އުޒްބެކިސްތާނުގައި މިހާރު ކުރިއަށްދާ ސެންޓްރަލް އޭޝިއަން ވޮލީބޯލް އެސޯސިއޭޝަން (ކާވާ) މެންސް ވޮލީބޯލް ޗެލެންޖް ކަޕް 2024 ގައި ރާއްޖޭގެ ގައުމީ ފިރިހެން ވޮލީބޯޅަ ޓީމުން ކުޅުނު ދެވަނަ މެޗުގައި ތުރުކުމެނިސްތާން އަތުން ބަލިވެއްޖެއެވެ.
ކާވާ ވޮލީބޯލް ޗެލެންޖް ކަޕް ކުރިއަށްދާނީ އަންނަ ބުރާސްފަތި ދުވަހުގެ ނިޔަލަށް އުޒްބެކިސްތާނުގެ ޓަޝްކެންޓުގައެވެ. މި މުބާރާތުގައި ހަ ގައުމެއް ވާދަކުރާއިރު، އެ ގައުމުތަކަކީ ރާއްޖޭގެ އިތުރުން އުޒްބެކިސްތާނާއި، ކިރްގިސްތާނާއި، ތަޖިކިސްތާނާއި، ތުރުކުމެނިސްތާން އަދި އަފްޣާނިސްތާނެވެ.
މުބާރާތުގައި ކުޅުނު ދެވަނަ މެޗުން ރާއްޖެ ބަލިވީ ތުރުކުމެނިސްތާން އަތުން ތިން ސެޓު ދެ ސެޓުންނެވެ. މި މެޗުގެ ފުރަތަމަ ސެޓު 25-18 އިން ތުރުކުމެނިސްތާނުން ގެންދިޔަ ނަމަވެސް، ރާއްޖެއިން ވަނީ ޖެހިގެން އައި ދެ ސެޓު 25-13 އަދި 25-21 އިން ކާމިޔާބުކޮށްފައެވެ. އެކަމަކު އަނެއް ދެ ސެޓުގައި ރާއްޖޭގެ ފަރާތުން އާދައިގެ ކުޅުމެއް ފެނިގެންދިޔައިރު، މި ސެޓުތައް ތުރުކުމެނިސްތާނުން ގެންގޮސްފައިވަނީ 25-15 އަދި 15-8 އިންނެވެ.
މި މެޗުން ރާއްޖެ ބަލިވިއިރު، މުބާރާތުގައި ކުޅުނު ފުރަތަމަ މެޗުން އިއްޔެ ރާއްޖެ ވަނީ ސީދާ ތިން ސެޓުން ކިރްގިސްތާން އަތުން ބަލިވެފައެވެ.
މި މުބާރާތް ރޭވިފައިވާ ގޮތުން ލީގު ބުރުގައި ކޮންމެ ޓީމެއް ކޮންމެ ޓީމަކާ ބައްދަލުކުރާއިރު، އެއްވަނަ އާއި ދެވަނަ ހޯދާ ޓީމުތައް ފައިނަލަށް ދަތުރުކުރާނެއެވެ. އަދި ތިންވަނަ އާއި ހަތަރުވަނައިގެ މެދުގައި ލޯ މެޑެލް މެޗު ކުޅޭއިރު، ފަސްވަނަ އާއި ހަވަނައިގެ މެދުގައި ރޭންކިން މެޗެއް ކުޅޭނެއެވެ. މި މުބާރާތުގައި ރާއްޖެއިން ކުޅޭ ތިންވަނަ މެޗުގައި މާދަމާ ނުކުންނާނީ އަފްޣާނިސްތާނާ ދެކޮޅަށެވެ.