މި ސީޒަނުގައި ހޯދަމުންދާ ދަށް ނަތީޖާތަކުގެ ސަބަބުން ފާޑުކިއުންތައް އަމާޒުވެ، ކޯޗުކަމުގެ މަގާމު ގެއްލުމުގެ ބިރު ހީވެފައިވާ ކަމަށް ދެކެވޭ ވާހަކަތަކަކީ ދޮގެއް ކަމަށް މެންޗެސްޓާ ޔުނައިޓެޑުގެ ކޯޗު އެރިކް ޓެން ހާގް ބުނެފިއެވެ.
ޕްރިމިއާ ލީގުގައި މިރޭ ބްރެންޓްފޯޑާ ދެކޮޅަށް ކުޅޭ މެޗުގެ ކުރިން ނޫސްވެރިންނާ ވާހަކަ ދައްކަމުން ޓެން ހާގް ބުނެފައިވަނީ އޭނާގެ މަގާމު ގެއްލުމާ ގުޅޭ ގޮތުން ދެކެވެނީ ދޮގު ވާހަކަތަކެއް ކަމަށާއި، ކްލަބުގެ އެތެރޭގައި އެފަދަ އެއްވެސް ކަމެއް ކުރިއަށްނުދާ ކަމަށެވެ.
މިދިޔަ ސީޒަނުގައި ޕްރިމިއާ ލީގުގެ 8 ވަނައިގައި އޮވެ މެންޗެސްޓަރ ޔުނައިޓެޑް އިން ލީގު ނިންމާލާފައިވާއިރު މި ސީޒަނުގައި މިހާތަނަށް 7 މެޗުން އެ ޓީމުން ކުޅުނުއިރު, އެ ޓީމު އޮތީ 8 ޕޮއިންޓާއެކުގެ ލީގުގެ 14 ވަނައިގަ އެވެ. އަދި މި ހަތް މެޗުގައި އެ ޓީމަށް ކާމިޔާބު ކުރެވިފައިވަނީ އެންމެ ފަސް ގޯލެވެ.
ޓެންހާގް ބުނެފައިވަނީ މި ސީޒަނުގައި ޓީމުން ނެރެފައިވާ ނަތީޖާތަކާއިމެދު އޭނާވެސް ހިތްހަމަ ނުޖެހޭ ކަމަށާއި އަދި ކުރިއަށް އޮތް ތަނުގައި ޓީމުގެ ހާލަތު ރަގަޅުވެ ނަތީޖާތައް ރަގަޅު ކުރެވޭނެކަމަށްވެސް އޭނާ ވަނީ ބުނެފަ އެވެ.
ޓެންހާގް އިތުރަށް ބުނެފައިވަނީ އޭނާގެ މަގާމާއި ގުޅޭ ގޮތުން ދެކެވޭ ވާހަކަތަކަކީ ބައެއް ނޫސްވެރިން ފަތުރަމުންދާ ދޮގު ވާހަކަތަކެއް ކަމަށާއި އެފަދަ ކަމެއް ކުރިއަށް ނުދާ ކަމަށެވެ. ނަމަވެސް އޭނާ ވަނީ ކްލަބުގެ ތެރޭގައި އެ ޓީމަށް ލިބިފައިވާ ދަން ނަތީޖާތަކާއި ގުޅޭ ގޮތުން މަޝްވަރާ ކުރަމުންދާކަމަށް ބުނެފަ އެވެ. އަދި މިކަމުން އަރައިގަނެ ކުރިއަށް އޮތް ތަނުގައި ރަގަޅު ނަތީޖާތަކެއް ހޯދޭނެކަމަށްވެސް ޓެންހާގް ވަނީ ބުނެފަ އެވެ.