ސްޕެއިންގެ ބާސެލޯނާއިން ކުރިއަށް އޮތް "އެލް ކްލަސިކޯ" މެޗުގައި ބޭނުންކުރާނީ ޕޮޕް ރޮކް ބޭންޑް، ކޯލްޑްޕްލޭގެ ލޯގޯ ޖެހި ޚާއްސަ އެޑިޝަނެއްގެ ޖާޒީއެއް ކަމަށް ފަހުގެ މީޑިއާ ޚަބަރުތައް ބުނެފިއެވެ.
އެގޮތުން، ހަންސީ ފްލިކްގެ ބާސެލޯނާ ޓީމުން މި މަހުގެ 26 ވަނަ ދުވަހު ވާދަވެރި ރެއާލް މެޑްރިޑްގެ ދަނޑު، ސެންޓިއާގޯ ބާނެބެއުގައި ކުޅޭ މެޗުގައި އެ ޖާޒީ ބޭނުންކުރުމަށް ނިންމާފައިވާއިރު، އަންނަ ނޮވެންބަރު މަހުގެ ދެވަނަ ދުވަހު ބާސެލޯނާގެ ވިމެންސް ޓީމުން އެއިބާއާ ދެކޮޅަށް ސްޕެނިޝް ލީގުގައި ކުޅޭ މެޗުގައި ވެސް ކޯލްޑްޕްލޭގެ ލޯގޯ ޖެހި ޖާޒީ ބޭނުންކުރާނެއެވެ.
އެ ކްލަބުން މި ޖާޒީ ލިމިޓެޑް އެޑިޝަނެއްގެ ގޮތުގައި ވިއްކަން ފެށުމަށް ހަމަޖެހިފައިވާއިރު، މީގެއިން ލިބޭ އާމްދަނީ ހަދިޔާކުރާނީ ބާސާ ފައުންޑޭޝަނުން އުގަންޑާގެ ރެފިއުޖީ ކޭމްޕްތަކުގައި މޫސުމީ ބަދަލުތަކުގެ އަސަރު ކުޑަކުރުމަށް ހިންގާ މަޝްރޫއަކަށެވެ.
މިއީ ބާސެލޯނާ އިން މަޝްހޫރު މިއުޒިކް އާޓިސްޓުންގެ ލޯގޯ ނުވަތަ ނަންތައް ޖާޒީގައި ޖަހައިގެން ކުޅޭ ފުރަތަމަ ފަހަރެއް ނޫނެވެ. އެ ޓީމުގެ ދަނޑާއި ޖާޒީ ސްޕޮންސަރެއްގެ ގޮތުގައި، މިއުޒިކް ސްޓްރީމިންގ ސާވިސް "ސްޕޮޓިފައި" ހަމަޖެއްސި ފަހުން މީގެކުރީ ސީޒަންތަކުގައި ވަނީ ޖާޒީގައި ރޯލިން ސްޓޯންސް އާއި ރޮސާލިއާ އަދި ޑްރޭކް ފަދަ އާޓިސްޓުންގެ ނަން ޖަހައިގެން މެޗުތައް ކުޅެފައެވެ.