މި ވަގުތު ދިވެހި ވޮލީބޯޅައިގެ ހާލަތު އޮތް ގޮތަށް ބަލާއިރު، ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) ވޮލީބޯލް ޗެލެންޖް ކަޕް 2024 ގައި ވާދަކުރާ ރާއްޖޭގެ ގައުމީ ފިރިހެން ޓީމާ މެދު ހިތްހަމަޖެހޭ ކަމަށް އެ ޓީމުގެ ކޯޗު މުޙައްމަދު ޝަރަފް ބުނެފިއެވެ.
ކާވާ ވޮލީބޯލް ޗެލެންޖް ކަޕް ކުރިއަށްދާނީ މާދަމާއިން ފެށިގެން މި މަހުގެ 24 ގެ ނިޔަލަށް އުޒްބެކިސްތާނުގެ ޓަޝްކެންޓުގައެވެ. މި މުބާރާތުގައި ހަ ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން އުޒްބެކިސްތާނާއި، ކިރްގިސްތާނާއި، ތަޖިކިސްތާނާއި، ތުރުކުމެނިސްތާން އަދި އަފްޣާނިސްތާނެވެ.
ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުން ޝަރަފް ބުނީ މުބާރާތާ ކުރިމަތިލާއިރު، އިދިކޮޅު ޓީމުތަކުގެ ފެންވަރު ވަރަށް ރަނގަޅަށް އެނގޭ ކަމަށާއި، އޭނާއަށް އޮތް އެންމެ ބޮޑު ހިތްހަމަޖެހުމަކީ ޓީމާ މެދު އޮތް އިތުބާރު ކަމަށެވެ. އަދި މި ވަގުތު ރާއްޖޭގެ ކުޅިވަރުގެ ހާލަތާއި ދިވެހި ވޮލީގެ ހާލަތަށް ބަލައި، ނެގެންހުރި ކުޅުންތެރިންނާއެކު ކޯޗެއްގެ ހައިސިއްޔަތުން ވަރަށް ހިތްހަމަޖެހޭ ކަމަށްވެސް ވަނީ ބުނެފައެވެ.
ޝަރަފް ބުނީ ގައުމީ ޓީމާ ހަވާލުވާން އެންމެ ބޮޑަށް ވިސްނީ މި ވަގުތު ރާއްޖޭގެ ވޮލީ އޮތް ހާލަތަށް ބެލުމަށްފަހު ކަމަށެވެ. އަދި ވޮލީބޯޅައިގައި ސެންޓްރަލް އޭޝިއާ ޒޯނުގައި ރާއްޖެއިން ވާދަކުރުމަކީ ކޮންމެހެން މަޖުބޫރު ކަމެއް ކަމަށާއި، އެ ޒޯނުގައި ރާއްޖެއިން ހަމައެކަނި ވާދަކުރުމުގެ ބަދަލުގައި ނަތީޖާ ނެރުމަށްވެސް މަސައްކަތް ކުރާނެ ކަމަށްވެސް ވަނީ ބުނެފައެވެ.
"އެހެންވީމަ އަޅުގަނޑުމެން މި ވަގުތަށް ނަތީޖާ ނެރެންޖެހޭ. އެ ކުރަންޖެހޭ ކަންތައްތަކާއި، ވޮލީބޯޅައިގެ މި ވަގުތުގެ ހާލަތުގައި އަޅުގަނޑުމެން ކުޅެންވީ ކިހިނެތްތޯ، ކިހާ މުއްދަތެއްތޯ ލިބުނީ، އަޅުގަނޑަމެންނަށް އަސްލު ލިބިފައިން ޓާގެޓަކީ ކޮބާތޯ، މި ވަގުތު ހާސިލު ކުރެވޭނީ ކޮންކޮން ކަންތައްތަކެއްތޯ، މި ހުރިހާ ކަމަކާ ވިސްނާފައި އަޅުގަނޑު މި ޗެލެންޖާ ކުރިމަތިލީ." ގައުމީ ފިރިހެން ވޮލީ ޓީމުގެ ކޯޗު ޝަރަފް ބުންޏެވެ.
ކާވާ ވޮލީބޯލް ޗެލެންޖް ކަޕުގައި ވާދަކުރުމަށާއި، ތަމްރީނުތައް ކުރިއަށްގެންދިޔުމަށް ގައުމީ ޓީމު ވަނީ ހަފުތާއެއް ކުރިން އުޒްބެކިސްތާނަށް ގޮސްފައެވެ. މި މުބާރާތުގައި ވާދަކުރާ ގައުމީ ޓީމުގެ ކެޕްޓަނަކީ ތަޖުރިބާކާރު ކުޅުންތެރިޔާ އިސްމާއީލް ސާޖިދު (ކުޑަ ކާއްޓޭ) އެވެ. އަދި ޓީމުގެ ކޯޗު ޝަރަފްގެ ދަށުން މަސައްކަތް ކުރަން ހަމަޖައްސާފައިވަނީ ކުރީގެ މަޝްހޫރު ދެ ކުޅުންތެރިން ކަމަށްވާ އަޙްމަދު އަބްދުލް ކަރީމް (ލޯންގޭ) އާއި އަބްދުﷲ ޖުނައިދެވެ.