ފްރާންސް ފުޓްބޯލް މަޖައްލާއިން ހޮވާ އަހަރުގެ އެންމެ މޮޅު ފުޓްބޯޅަ ކުޅުންތެރިޔާއަށް ދޭ ބަލޮންޑޯ އެވޯޑް މި އަހަރު ލިބޭނީ ރެއާލް މެޑްރިޑަށް ކުޅެމުން އަންނަ ބްރެޒިލްގެ ފޯވާޑް ވިނީޝިއުސް ޖޫނިއާއަށް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.
މިދިޔަ ސީޒަނުގައި ރެއާލް މެޑްރިޑް އިން ޔޫއެފާ ޗެމްޕިއަންސް ލީގުގެ އިތުރުން ލަލީގާގެ ޗެމްޕިއަންކަން ހޯދާފައިވާއިރު ވިނީޝިއުސް ޖޫނިއާ ވަނީ މުހިންމު ދައުރެއް އަދާކޮށްފަ އެވެ. އަދި މި ސީޒަނުގައިވެސް އޭނާ ދަނީ މޮޅު ކުޅުމެއް ދައްކަމުންނެވެ.
2003 ވަނަ އަހަރުން ފެށިގެން ފުރަތަމަ ފަހަރަށް އާޖެންޓީނާގެ ލިއޮނެލް މެސީ އާއި ޕޯޗުގަލްގެ ކްރިސްޓިއާނޯ ރޮނާލްޑޯ ގެ ނަން ނެތި ނޮމިނޭޝަންސްތައް އިއުލާން ކޮށްފައިވާއިރު ލިއޮނެލް މެސީ ވަނީ 8 ފަހަރު މަތިން ބަލޮންޑޯ ކާމިޔާބުކޮށްފަ އެވެ. އަދި ކްރިސްޓިއާނޯ ރޮނާލްޑޯ ވަނީ 5 ފަހަރު މި މަގާމް ހޯދާފައެވެ.
މި އަހަރުގެ ނޮމިނޭޝަންސްތައް އިއުލާން ކޮށްފައިވާއިރު ރެއާލް މެޑްރިޑްގެ 7 ކުޅުންތެރިން ހިމެނެއެވެ. އޭގެ ތެރޭގައި ވިނީޝިއުސް ޖޫނިއާގެ އިތުރުން ކިލިއަން އެމްބާޕޭ އާއި ޖޫޑް ބެލިންހަމް, ޑެނީ ކަރްވަހާލް, ޓޯނީ ކްރޫޒް, އެންޓޯނިއޯ ރުޑިގަރ އަދި ފެޑެރީކޯ ވަލްވާޑޭ ހިމެނެ އެވެ.
މި ފަހަރުގެ އެވޯޑަށް ނޮމިނޭޓް ވެފައިވާ މަޝްހޫރު އެހެން ކުޅުންތެރިންގެ ތެރޭގައި ބާސެލޯނާގެ ޒުވާން ފޯވަޑް ލަމީން ޔަމާލް އާއި ހެރީ ކޭން, ބުކަޔޯ ސަކާ, ކޯލް ޕާމާ, ފިލް ފޯޑެންގެ އިތުރުން ރޮޑްރީ އާއި ޑެނީ އޮލްމޯ ފާހަގަކޮށްލެވެ އެވެ.
މި އަހަރުގެ ބަލޮންޑޯ އެވޯޑް ދިނުމުގެ ރަސްމީ ހަފްލާ ބޭއްވުމަށް ހަމަޖެހިފައިވަނީ އަންނަ ހޯމަ ދުވަހު ފްރާންސްގެ ވެރިރަށް ޕެރިހުގަ އެވެ.