މެންޗެސްޓާ ޔުނައިޓެޑުގެ ކޯޗުގެ މަގާމަށް ވަގުތީ ގޮތުން އެސިސްޓަންޓް ކޯޗު ރޫޑް ވެންނިސްޓެލްރޫއީ ހަމަޖައްސައިފިއެވެ.
މެންޗެސްޓަރ ޔުނައިޓެޑްގެ ކުޅުންތެރިއެއްގެ ގޮތުގައި ފަސް އަހަރު ދުވަހު އެ ކްލަބަށް ކުޅެދީ އެތަކެއް ކާމިޔާބީއެއް ހޯދާފައިވާ ނިސްޓެލްރޫއީ އާއި އެ ކްލަބުގެ ކޯޗުކަން ވަގުތީ ގޮތުން ހަވާލުކޮށްފައިވަނީ ކޯޗަކަށް ހުރި އެރިކް ޓެންހާގް މަގާމުން ދުރުކުރުމަށްފަހުގަ އެވެ.
މެންޗެސްޓަރ ޔުނައިޓެޑް ފަދަ ދިގު ތާރީޚެއް އޮތް ބޮޑު ކްލަބެއްގެ ކޯޗުކަމާއި ނިސްޓެލްރޫއީ އަލަށް ހަވާލުވާއިރު އޭނާ ބުނެފައިވަނީ މިއީ އޭނާއަށް ނުކުރެވޭވަރުގެ ކަމެއް ނޫން ކަމަށާއި އޭނާ ލޯބިވާ ކްލަބެއްގެ ކޯޗެއްގެ ގޮތުގައި މަސައްކަތް ކުރަން ކެތްމަދުވެފައިވާ ކަމަށެވެ.
2001 ވަނަ އަހަރު ޕިއެސްވީ އެއިންދޯވެން އިން 19 މިލިއަން ޕައުންޑްގެ ފީ އަކަށް ނިސްޓެލްރޫއީ މެންޗެސްޓަރ ޔުނައިޓެޑަށް ގެންގޮސްފައިވަނީ އޭރުގެ ކޯޗު އެލެކްސް ފަރގަސަން އެވެ. އަދި އޭނާ ވަނީ ފަސް އަހަރު ދުވަހުގެ ތެރޭގައި އެ ކްލަބަށް ކުޅެދިން 219 މެޗުގައި 150 ލަނޑު ކާމިޔާބުކޮށްފަ އެވެ.
މެންޗެސްޓަރ ޔުނައިޓެޑްގެ އެސިސްޓެންޓް ކޯޗު ކަމާއި ދާދި ފަހުން ހަވާލުވި ނިސްޓެލްރޫއީ ވަނީ ކުރިން ނެދަލޭންޑްސްގެ ޕީއެސްވީ އެއިންދޯވަން އަށް ކޯޗުކޮށްދީ އެ ކްލަބަށް ޑަޗް ކަޕްގެ އިތުރުން ޑަޗް ސުޕަ ކަޕްވެސް ކާމިޔާބުކޮށްދީ ލީގުގެ ދެވަނަ އެ ކްލަބަށް ހޯދަދީފަ އެވެ.
2012 ވަނަ އަހަރު ސްޕެއިންގެ މަލާގާ އަށް ކުޅުމަށްފަހު ކުޅުން ހުއްޓާލާ ކޯޗިންގެ ތެރެއަށް ވަދެ އޭނާ ވަނީ 2022 ވަނަ އަހަރު ޕީއެސްވީގެ ފުރަތަމަ ޓީމާއި ހަވާލުވުމުގެ ކުރިން އެ ކްލަބުގެ ޔޫތު ޓީމަށްވެސް ކޯޗުކޮށްދީފަ އެވެ.