އެމެރިކާގެ މޭޖަރ ލީގު ސޮކަރ (އެމްއެލްއެސް) ގެ އީސްޓަން ކޮންފަރެންސްގެ ކުއާޓާ ފައިނަލް ޕްލޭއޮފްގެ ފުރަތަމަ ލެގުގައި އެޓްލާންޓާ ޔުނައިޓެޑާ ދެކޮޅަށް ކުޅުނު މެޗު 2-1 ގެ ނަތީޖާއަކުން އިންޓަރ މަޔާމީން ކާމިޔާބުކޮށްފިއެވެ.
ފްލޮރިޑާގައި ކުޅުނު މި މެޗުގައި އިންޓަރ މަޔާމީގެ ޖޯޑީ އަލްބާ އާއި ލިއޮނެލް މެސީގެ އިތުރުން ލުއިސް ސުއަރޭޒްގެ ފަރާތުން ވަނީ މޮޅު ކުޅުމެއް ފެނިގެން ގޮސްފަ އެވެ.
މި މެޗުގެ ދެވަނަ މިނިޓުގައި އިންޓަރ މަޔާމީގެ ލުއިސް ސުއަރޭޒް ވަނީ ލަނޑެއް ކާމިޔާބުކޮށް އެ ޓީމަށް ކުރި ހޯދަދީފަ އެވެ. މި ލަނޑު އޭނާ ކާމިޔާބުކޮށްފައިވަނީ ޖޯޑި އަލްބާ ދިން ބޯޅަ އަކުންނެވެ.
އިންޓަރ މަޔާމީ އިން މެޗުގެ ވަރަށް ކުރީކޮޅު ލަނޑެއް ޖަހާ ކުރި ހޯދި ނަމަވެސް މެޗުގެ 39 ވަނަ މިނިޓުގައި އެޓްލާންޓާގެ ލޮބްހަނިޑްޒޭ ވަނީ ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކޮށްފަ އެވެ. މިއީ ހަތް ދުވަހުގެ ތެރޭގައި އެޓްލާންޓާ ކުޅުނު ތިންވަނަ މެޗެވެ.
އިންޓަރ މަޔާމީ މި މެޗުން މޮޅުވި ލަނޑު މެޗުގެ 60 ވަނަ މިނިޓުގައި އެ ޓީމަށް ކާމިޔާބުކޮށްދީފައިވަނީ ލިއޮނެލް މެސީގެ އެސިސްޓަކުން ޖޯޑީ އަލްބާ އެވެ.
މި މެޗުގައި އިންޓަރ މަޔާމީއަށް ދެ ލަނޑު ކާމިޔާބުކުރެވުނު ނަމަވެސް އެ ޓީމުން ވަނީ އެޓްލާންޓާގެ ގޯލަށް ނުރައްކާތެރި ގިނަ ހަމަލަތަކެއް ފޮނުވާލާފަ އެވެ. އެޓްލާންޓާގެ ކީޕަރު ގުޒާން ވަނީ މި މެޗުގައި 9 ހަމަލައެއް ދިފާއުކޮށްފަ އެވެ.
މި ދެ ޓީމުގެ ދެވަނަ ކުރިމަތިލުން އޮންނާނީ އަންނަ ނޮވެމްބަރ މަހުގެ ދެވަނަ ދުވަހު އެވެ.