ދެކުނު އެމެރިކާ ބައްރުގެ ފީފާ ވޯލްޑް ކަޕް ކޮލިފައިންގައި ރަފީނިއާ ކާމިޔާބުކުރި ދެ ލަނޑާއެކު ޕެރޫ އަތުން 4-0 ގެ ނަތީޖާއަކުން ބްރެޒިލް މޮޅުވެއްޖެއެވެ.
މިއީ މި ފަހަރުގެ ވޯލްޑް ކަޕް ކޮލިފައިންގައި ބްރެޒިލް އެންމެ ފަހުން ކުޅުނު ދެ މެޗުގެ ތެރެއިން މޮޅުވި ދެވަނަ ފަހަރެވެ. އޭގެކުރީން، ކޮލިފައިންގައި އެ ޓީމު ކުޅުނު ފަސް މެޗުގެ ތެރެއިން މޮޅުވީ އެންމެ މެޗަކުންނެވެ. އަނެއް ހަތަރު މެޗުން ވަނީ ބަލިވެފައެވެ.
މި މެޗުގައި ބްރެޒިލުން ލީޑްނެގީ ފުރަތަމަ ހާފުގެ 38 ވަނަ މިނެޓުގައި ލިބުނު ޕެނަލްޓީއަކުން ބާސެލޯނާ އަށް ކުޅެމުންއަންނަ ރަފީނިއާ އެވެ. މިއީ ޕެނަލްޓީއޭރިޔާތެރެއިން ޕެރޫގެ ޑިފެންޑަރު، ކާލޯސް ޒަމްބްރާނޯ އަތުގައި ބޯޅައިން ޖެހުމުން ރެފްރީ ދިން ޕެނަލްޓީއެކެވެ.
ބްރެޒިލުން ލީޑްނެގުމުގެ ކުރީން، 24 ވަނަ މިނެޓުގައި ރަފީނިއާ ފޮނުވާލި ހަމަލާއެއް ގޯލްގެ ހުރަސްދަނޑިއަށް އަމާޒުވެފައިވެއެވެ. މި މެޗުގެ ފުރަތަމަ ހާފުގައި ފެނުނު ލަނޑާއެކު، ބްރެޒިލުން ނިންމާލީ 1-0 އިން ކުރީގަ އޮވެގެންނެވެ.
ދެވަނަ ހާފުގެ ކުރީކޮޅު، ރަފީނިއާ ވަނީ ނަތީޖާ 2-0 އަށް ބަދަލުކޮށްލާފައެވެ. މެޗުގެ 54 ވަނަ މިނެޓުގައި ރަފީނިއާ މި ލަނޑުޖެހީ ލިބުނު ޕެނަލްޓީއަކުންނެވެ. މިއީ ޕެނަލްޓީއޭރިޔާ ތެރެއިން އެ ޓީމުގެ ވިންގް، ސަވީނިއޯ އަށް ޕެރޫގެ ޒަމްބްރާނޯ ކުރި ފައުލަކަށް ރެފްރީ ދިން ޕެނަލްޓީއަކުން ރަފީނިއާ ޖެހި ގޯލެކެވެ.
އޭގެފަހުން، މެޗުގެ 72 ވަނަ މިނެޓުގައި އަންދްރެއަސް ޕެރޭރާ ވޮލީއަކުން ބްރެޒިލްގެ ތިންވަނަ ލަނޑުޖެހިއިރު، މި ލަނޑުޖެހުމަށް އެހީތެރިވެދިން ލުއިޒް ހެންރީކް ވަނީ އޭގެ ދެ މިނެޓުފަހުން ޕެނަލްޓީއޭރިޔާ ރޮނގުކައިރިން ފޮނުވާލި ހަމަލާއަކުން ވަނީ އެ ޓީމުގެ ހަތަރުވަނަ ލަނޑުޖަހައިދީފައެވެ.
ރޭގެ ނަތީޖާއާއެކު ބްރެޒިލް ވަނީ 10 މެޗުން 16 ޕޮއިންޓް ހަމަކޮށްފައެވެ. މިއާއެކު، އެ ޓީމަށް ލިބިފައިވަނީ ތާވަލްގެ ހަތަރުވަނައެވެ. އެ ޓީމާ އެންމެ ކުރީގައި އުޅޭ ވާދަވެރި އާޖެންޓީނާ ދެމެދު ހަ ޕޮއިންޓްގެ ފަރަގެއް އެބައޮތެވެ. މި މެޗުން ބަލިވި ޕެރޫ އޮތީ ފުލުން ދެވަނައިގައެވެ. އެއީ، ކުޅުނު 10 މެޗުން ހަ ޕޮއިންޓް ހޯދައިގެންނެވެ.
ކޮލިފައިންގައި ކުޅުނު އެހެން މެޗުތަކަށް ބަލާއިރު، ކޮލަމްބިއާ އިން ވަނީ 4-0 ގެ ނަތީޖާއަކުން ޗިލީ އަތުން ވަނީ މޮޅުވެފައެވެ. މި މެޗުގައި އެ ޓީމުގެ ލަނޑުތައް ޖަހައިދިނީ ޑޭވިންސަން ސަންޗޭޒް، ލުއިސް ޑިއާޒް، ޖޮން ޑުރާން އާއި ލުއިސް ސިނިސްޓެރާ އެވެ.