އިނގިރޭސިވިލާތުގެ ރަސްގެފާނު ޗާލްސްއަށް ރާއްޖެވަޑައިގަތުމުގެ ދަޢުވަތު ދެއްވައިފި

އިނގިރޭސިވިލާތުގެ ރަސްގެފާނު ޗާލްސް 3 ވަނައަށް ރާއްޖެ ވަޑައިގަތުމުގެ ދަޢުވަތު ރާއްޖޭގެ ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ދެއްވައިފިއެވެ.

އިނގިރޭސިވިލާތުގެ ރަސްގެފާނަށް މި ދަޢުވަތު ދެއްވީ، ކޮމަންވެލްތު ހެޑްސް އޮފް ގަވާމަންޓް މީޓިންގައި، ޗޮގަމް 2024 ބައިވެރިވެވަޑައިގަތުމަށް ނައިބު ރައީސް ސަމޯއާ މިހާރު ކުރައްވާ ދަތުރުފުޅުގައި، ކޮމަންވެލްތުގެ އެންމެ އިސްވެރިޔާ އިނގިރޭސިވިލާތުގެ ރަސްގެފާނު ޗާލްސް 3 ބޭއްވެވި ރަސްމީ ޙަފްލާގެ ތެރެއިންނެވެ.

މި ޙަފްލާގެ ތެރެއިން ނައިބު ރައީސް އަލްއުސްތާޛު ޙުސައިން މުޙައްމަދު ލަޠީފް ވަނީ އިނގިރޭސިވިލާތުގެ ރަސްގެފާނު ޗާލްސްއާއެކު ނަންގަވާފައިވާ ފޮޓޯއެއް ސޯޝަލް މީޑިއާގައި ހިއްސާކުރައްވާފައެވެ.

އެމަނިކުފާނުގެ ޕޯސްޓުގައި ރަސްގެފާނު ޗާލްސްއާ ބައްދަލުވުމަކީ ލިބިވަޑައިގެންނެވި ވަރަށް ބޮޑު ޝަރަފެއްގެ ގޮތުގައި ވަނީ ފާހަގަކުރައްވާފައެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން އިނގިރޭސިވިލާތުގެ ރަސްގެފާނަށް ރާއްޖެވަޑައިގަތުމުގެ ދަޢުވަތު ދެއްވާފައިވާކަން ނައިބު ރައީސްގެ ޕޯސްޓުގައި ވަނީ ހާމަކުރައްވާފައެވެ.

🇲🇻🇬🇧
It was an honor to meet His Majesty King Charles III at the SMI event and the dinner hosted by His Majesty during #CHOGM2024. On behalf of President @MMuizzu, I extended an invitation for His Majesty to grace the Maldives with his visit. pic.twitter.com/LLFaYZUy06

— Hussain Mohamed Latheef (@HucenSembe) October 26, 2024

ރަސްގެފާނު ޗާލްސްއަށް ރާއްޖެވަޑައިގަތުމުގެ ދަޢުވަތު ދެއްވާފައިވާއިރު، ރަސްގެފާނުގެ މަންމާފުޅު އަދި އިނގިރޭސިވިލާތުގެ ކުރީގެ ރާނީ އެލިޒަބަތު ދެވަނަ ވަނީ މީގެ 52 އަހަރު ކުރިން، 1972 ވަނަ އަހަރު ރައީސް އިބްރާހިމް ނާސިރުގެ ވެރިކަމުގައި ރާއްޖެއަށް ރަސްމީ ދަތުރުފުޅެއް ކުރައްވައިފައެވެ.

މިއީ އިނގިރޭސިވިލާތުގެ ޝާހީ އާޢިލާގެ ބޭފުޅަކު ރާއްޖެއަށްކުރެއްވި މިފަދަ ހަމައެކަނި ދަތުރުފުޅެވެ.

ކޮމަންވެލްތު ޤައުމުތަކުގެ އިސްވެރިންގެ 27 ވަނަ ބައްދަލުވުން 2024، މިއަހަރު ކުރިއަށްދަނީ ތަރައްޤީވަމުން އަންނަ ކުދި ޖަޒީރާ ޤައުމުތަކުގެ ތެރޭގައި ހިމެނޭ ސަމޯއާގައެވެ. މި އަހަރަކީ ޕެސިފިކް ސަރަހައްދުގެ ސްމޯލް އައިލެންޑް ޑިވެލޮޕިން ސްޓޭޓް، ސިޑްސްގެ ޤައުމެއްގައި ކޮމަންވެލްތު ޤައުމުތަކުގެ އިސްވެރިންގެ ބައްދަލުވުން ބާއްވާ ފުރަތަމަ ފަހަރެވެ.

ސަމޯއާގައި މިހާރު ކުރިއަށްދާ ކޮމަންވެލްތު ހެޑްސް އޮފް ގަވަރމަންޓް މީޓިންގ (ޗޮގަމް)ގެ އެގްޒެކެޓިވް ސެޝަންގައި ބައިވެރިވެވަޑައިގެން ވާހަކަފުޅުދައްކަވަމުން ނައިބް ރައީސް ވަނީ ޑިމޮކްރަސީއާއި، އިންސާނީ ޙައްޤުތަކާއި، ޞުލްޙަމަސަލަސްކަމާއި، ތަފާތު ފިކުރުތަކަށް އިޙްތިރާމްކުރުމަކީ، މުޖުތަމަޢުތައް ކުރިއަރައި ދިއުމުގެ މައިގަނޑު ތަނބުތައްކަން ފާހަގަކުރައްވައި، މި އަސާސްތަކުގެ ސަބަބުން، ޤާނޫނީ ވެރިކަން ދެމެހެއްޓުމާއި، ހެޔޮވެރިކަމުގެ މަގަށް މަގުފަހިވެގެންދާކަމުގައި ވިދާޅުވިއެވެ.