އެމެރިކާގެ އެންބީއޭގައި ގޯލްޑެންސްޓޭޓް ވޯރިއާސްއަށް ކުޅެމުން އަންނަ ސްޓެފަން ކަރީއަށް އަނިޔާވެ، ކުރިއަށް އޮތް ދެ މެޗުގައި ނުކުޅެވޭނެކަމަށް އެ ޓީމުން ބުނެފިއެވެ.
އުމުރުން 36 އަހަރުގެ ކަރީގެ ފައިގެ ކުޑަހުޅަށް އަނިޔާވީ، ވޯރިއާސް އެންމެ ފަހުން ލޮސް އެންޖެލަސް ކްލިޕާސްއާ ދެކޮޅަށް ކުޅެ 112-104 އިން ބަލިވި މެޗުގައެވެ.
ކަރީގެ އަނިޔާއާ ގުޅޭގޮތުން، ވޯރިއާސް އިން ބުނެފައިވަނީ، އެމްއާރްއައި އިން ދައްކާގޮތުގައި ސްޓްރަކްޗަރަލް ގެއްލުމެއް ނެތްކަމަށާއި، ވާތް ޕެރޮނިއަލް ސްޓްރެއިނެއް ކަށަވަރުވެފައިވާ ކަމަށެވެ. ޕެރޮނިއަލް ޓެންޑަންތައް ހުންނަނީ ކުޑަހުޅުގެ ބޭރު ފަރާތުގައެވެ.
އެލްއޭ ކްލިޕާސްއާ ދެކޮޅަށް ކުޅުނު މެޗުގައި ކަރީގެ ވާތުފައިގެ ކުޑަހުޅަށް ދެފަހަރު މަތިން އަނިޔާވެފައިވެއެވެ. މިއާއެކު، އިތުރަށް ކުޅުން ކުރިއަށްގެންދެވޭގޮތްނުވުމުން އެނބުރި ލޮކަރޫމަށް ދިޔައީއެވެ.
ވޯރިއާސްގެ ކޯޗު، ސްޓީވް ކޭރ ބުނެފައިވަނީ، ކަރީ ގަބޫލުކުރާ ގޮތުގައި މި އަނިޔާ ސީރިއަސް ނޫން ކަމަށެވެ.
"އޭނާ ނުދެކޭ މިއީ މާ ބޮޑު އިންޖަރީއެއްގެ ގޮތުގަ،"
"އެކަމަކު އެއީ ކަންބޮޑުވާންޖެހޭ ކަމެއްކަން ޔަގީން." ކޭރ ބުންޏެވެ.
ކަރީގެ އިތުރުން ވޯރިއާސްގެ ޑެ'އެންތަނީ މެލްޓަން އަށް ވެސް އާދީއްތަ ދުވަހުގެ މެޗުގައި ވަނީ އަނިޔާވެފައެވެ. މެލްޓަންގެ ބުރަކަށްޓަށް ލިބިފައިވާ އަނިޔާ އިވެލުއޭޓްކުރާނެ ކަމަށް ވޯރިއާސް އިން ބުނެއެވެ. މި ދެ ކުޅުންތެރިންނަށް ވެސް ވޯރިއާސް އަށް ނިއު އޯލިއާންސް ޕެލިކަންސްއާ ދެކޮޅަށް ކުރިއަށް އޮތް ދެ މެޗު ވެސް ގެއްލޭނެ އެވެ.
އަދި އޭގެފަހުން، އެ ޓީމަށް ދެން އޮތް ބޮސްޓަން ސެލްޓިކްސް އާއި ކްލީވްލެންޑް ކަވާލިއާސްގެ މެޗާއި އޮކްލާހޯމާ ސިޓީ ތަންޑާ މެޗުގައި ކުޅެވިދާނެކަން ކަށަވަރުކުރުމަށް އިތުރު ޓެސްޓުތައް ހަދަން ޖެހޭނެ އެވެ.
ވޯރިއާސް ޓީމުގައި މިވަގުތު އަނިޔާގައި ހުރި އަނެއް ކުޅުންތެރިއަކީ އެންޑްރޫ ވިގިންސް އެވެ. ވިގިންސް މިވަގުތު ދަނީ ބުރަކަށްޓަށް ލިބިފައިވާ އަނިޔާއަކަށް ފަރުވާ ހޯދަމުންނެވެ. މިއާއެކު، ކުރިއަށް އޮތް މެޗުގައި އޭނާ އަށް ވެސް ކުޅެވިދާނެ ކަމާމެދު ވަނީ ސުވާލު އުފެދިފައެވެ.