300 އަށްވުރެ ގިނަ މަޝްރޫޢަށް ބަޖެޓުގައި ހިމަނާފައި އޮތީ ބައިކުޅަބައި: ވަޒީރު ޑރ. މުއްޠަލިބް
-
ދައުލަތުގެ އާމްދަނީއާ ނުބައްދަލު މިންވަރަކަށް މަޝްރޫޢުތައް ފަށާފައިވާކަން ވަޒީރު ފާހަގަކުރެއްވި
-
ޕެންޑިން ބިލްތަކުގެ ގޮތުގައި ވުޒާރާގައި އެކަނިވެސް 1.72 ބިލިޔަން ރުފިޔާގެ ބިލް ހުރި
ޢުމްރާނީ ތަރައްޤީއާގުޅުންހުރި 300 އަށްވުރެ ގިނަ މަޝްރޫޢު ހިންގުމަށް މިއަހަރުގެ ބަޖެޓުގައި ހިމަނާފައި އޮތީ އެންމެ ބައިކުޅަ ބައިކަމަށާއި، އައު މަޝްރޫޢުތައް ފެށުމަށް ކުރިމަތިވި އެންމެ ބޮޑު ގޮންޖެހުމަކީ އެއީކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
އިމާރާތްކުރުމާއި ބިނާރާ ބެހޭ ވުޒާރާގެ މަސައްކަތްތަކާ ގުޅޭގޮތުން މަޢުލޫމާތު ދެއްވުމަށް ރައީސުލްޖުމްހޫރިއްޔާގެ އޮފީހުގައި ބޭއްވި ނޫސްވެރިންގެ ބައްދަލުވުމުގައި ވަޒީރު ވަނީ ކުރީ ސަރުކާރުން ދައުލަތުގެ އާމްދަނީއާ ނުބައްދަލު މިންވަރަކަށް މަޝްރޫޢުތައް ހިންގުމަށް މިއަހަރުގެ ބަޖެޓުގައި ހިމަނާފައިވާކަމަށް ވިދާޅުވެފައެވެ.
އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވީ، މި ސަރުކާރު ވެރިކަމާއި ޙަވާލުވިއިރު އެކި މަރުހަލާތަކުގައި ކުރިއަށްދާ 242 މަޝްރޫޢުއަކާއި އަލަށް ސޮއިކޮށްފައިވާ 80 މަޝްރޫޢެއް ހިމެނޭހެން ކުރިއަށްދާ މަޝްރޫޢުތަކުގެ ޖުމްލަ ޢަދަދު 322 އަށް އަރާ ކަމަށެވެ. އަދި މި މަޝްރޫޢުތަކުގެ ޖުމްލަ އަގު 39 ބިލިޔަން ރުފިޔާއަށް އަރާކަން ވަޒީރު ފާހަގަކުރެއްވިއެވެ. ވަޒީރު ވަނީ މީގެތެރެއިން ހިނގަމުންދާ މަޝްރޫޢުތަކުގެ ތަފާސްހިސާބު ހިއްސާކުރައްވާފައެވެ.
ހިނގަމުންދާ މަޝްރޫޢުތަކުގެ ތަފްޞީލު:
• އެއަރޕޯޓް ތަރައްޤީކުރުން: 9 މަޝްރޫޢެއް
• ބްރިޖު: 1 މަޝްރޫޢު
• ބިން ހިއްކުން: 29 މަޝްރޫޢު
• މަގު ހެދުން: 42 މަޝްރޫޢު
• ގޮނޑުދޮށް ޙިމާޔަތްކުރުން: 44 މަޝްރޫޢު
• ފެނާއި ނަރުދަމާ: 102 މަޝްރޫޢު
އިމާރާތްކުރުމާ ބެހޭ ވަޒީރު ޑރ. މުއްޠަލިބް ވިދާޅުވީ، 39 ބިލިޔަން ރުފިޔާގެ މަޝްރޫޢު ހިންގުމަށް ކުރީ ސަރުކާރުން 2024 ވަނަ އަހަރުގެ ބަޖެޓުގައި ހިމަނާފައި ވަނީ އެންމެ 3.6 ބިލިޔަން ރުފިޔާކަމަށެވެ. އަދި މީގެ ތެރެއިން ބޮޑު ބަޔަކީ ތިލަމާލޭ ބްރިޖާއި، އައްޑޫ ސިޓީގެ މަގުތައް ހެދުމާއި، ފެނާއި ނަރުދަމާގެ މަޝްރޫޢުތަކަށް އިންޑިއާ ސަރުކާރުގެ ލައިން އޮފް ކްރެޑިޓްގެ ތެރެއިން ޚަރަދުކުރުމަށް ކަނޑައަޅާފައި ހުރި ފައިސާކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ، މިއަހަރުގެ ބަޖެޓުގައި ހިމަނާފައި އޮތީ މި ހުރިހާ މަޝްރޫޢެއް ހިންގުމަށް ބޭނުންވާ ފައިސާގެ ބައިކުޅަ ބައި ނުވަތަ %15 އާއި %20 އާ ދެމެދުގެ އަދަދެއްކަމަށެވެ.
"އަޅުގަނޑުމެންނާ އެންމެ ބޮޑަށް ކުރެވޭ ސުވާލަކީ ކީއްވެގެންތޯ ޕްރޮޖެކްޓްތައް ނުހިނގަނީ؟ ވަރަށް ބައިވަރު ޕްރޮޖެކްޓްތައް އެބަހިނގާ، އެހެންނަމަވެސް ވަރަށް ބައިވަރު ޕްރޮޖެކްޓްތައް ނުހިނގާތަންވެސް ފެންނާނެ. އޭގެ ސާފު ޖަވާބަކީ ސޮއިކޮށްފައި ހުރި މަޝްރޫޢުތައް ކުރިއަށްގެންދިއުމަށް ބޭނުންވާ ފައިސާ މި ދެންނެވިގޮތަށް ބައިކުޅަ ބައެއް ބަޖެޓުގައި ހިމެނިފައި އޮތުން. އަޅުގަނޑުމެންނަށް ޚަރަދުކުރެވެން އަންނަނީ ޤާނޫނުގައިވެސް ވާގޮތުން ބަޖެޓަށް ކަނޑައަޅާފައިވާ އަދި އެ ފައިސާ ލިބޭ މިންވަރަކަށް ބަލާފައި." ވަޒީރު ވިދާޅުވިއެވެ.
އިމާރާތްކުރުމާ ބެހޭ ވަޒީރު ޑރ. މުއްޠަލިބް ވިދާޅުވީ، މާލީގޮތުން ހުރި ގޮންޖެހުންތަކާއެކުވެސް އެ ވުޒާރާއިން މަސައްކަތް ކުރަމުންދިޔާއީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ވީހާވެސް ގިނަ މަޝްރޫޢުތައް ހުއްޓާނުލާ ކުރިއަށްގެންދިއުމަށް ކަމަށެވެ.
އެހެންނަމަވެސް މަޝްރޫޢުތައް މަޑުޖެހުމާއި، އައު މަޝްރޫޢުތައް ފެށުމަށް ކުރިމަތިވި އެންމެ ބޮޑު ގޮންޖެހުމަކީ މި ސަރުކާރު ވެރިކަމާ ޙަވާލުވިއިރު އެ ވުޒާރާގެ ތެރޭގައި އެކަނިވެސް ގިނަ އަދަދެއްގެ ޕެންޑިންގ ބިލްތައް ހުރުންކަމަށް ވަޒީރު ވިދާޅުވިއެވެ.
އެގޮތުން 1.72 ބިލިޔަން ރުފިޔާގެ ޕެންޑިންގ ބިލްތައް ހަމައެކަނި އެ ވުޒާރާގެ ތެރޭގައިވެސް ހުރި ކަމަށާއި، މާލީ ވުޒާރާއަށް ފޮނުވާ އެހެންނަމަވެސް ކޮންޓްރެކްޓަރުންނަށް ނުދައްކާވެސް 300 މިލިޔަނަށްވުރެ ގިނަ ރުފިޔާ ހުރިކަން ވަޒީރު ފާހަގަކުރެއްވިއެވެ. އަދި މި ޕެންޑިންގ ބިލްތަކަށް ވާ ފައިސާ މިދިޔަ އަހަރުގެ ސަޕްލިމެންޓްރީ ބަޖެޓް ފާސްކުރިއިރު ހިމަނާފައި ނުވާކަމަށްވެސް ވަޒީރު ވިދާޅުވިއެވެ.
ވަޒީރު ވިދާޅުވީ، މިއަހަރުގެ ޕީއެސްއައިޕީ ބަޖެޓުގައި އައު މަޝްރޫޢުތައް ހިންގުމަށް ހިމަނާފައި ވަނީ އެންމެ 969.5 މިލިޔަން ރުފިޔާކަމަށެވެ.
"ސޮއިކޮށްފައިވާ މަޝްރޫޢުތަކަށް ބޭނުންވާ ފައިސާ ހިމަނާފައި ނުވުމާއި، ޕެންޑިންގ ބިލްގެގޮތުގައި 1.72 ބިލިޔަން ރުފިޔާ ހުރުމުގެ ސަބަބުން ސޮއިކޮށްފައިވާ މަޝްރޫޢުތައް ކުރިއަށްގެންދިއުމަށް ދަތިވުމުގެ އިތުރަށް އައު މަޝްރޫޢު ފެށުމަށް ބޮޑެތި ހުރަސްތަކެއް ކުރިމަތިވި." ވަޒީރު ވިދާޅުވިއެވެ.
މި ނޫސްވެރިންގެ ބައްދަލުވުމުގައި އިމާރާތްކުރުމާއި ބިނާރާ ބެހޭ ވުޒާރާގެ ދަށުން ކުރިއަށްދާ މަޝްރޫޢުތަކުގެ ތެރެއިން ފާއިތުވި އެއް އަހަރުގެ ތެރޭގައި ނިންމުނު މަޝްރޫޢުތަކާއި މިއަހަރުގެ ނިޔަލަށް ނިންމާލެވޭނެކަމަށް ބެލެވޭ މަޝްރޫޢުތަކުގެ ތަފާސްހިސާބުވެސް އެ ވުޒާރާއިން ވަނީ ހިއްސާކުރައްވާފައެވެ.
އެއް އަހަރުތެރޭ ނިމުނު މަޝްރޫޢުތައް:
• ބަނދަރު ހެދުން: 4
• ބިން ހިއްކުން: 1
• މަގު ހެދުން: 1
• ގޮނޑުދޮށް ޙިމާޔަތްކުރުން: 3
• ފެނާއި ނަރުދަމާ: 29
◼︎ މަޝްރޫޢުތަކުގެ ޖުމްލަ ޢަދަދު: 38
◼︎ މަޝްރޫޢުތަކުގެ ޖުމްލަ އަގު: 1.97 ބިލިޔަން ރުފިޔާ
މިއަހަރުގެ ނިޔަލަށް ނިންމޭނެ މަޝްރޫޢުތައް:
• ގޮނޑުދޮށް ޙިމާޔަތްކުރުން: 3
• ބަނދަރު ހެދުން: 4
• އެއަރޕޯޓް ތަރައްޤީކުރުން: 1
• ބިން ހިއްކުން: 1
• މަގު ހެދުން: 2
• ފެނާއި ނަރުދަމާ: 9
• ޕޯޓް ތަރައްޤީކުރުން: 1
◼︎ މަޝްރޫޢުތަކުގެ ޖުމްލަ ޢަދަދު: 21
◼︎ މަޝްރޫޢުތަކުގެ ޖުމްލަ އަގު: 1.5 ބިލިޔަން ރުފިޔާ