ރެއާލް މެޑްރިޑަށް ކުޅެމުން އަންނަ ބްރެޒިލްގެ ފޯވާޑް ވިނީޝިއުސް ޖޫނިއާއާ ނަސްލީ ގޮތުން ދިމާކުރި މައްސަލައިގައި ހަތަރު މީހަކު ހައްޔަރުކޮށްފައިވާ ކަމަށް ސްޕެއިންގެ ފުލުހުން ބުނެފިއެވެ.
މި އަހަރުގެ ކުރީކޮޅު ވިނީޝިއުސްއާ ނަސްލީ ގޮތުން ދިމާކުރުމުގެ އިތުރުން އޮންލައިން ކެޕްމެއިންވެސް ވަނީ ކުރިއަށް ގެންގޮސްފައެވެ. އަދި އެކަމާ ގުޅިގެން ރެއާލް މެޑްރިޑްގެ އިތުރުން ވިނީޝިއުސް ވަނީ އެކަންތައް ކުށްވެރިކޮށް ވާހަކަ ދައްކާފައެވެ.
މި މަހުގެ 14 އަދި 15 ވަނަ ދުވަހު ހަތަރު މީހުން ހައްޔަރުކޮށް، ތަހުގީގު ކުރިއަށްގެންދަން ފަށާފައިވާއިރު، އެ ހަތަރު މީހުންވެސް ވަނީ މިހާރު ދޫކޮށްލާފައެވެ. އަދި ތަހުގީގު ފަށާފައިވާއިރު، އެކަމާ ގުޅޭ އިތުރު އެއްވެސް މައުލޫމާތެއް ފުލުހުން ހާމަކޮށްފައެއް ނުވެއެވެ.
މި މައްސަލައާއި ގުޅޭ ތަހުގީގު ކުރިއަށްގެންދާ ކަމަށް ފުލުހުން ބުނެފައިވާއިރު, މިދިޔަ އަހަރުގެ މެއި މަހު ވެލެންސިއާ އާއި ރެއާލް މެޑްރިޑް ބައްދަލުކުރި މެޗުގައި ވިނީޝިއުސްއާ ނަސްލީ ގޮތުން ދިމާކުރި މައްސަލައެއްގައި ވެލެންސިއާގެ ތިން ސަޕޯޓަރަކު ވަނީ އަށް މަސް ދުވަހަށް ޖަލަށްލާފައެވެ.
އަދި މިދިޔަ އޮގަސްޓް މަހު ވިނީޝިއުސް ވަނީ ނަސްލީ ގޮތުން އޭނާއާ އިތުރަށް ދިމާކޮށްފިނަމަ މެޗު ހުއްޓާލުމަށްފަހު އޭނާ އާއި އޭނާގެ ޓީމު ދަނޑުން ފައިބާނެ ކަމަށް ބުނެފައެވެ. އަދި މިކަން ހައްލުކުރެވެން އޮތް ހަމައެކަނި ގޮތަކީ މެޗު ހުއްޓާލައިގެން ކަމަށްވެސް އޭނާ ވަނީ ބުނެފައެވެ.