ދިވެހި އެތުލީޓުންގެ ގައުމީ ޚިދުމަތުގެ އަގު ދެމެހެއްޓެނިވި ގޮތެއްގައި ވަޒަންކުރެވޭނެ ހަރުދަނާ އިންތިޒާމެއް ގާއިމުކުރުކަށްޓަކައި، ޚާއްސަ ޕެންޝަން ސްކީމެއް ތައާރަފުކުރުމުގެ މަސައްކަތް ކުރިއަށްދާ ކަމަށް ކުޅިވަރާއި ހަށިހެޔޮކަމާ ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
މޯލްޑިވިސް ސްޕޯޓްސް އެވޯޑް 2024 ގައި ވާހަދައްކަމުން ވަޒީރު ވިދާޅުވީ ޤައުމީ ޓީމުގެ އެތުލީޓުން އަދި ކުޅުންތެރިންނާއި އޮފިޝަލުންގެ މުސާރަ އެއްވަރުކޮށް އިތުރު ކުރުމަށްޓަކައި މިހާރު މުސާރަދޭ އުސޫލު ރިވައިޒްކުރުމުގެ މަސައްކަތް ކުޅިވަރާބެހޭ ގައުމީ މަޖިލީހުން ކުރަމުން އަންނަ ކަމަށް ވަޒީރު ވިދާޅުވިއެވެ.
މިހާތަނަށް މި ސަރުކާރުން ކުޅިވަރަށް ކުރެވުނު ކޮންމެ މަސައްކަތަކީވެސް ކުޅުންތެރިންނަށް އެކަމުގެ ސަބަބުން އުއްމީދާއި ކުރިއެރުން ގެނުވައިދޭނެ ކަންކަން ވަޒީރު ވަނީ ފާހަގަކޮއްފައެވެ.
“އަޅުގަނޑު ތި ހުރިހާ އެސޯސިއޭޝަންތަކާއި، ކުޅުންތެރިންނަށް ދޭނެ ޔަގީންކަމަކީ، މި ހިންގަމުންދާ މި ފަސް އަހަރަކީ ދިވެހިރާއްޖޭގެ ކުޅިވަރަށް މިގޭ ކުރިން ނުލިބޭ ވަރުގެ ކުރިއެރުމާއި، ފުރުސަތުތައް މަގު ފަހިކޮށްދޭނެ ފަސް އަހަރަށްވާނެކަމުގެ ޔަގީންކަން." ވަޒީރު ވިދާޅުވިއެވެ.
އެތުލީޓުންގެ ކަންބޮޑުވުންތަކަށް ހައްލު ހޯދައިދިނުމުގައި އެންމެ ފިޔަވަޅެއްވެސް ފަހަތަށް ނުޖެހި، ހިތްވަރާއި އަޒުމާއިއެކު މި ސަރުކާރުން މަސައްކަތްކޮށްދޭނެކަމުގެ ޔަގީންކަން ވަޒީރު ވަނީ ދެއްވާފައެވެ.
ދިވެހި ކުޅިވަރުގެ ފޯރިއާއި ޖޯޝު ދަމަހައްޓައި މޮޅެެތި އެތުލީޓުން އުފެއްދުމަށް ބެލެނިވެރިންނާއި ކުލަބުތަކާއި، އެކަޑެމީތަކާއި، ކޯޗުންނާއި، ޓެކްނިކަލް އޮފިޝަލުން އަދި ސިއްހީ އެހީތެރިން ވެދެއްވަމުން ގެންދަވާ އެހީތެރިކަން ވަޒީރު ވަނީ ފާހަގަކޮއްފައެވެ.
ކުޅިވަރުގެ އެކި މައުލޫމާތުތައް ޝައުގުކުރުވަނިވި ގޮތްތަކަށް ދިވެހިރައްޔިތުންނާ ހަމައަށް ގެނެސްދެއްވުމަށް މީޑިއާތަކުން ކުރައްވާ ބުރަ މަސައްކަތް ވަޒީރު ރާފިއު ވަނީ ޝުކުރު އަދާކުރައްވާފައެވެ.