިޔާއާ ގުޅޭގޮތުން، ސްޕެއިނުގެ ފުޓްބޯޅަ އެސޯސިއޭޝަނުން ބުނެފައިވަނީ ޓެސްޓުތަކުން ދައްކާގޮތުގައި ބާސެލޯނާގެ ތަރި، ޔަމާލްގެ ވާތުފައިގެ މަސްގަނޑަށް އަނިޔާވެފައިވާތީ "އިތުރަށް އަނިޔާވުމުގެ ރިސްކް" އޮތުމުން، ކުރިއަށް އޮތް މެޗަށް ނަގާ ސްކޮޑުގައި ހިމެނުމުގެ ބަދަލުގައި އޭނާގެ ކްލަބަށް ފޮނުވާލަން ނިންމާފައިވާ ކަމަށެވެ.
ޔަމާލަށް ލިބުނު މި އަނިޔާގެ ސަބަބުން ނޭޝަންސް ލީގުގައި ސްޕެއިނުން މާދަމާރޭ އަމިއްލަ ދަނޑުގައި ސާބިއާއާ ދެކޮޅަށް ކުޅުމަށް ހަމަޖެހިފައިވާ މެޗުގައި ނުކުޅެވޭނެއެވެ.
އެންމެ ފަހުގެ ޔޫރޯ ފުޓްބޯޅަ މުބާރާތް ސްޕެއިނަށް ކާމިޔާބުކޮށްދިނުމުގެ މުހިއްމު ދައުރެއް އަދާކުރި ޔަމާލްގެ ބަދަލުގައި އެ ޓީމުގެ ކޯޗު، ލުއިސް ޑެ ލަ ފުއެންޓޭ ވަނީ އެތުލެޓިކޯ މެޑްރިޑްގެ ރޮޑްރިގޯ ރިކުއެލްމޭ ސްޕެއިނުގެ ސްކޮޑަށް އިތުރުކޮށްފައެވެ.
މީގެ ދެ އަހަރު ކުރީން، އުމުރުން އެންމެ 15 އަހަރުގައި ސްޕެއިނަށް ކުޅެން ފެށި ޔަމާލް ވަނީ މިހާތަނަށް އެ ޓީމަށް 17 މެޗު ކުޅެދީ، ތިން ލަނޑު ޖަހައިފައެވެ. ޔަމާލް ކުޅެމުން އަންނަ ބާސެލޯނާއަށް ދެން އޮތް މެޗަކީ މި މަހުގެ 20 ވަނަ ދުވަހު ސްޕެނިޝް ލީގުގައި އަމިއްލަ ދަނޑުގައި ސެވިއްޔާއާ ދެކޮޅަށް ކުޅެންޖެހޭ މެޗެވެ.