އިޓަލީގެ ކުރީގެ ފޯވާޑް، މާރިއޯ ބަލޮޓެއްލީ، ހަތަރު އަހަރަށްފަހު އެނބުރި އިޓަލީ ލީގަށް ބަދަލުވެ، ހިލޭ ޓްރާންސްފާއެއްގައި ޖެނޯއާ އާ ގުޅިއްޖެއެވެ.
އުމުރުން 34 އަހަރުގެ ބަލޮޓެއްލީ އެންމެ ފަހުން ތުރުކީގެ އަދާނާ ޑެމިރްސްޕޯރ އާއެކު ހަދާފައިވާ އެއްބަސްވުން މިދިޔަ ޖުލައި މަހު ހަމަވެފައިވުމުން މިހާތަނަށް ހުރީ އެހެން ކްލަބަކާ ނުގުޅިއެވެ.
ކުރީން، މެންޗެސްޓާ ސިޓީ އާއި އިންޓަ މިލާނަށް ކުޅެފައިވާ ބަލޮޓެއްލީ، ޖެނޯއާ އާ ގުޅުނުކަން އެ ކްލަބުން ވަނީ ކަށަވަރުކޮށްދީފައެވެ.
"މަރުހަބާ ޖެނޯއާ އަށް، ސުޕަ މާރިއޯ!" އެ ކްލަބުން ނެރުނު ބަޔާނުގައިވެއެވެ.
ބަލޮޓެއްލީ ބުނީ، އޭނާ މާގިނަ ވާހަކަތަކެއް ދައްކަން ބޭނުންނުވާ ކަމަށާއި، ޖެނޯއާ އާއެކު މަސައްކަތްކުރަން ކެތްމަދުވެފައި ހުރި ކަމަށެވެ. އަދި، ވީ އެންމެ އަވަހަކަށް މަސައްކަތް ފަށަން ބޭނުންވާ ކަމަށް ވެސް ބަލޮޓެއްލީ ބުންޏެވެ.
ޖެނޯއާ އަކީ، ބަލޮޓެއްލީގެ ކްލަބު ކެރިއަރުގައި ކުޅޭނެ 11 ވަނަ ކްލަބެވެ. އިޓަލީގައި އޭނާ ވަނީ 2007 ވަނަ އަހަރު އިންޓަ އަށް ކުޅެފައެވެ. އެ މުއްދަތުގެ ތެރޭގައި ބަލޮޓެއްލީ ވަނީ، އިންޓަ އާއެކު ހަ ޓްރޮފީ ކާމިޔާބުކޮށްފައެވެ. އޭގެތެރޭގައި، އިޓަލިއަން ލީގުގެ ޗެމްޕިއަން ތިން ފަހަރު އަދި ޔުއެފާ ޗެމްޕިއަންސް ލީގު އެއްފަހަރު ކާމިޔާބުކުރިއެވެ.
2010 ވަނަ އަހަރު ބަލޮޓެއްލީ ވަނީ ސިޓީ އަށް ބަދަލުވެ، ފުރަތަމަ ސީޒަނުގައި އެފްއޭ ކަޕް ކާމިޔާބުކޮށްފައެވެ. އަދި އެއަށްފަހު، ދެންޖެހިގެންއައި ސީޒަނުގައި ޕްރިމިއާ ލީގުގެ ޗެމްޕިއަންކަން އެ ޓީމާއެކު ކާމިޔާބުކުރިއެވެ.
އަދި އޭގެފަހުން، އޭސީ މިލާނަށާއި ލިވަޕޫލަށް ކުޅުމަށްފަހު ފްރާންސްގެ ނީސް އާއި އޮލިމްޕިކް މާސޭގެ އިތުރުން އިޓަލީގެ ބްރެޝިއާ އާއި މޮންޒާ އަށް ވެސް ކުޅުނެވެ. އެއަށްފަހު، އޭނާ އެންމެ ފަހުން ކުޅުނީ އަދާނާ ޑެމިރްސްޕޯރ އާއި ސިއޯން އަށެވެ.
އިޓަލީގެ ގައުމީ ޓީމަށް މިހާތަނަށް 36 މެޗު ކުޅެ، 14 ލަނޑުޖަހައިދީފައިވާ ބަލޮޓެއްލީ ވަނީ 2012 ވަނަ އަހަރުގެ ޔޫރަޕިއަން ޗެމްޕިއަންޝިޕްގެ ރަނަރަޕް ހޯދިއިރު އެ ޓީމުގައި މުހިއްމު ދައުރެއް އަދާކޮށްފައެވެ.